Read Khoekhoegowab Esegieli 40 Bible Online

Esegieli 40 - Khoekhoegowab bible

Esegieli 40

¹ǀGamdisikoroǀaǁî kurib sida ge ǃkhōsase ūǃgûbēhes dib ǃnâ, tsoatsoas kurib dis ǃnâ, disiǁî tsēs ǁkhâb dis ai, disihakaǀaǁî kurib ǃnâ ǃās ge ǂnauhes khaoǃgâ, ǁnā tsēs ǁkhās aib ge ǃommi ǃKhūb diba ti ai ge hâ i, tsî ǁîb ge ǁnāǀî ge ūsī te.

²Aidi Elob didi ǃnâb ge ǁîba Israeli di ǃhūb ǃnâ ge ūsī te, tsî ǁîb ge kaise ǀgapi ǃhommi ai ge ǂnûi te; tsî ǁîb tawa i ge kuru-ai-i ǃās di-e ge hâ i ǃkhawagasǀî.

³Tsî ǁîb ge ǁnāpa ūsī teo, mû ob ge ǁnāpa aoba ge hâ i, īsib âb ge ǂaib di īsib khami ge ī iba, tsî ǃomǁaeb âb ǃnâ kha ge ǀgaisa ǁapatsurib tsî ǀguiroǂāb tsîkha ge hâ i; tsîb ge ǁîba ǁāb ǃnâ ge mâ i.

⁴Tsîb ge ǁnā aoba tita ge ǃhoa-ū: Khoenôa ǀgôatse, kō sa mûra ǀkha îts ǁnâu sa ǂgaera ǀkha, îts ǂgaob âtsa tita nî mû kai tsin hoan ai ǂnûi. Tita nî mû kai tsi ǃkhais ǃaromats go ūhāhe xuige, îts ǁnās khaoǃgâ Israeli ommi din hoana mûts ran hoana aoǁnâba.

⁵Tsî mû, ǂnubiǂgoab ge ǃauga ommi ǂnamipe ge hâ i, tsî aob, ǃomǁaeb ǃnâb ge ǀguiroǂāb ǃnani ǂhâgu gaxuba ūhâba ge hâ i, mâb hoab ǀgui ǂhâb tsî ǃkhareb kōse a ǂhababa, tsîb ge ǂhabasib kuru-ais diba ge ǀguiro, ǀgui ǂāb kōse, tsî gaxuba, ǀgui ǂāb kōse.

⁶ǃNubaib ge ǁnā ǁāb, aiǂoas di daobǀî ǃoa hâb tawa ge sī, tsîb ge ǃapa-ūdan dā-aihais ǁāb disa ge ǀguiro: ǀGui ǂāb kōse ǂhababa, tsî nau dā-aihaisa ǀgui ǂāb kōse ǂhababa.

⁷Tsî mâ ǃnā-oms hoasa ǀgui ǂāb kōse gaxuba tsî ǀgui ǂāb kōse ǂhababa; tsî ǃnā-omdi ǁaegu koro ǂhâgu gaxusib kōse, tsî dā-aihaib ǁāb dib, ai-ommi ǁāb dib di ǃnāba xu ǀgui ǂāb kōse.

⁸ǁKhātib ge ai-ommi ǁāb diba ǃnāba xu ge ǀguiro, ǀgui ǂāb kōse;

⁹ǃnubaib ge ai-ommi ǁāb diba ge ǀguiro, ǁkhaisa ǂhâgu gaxusib kōse, tsî ǂkhâǃnâhaigu âba ǀgam ǂhâkha gaxusib kōse, tsî ai-ommi ǁāb dib ge ǃnāba xu ge hâ i.

¹⁰Tsî ǃnā-omrodi ǁāb didi, aiǂoas di daobǀî hâdi ge nē ǀkhāba xu ǃnona tsî nau ǀkhāba xu ǃnona ge i; nē ǃnonadi ge ǀgui ǀguirob ǀguiba ge ūhâ i. ǁKhāti gu ge ǂkhâǃnâhaiga nē ǀkhāba xu tsî nau ǀkhāba xu ǀgui ǀguirob ǀguiba ge ūhâ i.

¹¹ǃAruǀîb ge harab ǁāb di dao-ams diba ge ǀguiro, disi ǂhâgu gaxusib kōse; gaxusib ǁāb diba disiǃnonaǀa ǂhâgu gaxusib kōse.

