Read Khoekhoegowab Esegieli 41 Bible Online

Esegieli 41 - Khoekhoegowab bible

Esegieli 41

¹ǃAruǀîb ge ǁîba tempeli tawa ge ūsī te, tsîb ge ǂkhâǃnâhaiga ge ǀguiro; ǃnani ǂhâgu di ǂhabasib kōse nē ǀkhāba xu tsî ǃnani ǂhâgu gaxusib kōse nau ǀkhāba xu, sail-oms di ǂhabasib ge a ǁî.

²Tsî ǂhabasib dao-ams dib ge disi ǂhâgu kō ge i, tsî ǃnamkha dao-ams dikha koro ǂhâgu gaxusib kōse nē ǀkhāba xu tsî koro ǂhâgu kōse nau ǀkhāba xu. ǁKhātib ge ǁîb di gaxuba ge ǀguiro, hakadisi ǂhâgu gaxusib kōse.

³ǁNās khaoǃgâb ge ǃnāb ǃnâ ǂgâ tsî ǂkhâǃnâhaib dao-ams diba ge ǀguiro: ǀGam ǂhâkha gaxusib kōse, tsî dao-amsa ǃnani ǂhâgu kōse tsî ǂhabasib dao-ams diba hû ǂhâgu kōse.

⁴ǁKhātib ge ǁîb di gaxuba ge ǀguiro; ǀgamdisi ǂhâgu kōse tsî ǂhabasib âba ǀgamdisi ǂhâgu kōse tempeli aiǃâbǀî. Tsîb ge tita ǁga ge mî: Nēb ge ǃanusigu di ǃanusiba.

⁵Tsîb ge ǂnubiǂgoab ommi diba ge ǀguiro ǃnani ǂhâgu gaxusib kōse; tsî ǂhabasib xōǀkhā oms hoas diba haka ǂhâgu kōse ommi hoaragab ǂnamipe.

⁶Tsî xōǀkhā-omdi ge nēsa naus ǂamǃnâ ge hâ i, ǃnonadisiǃnonaǀa ǃnādi kōse, tsî di ge ǂnubiǂgoab, ommi tawa hâb kōse ge sī ǁnā xōǀkhā-omdi, ommi tawa hâdi, ǁîb hoaragab ǂnamipe hâdi nî ǃkhōǀgaipehese, ǁîdi ge ǂnubiǂgoab ommi dib ǃnâ ǃkhōǀgaipehe tama ge hâ i xui-ao.

⁷Tsî di ge xōǀkhā-omde ǃapa rase ǃaruǀîǀgui ge hara tsî ge ǃgûǂnamipe, ommi ge ǃapa rase ǀgapisebǀî ge hâǂnamipehe hâ i xui-ao ommi hoaragab ǂnamipe; nētis ge ǃnaga hâsa ǁaegu hâsa-ū ǀgapise hâs ǃoa ge ǃapa.

⁸Tsî ta ge tita ommi di ǀgapiba ge kōǂnamipe; ǃgaoǃgaogu xōǀkhā-omdi digu ge ǀoa hâ ǂāb kōse ge ī i, ǃnani ǂhâgu gaxusib ǀguiǀguibe ǂhâb ǃgamǃnâs kōse ra sīse.

⁹ǂHapab, ǁnā ǂnubiǂgoab xōǀkhā-omde-ū ǃaugabǀî hâb dib, ge koro ǂhâgu gaxusib kō ge i, tsî ǀkhaiǃnâ ge hâ i-i, ǁî-i di xōǀkhā-omdi, ommi tawa hâdi di ǃkhai ge i.

¹⁰Tsî ǃnā-omdi ǁaegu i ge harasi-e ge hâ i ǀgamdisi ǂhâgu gaxusib kōse ommi ǂnamipe, ommi hoaragab ǂnamipe.

¹¹Tsî dao-amdi xōǀkhā-omdi didi ge ǀkhaiǃnâ kaihe hâ ǃkhai-iǀî ge hâ i, ǀgui dao-amsa ǀapas ǃoa gau daobǀî tsî nau dao-amsa ǃkhawagasǀî, tsî harasib, ǀkhaiǃnâ kaihe hâ ǃkhais dib ge koro ǂhâgu gaxusib kō ge i ǁîs hoaragas ǂnamipe.

¹²ǃAruǀî ǁnā kuru-ais ǃgaoǁnâhe hâ ǃkhais tawa huriǂoas ǃoa gau daob di ǁhôas ǃnâ hâs xasa ǁîs ge hûdisi ǂhâgu gaxusib kōse hara ge i, tsî ǂnubiǂgoab ǁnā kuru-ais dib ge koro ǂhâgu kōse hara ge i ǁîb hoaragab ǂnamipe, tsî gaxusib âb ge khoesedisi ǂhâgu kō ge i.

