Read Khoekhoegowab Esegieli 43 Bible Online

Esegieli 43 - Khoekhoegowab bible

Esegieli 43

¹ǃNubaib ge ǁîba tita ǁāb ǃoa ge ǂgaeǂguisī, ǁnā ǁāb, aiǂoas ǃoa gau daobǀî ǃoa hâba.

²Tsî mû, ǂkhaisib Israeli Elob dib ge aiǂoas ǃoa gau daoba xu ge hā, tsî dommi âb ge ǀōb ǂgui ǁgamgu dib khami ge tsâ i, ǃhūbaib ge ge ǃnâ ǂkhaisib âb xa.

³Tsî īsib ǁnā ais, mû ta ges dib ge ǁnā ais, hîa ta ge ǃāsab nî hîǀhuruseb ge hāo a mûs khami ge ī i, tsî di ge aide ge hâ i ǁnā ais, ǃāb Kebari amǃgâ ta ge mûs ǁkhās xase īde; o ta ge tita ti ais ai ge ǁnā.

⁴Tsî ǂkhaisib ǃKhūb dib ge ǁāb di daoba-ū ge ǂgâxa, aiǂoas ǃoa gau daobǀî ǃoa hâba.

⁵Tsî Gagab ge tita ūkhâi tsî ǃnāb ǃnâ hâ ai-ommi ǃnâ ge ūsī, tsî mû, ǂkhaisib ǃKhūb dib ge omma ge ǀoaǀoa.

⁶Tsî tita ge ǀguib, omma xu tita ǀkha ra ǃhoaba ge ǁnâu, tsî aob ge ti xōǀkhā ge mâ i.

⁷Tsîb ge ǁîba tita ǃoa ge mî: Khoenôa ǀgôatse, nēs ge ǃkhais ti trons disa tsî ǃkhais ti ǂaiǃnākha disa, ǁîs ǃnâ ta tita Israeli ôan ǁaegu nî ǁansa ǀamosib kōse. Tsî ǁnān, Israeli ommi din ge ǃaruǀî ti ǃanu ǀonsa ǀuriǀuri tide, ǁîn kas, ǁîn di gao-aogu kas hoasa ǁîn di ǀaigu ǀkha tsî ǁîn di gao-aogu di ǁō hâ sorodi ǀkha ǁîn di ǀgapigu ai.

⁸ǁÎn di dā-aihaiban ge ti dā-aihaib tawa tsî ǁîn di xōǀkhāhaiba ti xōǀkhāhaib tawa mâi ǃnubai, ǀgui ǂnubiǂgoab ǀguib ge tita tsî ǁîn tsîda ǁaegu ge hâ is kōse, tsîn ge ti ǃanu ǀonsa ǁîn di ǁgaidīgu, hîan ra dīgu ǀkha ǀuriǀuri ǃnubai; ǁî ǃkhais ǃaroma ta ge tita ǁîna ti ǁaib ǃnâ ge hapu.

⁹În ǁnâi nēsi ǁîn di ǀaigu tsî gao-aogu ân di sorodi tsîna ǃnūse tita xu dībē, o ta ge tita ǁîn ǁaegub ǃnâ nîra ǁan ǀamosib kōse.

¹⁰Sats khoenôa ǀgôatse, Israeli ommi dina ǁgau nē omma, în taob xa dāhe ǁîn di ǂhanuoǃnâsigu ǃaroma, în aiǁgause kōǁnâ.

¹¹Tsî taob xan ga dāheo ǁîn ge dīn hoan xa, îts ǁnâi ǁîna ǂanǂan kurub ommi dib tsî ǁîb di īsib tsî ǁîb di ǃgûǂoadaodi tsî ǁîb di ǃgûǂgâdaodi tsî īsigu hoagu tsî ǁîb di ǂnûiǂgādi hoadi tsî ǁîb di ǂhanugu hoagu, ā, ǁîb di īsigu hoagu tsî ǁîb di ǂhanugu tsîna; îts ǁîn di mûdi aiǃâ xoa, în ǁîb di kurub hoab tsî ǁîb di ǂnûiǂgādi hoade sâu în ǁîna dī.

¹²Nēb ge ǂhanub ommi diba: ǂAob ǃhommi dib aib ge ǀkharib âb hoaba nîra hâ ǁîb ǂnamipe ǃanusin di ǃanusise. Mû, nēb ge ǂhanub ommi diba.