¹²Tsî ǃkhai-i ge ǃnā-omrodi aiǃâ ge hâ i ǀgui ǂhâb gaxusib kōse nē ǀkhāb tsî ǃkhai-i ǀgui ǂhâb gaxusib kōse nau ǀkhāba xu; tsî mâ ǃnā-omros hoas ge ǃnani ǂhâgu gaxusib kōse nē ǀkhāba xu tsî ǃnani ǂhâgu gaxusib kōse nau ǀkhāba xu ge sī.

¹³Ob ge ǁāba ǀgui ǃnā-oms di ǂamaisa xu naus di ǂamais kōse ge ǀguiro; ǂhabasib ge ǀgamdisikoroǀa ǂhâgu gaxusib kō ge i, dao-ams ge dao-ams ǃoa-ai ge hâ i.

¹⁴ǁKhātib ge ǂkhâǃnâhaiga ge dī, ǃnanidisi ǂhâga ūhâga, tsî ǁnā ǂkhâǃnâhaib, ai-ommi dib, ǁāb ǂnamipe hâb xōǀkhā.

¹⁵Tsî aiǃâ hâ ǃâs ǁāb, dao-ams dib disa xu aiǃâ hâ ǃnāb ǁāb, ai-ommi dib dis kōse gu ge korodisi ǂhâga ge hâ i.

¹⁶Tsî di ge ǂganamhe hâ mûǂuidaorode ǃnā-omrodi tawa ge hâ i tsî ǁî di ǂkhâǃnâhaigu tawa ǃnābǀî ǁāb ǂnamipe; ǁnās ǁkhās xase ǁkhāti ai-omgu tawa; tsî mûǂuidaorodi ge ǁîgu ǂnamipe ge hâ i, ǃnābǀî, tsî ǂkhâǃnâhaigu tawa di ge palmhaide ge hâ i.

¹⁷ǃAruǀîb ge ǁîba tita ǃaugab di ai-ommi ǃnâ ge ūsī, tsî mû, ǃnā-omdi ge hâ i tsî ǁguiǃnâb, ai-ommi di ǂnamipe ge dīhe hâ iba, ǃnonadisi ǃnā-omdi ge ǁguiǃnâb ai ge hâ i.

¹⁸Tsî ǁguiǃnâb ge ǁāgu xōǀkhā ge hâ i, gaxusib ǁāgu dib ǃoa-ai; ǁîb ge ǃnaga hâ ǁguiǃnâ ge i.

¹⁹Tsîb ge ǂhababa ge ǀguiro: Aiǃâ hâ ǃâs hoan xa ǃnaga hâ ǁâba xu, ǃnāb ai-ommi diba xu, ǃaugaba xu aiǂoasǀî tsî ǀapasǀî.

²⁰Tsî ǁnā ǁāb, ǀapasǀî ra ǂoa daob ǃauga hâ ai-ommi dib xasa, ǁîb ge gaxusib âb tsî ǂhabasib âba ge ǀguiro.

²¹Tsî ǁîb di ǃnā-omrode; ǃnonade nē ǀkhāba xu tsî ǃnonade nau ǀkhāba xu, tsî ǁîb di ǂkhâǃnâhaigu tsî ǁîb di ai-omgu ge ǂguro ǁāb di ǀguiros kō ge i. Korodisi ǂhâgu kōb ge gaxusib âba ge i tsî ǂhabasib âba ǀgamdisikoroǀa ǂhâgu gaxusib kōse.

²²Tsî mûǂuidaodi âb tsî ai-omgu âb tsî palmhaidi âb ge ǀguirob ǁnā daob, aiǂoasǀî ra ǂoab disa ǃoa ge hâ i, tsîn ge ǁîb ǃnâ hû ǃapa-ūdadi ai ge ǃapa, tsî ai-omgu âb ge ǁnān aiǃâ ge hâ i.

²³Tsî ǁāb, ǃnāb ǃnâ hâ ai-ommi dib ge ǁāb ǀapas dib tsî aiǂoas dib ǃoagu ge hâ i. Tsîb ge ǁāba xu ǁāb kōse ǀguikaidisi ǂhâga ge ǀguiro.

²⁴ǁNās khaoǃgâb ge tita daob, ǃkhawagasǀî gaub ai ge ǂgaeǂgui. Tsî mû, ǁnāpab ge ǁāba hâ ǃkhawagasǀî gau daob ai, tsî ǁîb ge ǂkhâǃnâhaigu âb tsî ai-omgu âba nē ǀguirogu ǁkhāgu ǀkha ge ǀguiro.

²⁵Tsî ǁîb ge mûǂuidaode ge ūhâ i, ai-omgu âb on tawa, ǁîgu ǂnamipe nē mūǂuidaodi ǁkhāti khami īde. Gaxub âdi ge korodisi ǂhâgu kō ge i tsî ǂhabasib âdi ǀgamdisikoroǀa ǂhâgu kōse.

