Read Khoekhoegowab Esegieli 4 Bible Online

Esegieli 4 - Khoekhoegowab bible

Esegieli 4

¹Tsî sats khoenôa ǀgôatse, amhe hâ ǂnubiǀui-e ū, îts ǁî-e sa ais aiǃâ ǁgui îts ǁî-i ai Jerusalemsa ǀnōǁnâ.

²Îts ǁîsa xāǂgā tsî ǁaposa ǃkhaide ǁîs ǃoa-ai ǂnubi îts ǁîs ǃoa-ai ǁkhui-e aokhâi, îts toroǂnubi-e ǁîs ǃoa-ai ǂnûi îts ǂkhūǂkhūǃnaoga ǁîs ǂnamipe ǂnûi.

³Îts ǂnūǀuripanna ū îts ǁîba ǂnūǀuriǂnubiǂgoase ǂnûi sats tsî ǁnā ǃās tsîro ǁaegu, îts ais âtsa ǁîs ǃoagu unu îs xāǂgās ǃnâ sī îts satsa ǁîsa xāǂgā; nēs ge Israeli omma saose nî ība.

⁴Îts ǁareǀkhāb ǃnammi âts ai ǁgoe îts ǂhanuoǃnâsib Israeli ommi diba ǁîb ai ǁgui; ǁîb aits nî ǁgoe, tsēdi kōsets ge satsa ǂhanuoǃnâsib Israeli ommi diba nîra tani.

⁵Tsî tita ge satsa kurigu ǁîn di ǂhanuoǃnâsib diga ge mā tsēdi di ǀgaus ǃoa ǃnonakaidisi tsî khoesedisi tsēdi kōse, ǂhanuoǃnâsib Israeli ommi dibats nî taniga.

⁶Tsî ǁîǃkhai-ets ga dītoao, îts ǁnâi ǀgamǁî ǃnās ai ǁgoe amǀkhāb ǃnammi âts ai, îts ǂhanuoǃnâsib Judab ommi diba tani hakadisi tsēdi kōse. Tita ge mâ tsēs hoas ama mâ kurib hoaba ge mā tsi.

⁷ǁNā-amagats ge satsa sa aisa Jerusalems di xāǂgāsǀî nî unu, tsî sa ǁôab ge nî ǀkhaiǀkhā, tsîts ge ǁîsa nî kēboba.

⁸Tsî mû, tita ge tsuriga sa ai nî ǁgui, nē ǃnamma xuts nau ǃnammi âts ai ǁgoe-unusen tidega, tsēdi xāǂgās âts didi nî toas kōse.

⁹Îts ūbasen ǃhorob, gerst-i, bonkin, lensi-i, hors-i, ǀnapeǃhorob tsî ǀkhoaǃhorob tsîna, îts ǁîna soa-i ǃnâ ǂgā, tsî ǁîna peredībasen, sa ǃnammi aits nî ǁgoe tsēdi kōse, ǃnonakaidisi tsî khoesedisi tsēdi kōsets ge ǁîna nî ǂû.

¹⁰Tsî sa ǂûn sats nî ǂûn ge tsēs ai ǀgamdisi sekeln kōse nî ǃgom; ǁaeba xu ǁaeb kōsets ge ǁîna nî ǂû.

¹¹Tsîts ge ǁkhāti ǁgam-e ǀgaub ai nî ā ǃnaniǁî ǃâs hinni dis kōse; ǁaeba xu ǁaeb kōsets ge ǁîba nî ā.

¹²Tsîts ge ǁkhāti gersttsampereba nî ǂû, tsîts ge ǁîba xaub, khoeba xu ra ǂoaxab ai ǁîn di mûdi aiǃâ nî am.

¹³Tsîb ge ǃKhūba ge mî: Nētin ge Israeli ôana ǁîn di pereba ǀurisase nîra ǂû, ǁnā ǁaedi ǁîn ǃoa ta nî ǁîna doeǁgan ǁaegu.

¹⁴ǃNubai ta ge tita ge mî: Okha ǃKhūtse, ǃKhūtse, kō, ti ǀoms ge ǀuriǀurihe tama ge hâ i, tita xa i ge ti ǂkhamsisa xu nēsis kōse ǁō hâ soro-i kās ǀkhauǃāhe hâ-i kas hoasa ǂûhe tama, tsî ui-uisa ǁgan-i xare-i ge ti ams ǃnâ sī tama ge hâ i.

¹⁵Ob ge ǁîba tita ǃoa ge mî: Mû, tita ge gomaǂhauba khoexaub di amǃnâs ai go mā tsi, ots ge ǁîb ǀkha sa pereba nî ǂhomi.

¹⁶ǁNās khaoǃgâb ge ǁîba tita ǃoa ge mî: Sats khoenôa ǀgôatse, mû, tita ge hais pereb disa ra khôa Jerusalems ǃnâ, tsîn ge ǃgommi ǀkha tsî ǂhansenni ǀkha nîra ǂû tsî ǁgam-e ǀgaub ai tsî burugâs ǀkha ā.

¹⁷Pereb tsî ǁgammi tsîkha nî tôasi xui-ao i ge nē-e nau-i ǀkha nîra burugâ, tsîn ge ǂhanuoǃnâsib ân ǃnâ nîra ǁgâs xa ǁō.