¹³Tsî nēgu ge ǀguirogu altars diga ǂhâgu ǃnâ, ǂhâb ge ǀgui ǂhâb tsî ǃommi a ǂhabas kōse ra sī; ǃâǃnâb ge a ǀgui ǂhâb di, tsî ǀgui ǂhâb kōseb ge a ǂhaba, tsî ǁîba ra hâǂgā ams ge ǀgui ǂhâb kōse a kai. Tsî nēb ge ǃhurib altars diba.

¹⁴Tsî ǃâǃnâb ǃhūb ai hâba xu ǃnaga hâ ǁgui-amǃgâb kōse ǀgam ǂhâkha, tsî ǂhabasib ǀgui ǂhâb, tsî ǂkhari ǁgui-amǃgâroba xu hoan xa kai ǁgui-amǃgâb kōse haka ǂhâgu tsî ǂhababa ǀgui ǂhâb.

¹⁵Tsî ǃanu ǁguibas di ǀaekhorosa haka ǂhâga, tsî ǃanu ǁguibas di ǀaekhorosa xu ǀgapisegu ge haka ǁnâga ge hâ i.

¹⁶Tsî ǀaekhoros di gaxusib ge disiǀgamǀa ǂhâgu kō ge i tsî disiǀgamǀa ǂhâgu kōse ǂhabasib âba, haka ǁhôase haka ǃnamgu âb ai.

¹⁷Tsî ǁgui-amǃgâb di gaxusib ge disihakaǀa ǂhâgu kōse, ǂhabasib âba haka ǃnamgu âb ai tsî ǁîb ǂnamipe hâ amsa ǃkhare ǂhâb kōse, tsî ǃâǃnâb ge ǁîb ǂnamipe ǀgui ǂhâb kō ge i, tsî ǃapa-ūdadi âb ge aiǂoasǀî ge hâ i.

¹⁸Tsî ǁîb ge tita ǃoa ge mî: Khoenôa ǀgôatse, nētib ra ǃKhūb ǃKhūba mî: Nēdi ge ǂnûiǂgādi altars dide, ǁîn nî dīhe tsēs ai, khauǁguibas nî ǁîs ai ǁguibahega tsî ǀaob nî ǁîs tawa ǀgapihega.

¹⁹Tsîts ge satsa Leviǁî pristergu, hîa Sadoki surib digu, tita ra ǀgūga, tib ra ǃKhūb ǃKhūba mî, tita gu nî ǃoabase, ǀgui ǁgōba nî mā, ǂkham gomaba ǁoreǁguibase.

²⁰Tsîts ge ǀaob âb xa nî ū, tsî haka ǁnâgu âb tawa nî dī tsî haka ǁhôadi ǁgui-amǃgâb didi tawa tsî ǁîb ǂnamipe hâ amǃgâb tawa; nētits ge satsa ǁîba nî ǁore-o kai tsî ǁîba nî ǂkhî kai.

²¹ǁNās khaoǃgâts ge satsa ǁgōb ǁoreǁguibas diba nî ū tsî ǁîb ge ǁîba mîmâihesa ǃkhais ommi dis, ǃanusib ǃauga hâs tawa nî khauǃkhū.

²²Tsî ǀgamǁî tsēs aits ge satsa ūo ǂkharapiriba ǁoreǁguibase nî ǁguiba, tsîn ge altarsa nî ǁore-o kai, ǁîsan ge ǁgōb ǀkha ge ǁoreo kais ǁkhās xase.

²³ǁOre-o kai toats ka ǃnubaits ge satsa ǁgōb, ūo ǂkham gomaba nî ǁguiba tsî ūo bairab gūn dib tsîna.

²⁴Tsîts ge ǁîga ǃKhūb di ais aiǃâ nî ǁguiba, tsî pristergu ge ǂō-e ǁîgu ai nî tsoro tsî ǁîga khauǁguibase ǃKhūba nî ǁguiba.

²⁵Hû tsēdi kōsets ge satsa tsēkorobe piriba ǁoreǁguibase nî ǁāǁā; ǁkhātin ge ǁgōb, ǂkham gomab, tsî bairab gūn dib tsîkha ūokha nî ǂhomi.

²⁶Hû tsēdi kōsen ge altarsa nî ǂkhî kai tsî ǁîsa nî ǃanuǃanu tsî ǁîs di ǃomkha nî ǀoaǀoa.

²⁷Tsî ǁnā tsēden ga dītoa ǃnubai i ge ǁkhaisaǁî tsēs ai tsî ǃaruǀî nîra ī, pristergu nî sadu di khauǁguibadi tsî sadu di ganganǁguibadi tsîde altars ai ǁāǁā ǃkhaisa; o ta ge tita sadu xa nîra ǃgâibahe, tib ra ǃKhūb ǃKhūba mî.