²⁶Tsî ǁîb di ǃgûǃapaǃkhaidi ge hû ǃapa-ūdade ge ūhâ-i, tsî ai-omgu âb ge ǁîb aiǃâ ge hâ i, tsîb ge palmhaira ge ūhâ i, ǀguisa nē ǀkhāb ai tsî ǀnîsa nau ǀkhāb ai ǂkhâǃnâhaigu âb tawa.

²⁷ǁKhātib ge ǀnî ǁāba ǃnāb ǃnâ ge hâ i ai-ommi ǃnâ ǃkhawagasǀî gau daob ai, tsî ǁîb ge ǁāba xu ǁāb kōse ǃkhawagasǀî gau daob ai ge ǀguiro ǀguikaidisi ǂhâgu gaxusib kōse.

²⁸ǃAruǀîb ge tita ǃkhawagas di ǁāba ū ǃnāb ǃnâ hâ ai-omma ǃoa ge ūǂgâ; tsî ǁîb ge ǃkhawagas di ǁāba ge ǀnē tsî ǁîb ge ǁkhā ǀnōb ǁkhāba ge ūhâ i.

²⁹Tsî ǁîb di ǃnā-omrodi tsî ǁîb di ǂkhâǃnâhaigu tsî ǁîb di ai-omgu ge nē ǀguirogu ǁkhāgu khami ge ī i; tsîb ge mûǂuidaode ge ūhâ i, tsî ai-omgu âb on ǃnâ mâ ǃnammi hoab ai, gaxusib ge korodisi ǂhâgu kō ge i tsî ǂhababa ǀgamdisikoroǀa ǂhâgu kō ge i.

³⁰Tsî ai-omgu ge ǁîb ǂnamipe ge hâ i; gaxusib ge ǀgamdisikoroǀa ǂhâgu kō ge i, tsî ǂhababa koro ǂhâgu kōse.

³¹Tsî ai-omgu âb ge ǃgâbǀkhāb ai hâ ai-omgu tawa ge hâ i, tsî di ge ǁkhāti palmhaide ǂkhâǃnâhaigu âb tawa ge hâ i, tsî ǃgûǃapaǃkhaidi âb ge ǁkhaisa ǃapa-ūdade ge ūhâ-i.

³²ǁNās khaoǃgâb ge tita ǃnāb ǃnâ hâ ai-ommi ǃoa ge ūsī, aiǂoasǀî gau daob ai; tsî ǁîb ge ǁāba ge ǀguiro nē ǀguirogu ǁkhāgu ǃoa.

³³Tsî ǁkhāti ǃnā-omdi âb tsî ǂkhâǃnâhaigu âb tsî ai-omgu âba nē ǀguirogu ǁkhāgu ǃoa, tsîb ge ǁkhāti mûǂuidaode ge ūhâ i ǁîb di ai-omgu ǂnamipe; gaxusib ge korodisi ǂhâgu kō ge i, tsî ǂhababa ǀgamdisikoroǀa ǂhâgu kōse.

³⁴Tsî ǁîb di ai-omgu ge ǃgâbǀkhāb ai hâ ai-ommi tawa ge hâ i, tsî di ge ǁkhāti palmhaide ǂkhāǃnâhaigu âb tawa ge hâ i nē ǀkhāb ai tsî nau ǀkhāb ai; tsî ǃgûǃapaǃkhaidi âb ge ǁkhaisa ǃapa-ūdade ge ūhâ-i.

³⁵ǁNās khaoǃgâb ge tita ǀapas di ǁāb ǃoa ge ūǂoa, tsî ǁîb ge nē ǀguirogu ǃoa ge ǀguiro,

³⁶ǁîb di ǃnā-omrodi tsî ǁîb di ǂkhâǃnâhaigu tsî ǁîb di ai-omgu tsîna; tsîb ge ǁkhāti ǁîb ǂnamipe mûǂuidaode ge ūhâ i; tsî gaxusib âdi ge korodisi ǂhâgu kō ge i tsî ǂhabasib âde ǀgamdisikoroǀa ǂhâgu gaxusib kōse.

³⁷Tsî ǂkhâǃnâhaigu âb ge ǃgâbǀkhāb ai hâ ai-ommi tawa ge hâ i, tsî di ge palmhaidi ona ǂkhâǃnâhaigu âb tawa ge hâ i nē ǀkhāb ai tsî nau ǀkhāb ai; tsî ǁîb di ǃgûǃapaǃkhaidi ge ǁkhaisa ǃapa-ūdade ge ūhâ-i.