¹³ǃAruǀîb ge gaxusib ommi diba ge ǀguiro, ǀguikaidisi ǂhâgu gaxusib kōse; ǃgaoǁnâhe hâ ǃkhais tsî kuru-ais tsî ǁîs di ǂnubiǂgoagu on di gaxusib ǀguikaidisi ǂhâgu kōse.

¹⁴Tsî harasib, aiǃâ hâ ommi dib tsî ǃgaoǁnâhe hâ ǃkhais aiǂoasǀî ǁgoes dib ge, ǀguikaidisi ǂhâgu kōse ge gaxu i.

¹⁵ǁKhātib ge gaxusib kuru-ais dib, ǁnā ǃgaoǁnâhe hâ ǃkhais aiǃâ hâs, ǁnās ǃgâb ai ǁgoes, tsî ǁîs di ai-omdi tsîna nē ǀkhāba xu tsî nau ǀkhāba xu ge ǀguiro, ǀgui ǀguikaidisi ǂhâgu gaxusib kōse, tsî ǃnāb tempeli dib tsî ai-ommi di hâǃkhaidi tsîna.

¹⁶Dā-aihaigu tsî ǂō mûǂuidaodi tsî ai-omde ǃnona ǀkhāgu ai hâǂnamipe hân tsîna. Tsî dā-ai haib tawan ge ǃkhûǃgâhaina ge hâǂnamipe hâ i, ǃhūba xu mûǂuidaodi kōse, tsî mûǂuidaodi ge ge ǃgū-aihe hâ i,

¹⁷dao-ams ǂamǃnâ hâ-i kōse tsî ǃnāb ǃnâ tsî ǃauga hâ ommi kōse, tsî ǂnubiǂgoab hoaragab ǂnamipe tsî ǃnāb ǃnâ tsî ǃaugab ai gu ge ǀguiroga ge hâ i.

¹⁸Tsîn ge xerugu tsî palmhaidi tsîn ǀkha ge dīhe hâ i, mâ xerub hoab ǁaegus ge ǀgui palmhaisa hâ is kōse, tsî mâ xerub hoab ge ǀgam aira ge ūhâ i:

¹⁹ǁNās ge ǀgui khoe-aisa palmhais ǃoa-ai nē ǀkhāba xu, tsî ǂkham xammi di aisa palmhais ǃoa-ai nau ǀkhāba xu; ǁîn ge ommi hoaragab ǂnamipe ge dīhe hâ i.

²⁰ǃHūba xu dao-ams ǂamǃnâs kōsen ge xerugu tsî palmhaidi tsîna ge dīhe hâ i, tsî tempeli di ǂnubiǂgoab on tawa.

²¹Xōǀkhāhaigu tempeli digu ge haka ǁhôase ge ī i; tsî aiǃâ hâ ǃâs tempeli dis xasa; nē īsib ge nau īsib khami ge ī i.

²²ǀGapib altars dib ge ǃnona ǂhâgu gaxusib kō ge i tsî gaxusib âba ǀgam ǂhâkha kōse, tsîb ge ǁhôadi aba ū ge hâ i; tsî gaxusib âb tsî ǂnubiǂgoagu âb ge hai ge i. Tsîb ge tita ǁga ge mî: Nēb ge ǁnā tāb, ǃKhūb di ais aiǃâ nî hâba.

²³Tsî tempeli tsî ǃanusib tsîkha ge ǀgam dao-amra ge ūhâ i.

²⁴Tsî dao-amra ge ǀgam ǃâkha ge ūhâ i, ǀgam ǃâkha unuhe ǁkhā kha, ǀgamkha ǀgui dao-ams tawa tsî ǀgamkha naus tawa.

²⁵Tsî ǁîra, ǁnās ge tempeli di dao-amra tawan ge xerugu tsî palmhaidi tsîna ge dīhe hâ i, ǂnubiǂgoagu tawan ge dīhe hâ is ǁkhās xase. Tsî hain, ai-ommi aiǃâ hâ ǃâs ǃauga hân ge ǁau ge i.

²⁶Tsî ǂganamhe hâ mûǂuidaodi tawa di ge ǁkhāti palmhaide ge hâ i, nē ǀkhāb ai tsî nau ǀkhāb ai ai-ommi di ǃnamkha hoakha ai, tsî xōǀkhā-omdi ommi didi tawa tsî ǁau ǃnaogu tawa.