³⁸Tsî ǁîb di ǃnā-omdi tsî ǁîb di dao-amdi tsîdi ge ǁāgu di ǂkhâǃnâhaigu tawa ge hâ i, ǁnāpas ge khauǁguibasa gere ǁāhe.

³⁹Tsî ai-ommi ǁāb dib ǃnâ kha ge ǀgam ǀhankha nē ǀkhāb ai tsî ǀgam ǀhankha nau ǀkhāb ai, khauǁguibas tsî ǁoreǁguibas tsî ǀhapiǁguibas tsîdi nî ǁîgu ai ǂāhega,

⁴⁰ǁkhāti kha ge ǃgûǃapaǃkhais ǃaugab di nē ǀkhāb ai ǀapas ǁāb di daos tawa ǀgam ǀhankha ge hâ i, tsî nau ǀkhāb ai-ommi ǁāb dib tawa hâb ai ǀgam ǀhankha.

⁴¹Haka ǀhanga nē ǀkhāb ai tsî haka ǀhanga nau ǀkhāb ai ǁāb di ǀkhāb ai—ǁkhaisa ǀhangu, ǁîgu ai gere ǂāhega.

⁴²Tsî haka ǀhangu khauǁguibas digu ge ǁhā-unuhe hâ ǀuidi xa ge dīhe hâ i, gaxusib âgu ge ǀgui tsî ǃkhare ǂhâb gaxusib kō ge i, tsî ǂhabasib âgu ge ǀgui ǂhâb gaxusib kō ge i, tsî ǀgapib âgu ge ǀgui ǂhâb gaxusib kō ge i; ǁîgu ain ge sîsenūdan khauǁguibas tsî ǂāǁguibas tsîra, ǁîn ǀkha ra ǂāhena ge ǁguihe.

⁴³Tsî ǁgui-amǃgâgu ge ǃommi a ǂhabas kōse ǁau ge i, ommi tawa ǁîb ǂnamipe ǂnûiǁapohe hâse, tsî ǀhangu ais ge ǁguibas di ǁgansa ge hâ i.

⁴⁴Tsî ǃnāb ǃnâ hâ ǁāb ǃaugaba xu di ge ǁnae-aon di ǃnā-omde ge hâ i, ǃnāb di ai-ommi ǀapas ǁāb xōǀkhā hâb ǃnâ, tsî aiǃâ hâ ǃâs âdi ge ǃkhawagas ǃoa gau daobǀî ge hâ i; ǀguis ge aiǂoas ǁāb ǀapas ǃoa gau daobǀî ǃoa hâb xōǀkhā ge hâ i.

⁴⁵Tsîb ge tita ǃoa ge mî: Nē ǃnā-oms, aiǃâ hâ ǃâb âs ǀapas ǃoa gau daoba ǃoa hâs ge ǁnā pristergu, ǃûis ommi disa ra dīga hâba,

⁴⁶xawe ǃnā-oms, aiǃâ hâ ǃâb âs ǀapas ǃoa gau daobǀî ǃoa hâs ge ǁnā pristergu, ǃûis altars disa ra dīga hâba. ǁNāgu ge Sadoki di ôagu, Levib di ôan xa ǃKhūba ra ǀgūga, ǁîba gu nî ǃoabase.

⁴⁷Tsîb ge ai-omma ge ǀguiro, gaxusib âba ǀguikaidisi ǂhâgu gaxusib kōse tsî ǂhabasib âba ǀguikaidisi ǂhâgu gaxusib kōse, haka ǁhôase; tsî altars ge ommi aiǃâ ge hâ i.

⁴⁸ǃNubaib ge ǁîba tita ommi di ai-ommi ǃoa ge ūsī tsî ǁîb ge mâ ǂkhâǃnâhaib ai-ommi dib hoaba ge ǀguiro: Koro ǂhâgu gaxusib kōse nē ǀkhāb ai tsî koro ǂhâgu gaxusib kōse nau ǀkhāb ai, tsî ǂhabasib ǁāb diba ǃnona ǂhâgu gaxusib kōse nē ǀkhāb ai tsî ǃnona ǂhâgu gaxusib kōse nau ǀkhāb ai.

⁴⁹Gaxub ai-ommi diba ǀgamdisi ǂhâgu gaxusib kōse tsî ǂhababa disiǀguiǀa ǂhâgu gaxusib kōse; tsîn ge ǃapa-ūdana ge hâ i, ǁîna-ūn ra ǃapana; ǁkhāti kha ge ǂkhâǃnâhaikha ge hâ i, ǀguiba nē ǀkhāba xu tsî ǀnîba nau ǀkhāba xu.