Read Khoekhoegowab Esegieli 44 Bible Online

Esegieli 44 - Khoekhoegowab bible

Esegieli 44

¹ǃNubaib ge ǁîba tita ge oa kai ǃauga hâ ǃanusib di ǁāb, aiǂoasǀî ǃoa hâba ū, tsî ǁîb ge ǂganamhe ge hâ i.

²Ob ge ǃKhūba tita ǃoa ge mî: Nē ǁāb ge ǂganamhe hâse nîra hâ, ǁîb ge ǁkhowa-amhe tide, tsî khoe-i ge ǁîba ū ǂgâ tide, ǃKhūb Israeli di Elob ge ǁîba ū ǂgâ amaga; ǁnā-amagab ge ǂganamhe hâse nîra hâ.

³Gaosab ge, gaosab a amaga ǁîb ǃnâ nî ǂnû, perebab nî ǃKhūb di ais aiǃâ ǂûga; ǁāb ai-ommi dib di daoba-ūb ge ǁîba nîra ǂgâ tsî ǁnā daob ǁkhāba-ūb ge ǁîba nîra ǂoa.

⁴ǁNās khaoǃgâb ge ǁîba ǀapas ǁāb di daoba-ū ommi aiǃâ ge ūsī te; tsî kō ta geo, mû ǂkhaisib ǃKhūb dib ge ǃKhūb di omma ge ǀoaǀoa; ǃnubai ta ge tita ais âtas ai ge ǁnā.

⁵Ob ge ǃKhūba tita ǃoa ge mî: Khoenôa ǀgôatse, ǂgaob âtsa ǁî ǃkhais ai ǂnûi îts sa mûra ǀkha mû îts sa ǂgaera ǀkha ǁnâu, tita sa ǀkha nî ǃhoan xa, ǃKhūb ommi di ǂnûiǂgādi hoadi xa tsî ǁîb di ǂhanugu hoagu xa; îts ǂgaob âtsa ommi ǃnâ ǂgâs ai ǂnûi ǃgûǂoaǃkhaidi ǃanusib didi hoadi ǀkha,

⁶îts ǁnā mâǃoaxan Israeli ommi dina mîba: Nētib ra ǃKhūb ǃKhūba mî: ǂÂu du re sadu di ǁgaidīgu hoagu xa, sadu Israeli ommi dido!

⁷ǃHao khoena du ge ūǂgâ amaga, ǂgaob ǃgaohe taman tsî ǁgans ân ǃgaohe tamana, ti ǃanusib ǃnân nî hâga, ǁîba gu nî ǀuriǀurise, ǁnāb ti omma; sadu ga ti pereb tsî kaub tsî ǀaob tsîna ǁguiba tsî ǁîn ga ti ǃgaeǀhaosa khôao sadu di ǁgaidīgu hoagu tawa,

⁸tsî sadu ga ǃûis ti ǃanu xūn disa dī tama i, tsî du ga ǀnîna ti ǃûis di ǃûi-aose mâibaseno ǃanusib ǃnâ;

⁹nētib ra ǃKhūb ǃKhūba mî: ǃHao khoe-i, ǂgaob â-i ǃgaohe tama-i tsî ǁgans â-i ǃgaohe tama-i xare-i ge ti ǃanusib ǃnâ ǂgâ tide, mâ ǃhao khoe-i Israeli ôan ǁaegu hâ-i hoa-i xa.

¹⁰Tsî Leviǁîgu, tita xu ǃnūse ge ǂgōgu Israelǁîn ra ǁhapu hîa, tita xu ǁgôa-elogu âga ge ǁhapuǃgongu ge ǁîgu di ǂhanuoǃnâsiba nîra tani.

¹¹Xawe gu ge ǁîga ti ǃanusib ǃnâ ǃoaba-aose nîra i; ǁîgu ge ǁāgu ommi digu tawa nîra ǃoaba, tsî gu ge omma nîra ǃoaba; ǁîgu ge khauǁguibas tsî ǂāǁguibas tsîra ǁaesa nîra ǂāba tsî ais ân aiǃâ nîra mâ, ǁîna gu nî ǃoabase.

¹²ǁÎna gu ǁgôa-elogu ân di ais aiǃâ gere ǃoaba, tsî Israeli ommi dina gu ge ǂhanuoǃnâsib di ǁgonǁgonǂgaose ība amaga, ǁnā-amaga ta ge ti ǃomma ǁîgu ǃoagu ge ǀhōǂui, tib ra ǃKhūb ǃKhūba mî, o gu ge ǂhanuoǃnâsib âga nîra tani.

¹³O gu ge tita ǀgū tide, pristersisa gu nî tita ǃoabase, tsî ǃanu xūn hoan xa ǃanu xūna gu nî ǀgūse, tsî gu ge taob âga nîra tani tsî ǁîgu di ǁgaidīgu, dī gu ge gu tsîna.

¹⁴ǁNā-amaga ta ge tita ǁîga ǃûis ti ommi dis di ǃûi-aose nî mâi ǁîb di ǃoabas hoas tawa, ǁîb ǃnâ dīhesa a anu xūn hoan tawa.

¹⁵Tsî Leviǁî pristergu, Sadoki ôagu, ǃûis ti ǃanusib disa gere dīgu, Israeli ôan tita xu ra ǁhapu hîa, ǁîgu ge tita nîra ǀgū, tita gu nî ǃoabase, tsî gu ge ti ais aiǃâ nîra mâ, tita gu nî kaub tsî ǀaob tsîkha ǁguibase, tib ra ǃKhūb ǃKhūba mî.

¹⁶ǁÎgu ge ti ǃanusib ǃnâ nîra ǂgâ, tsî ǁîgu ge ti tāb tawa nîra hā ǃoaba nîse, tsî ǁîgu ge ti soas ǃnâ nîra ǃûi.

¹⁷Tsî i ge nîra ī, ǁāgu ǂganagab ǃnâ hâ ai-ommi digu ǃnâ gu ga ǂgâ ǃnubai gu nî ǃuri ǃkhaib di sarana ana ǃkhaisa, xawe ǀûb ge ǁîgu ai hâ tide, ǂganagab ǃnâ hâ ai-ommi di ǁāgu ǃnâ tsî ommi ǃnā gu ga ǃoaba ǃnubai.

¹⁸ǃUri ǃkhaiǀgapadi ge danas âgu ai nî hâ, tsî ǃuri ǃkhaibǃnāsaran ge kamanagu âgu ai nî hâ, tsî gu ge aosenni ǃnâ ǃgae tide.

¹⁹Tsî ǃauga hâ ai-ommi ǃoa gu ga ǂoao, ǁnās ge ǃauga hâ ai-ommi dib ǃoa, o gu ge ǁnā saran, ǁîn ǃnâ gu ge ǃoabana nî ǂgaeǂui tsî ǁîna ǃanu ǃnā-omdi ǃnâ nî sī ǁgui, tsî gu ge ǀkhara sarana nî ǂgaeǂgā, ǁaesa gu khai tidese ǁîgu di saran ǀkha.

²⁰Tsî gu ge ǁîgu di danasa ǂkhomǃgoraǃgora tsî ǂgomasenǀhaide gaxuse ǀom kai tide, anu i a khami gu ge danadi âga nî ǂkhom.

²¹ǁKhātib ge pristeri xareba ǂauxûiba ā tide, ǃnāb ǃnâ hâ ai-ommi ǃnâ gu ga ǂgâ ǃnubai.

²²ǁKhāti gu ge ǃoataras kas, ǂhāxūhe hâs kas hoasa tarase ūbasen tide, xawe gu ge ǂkhamkhoede nî ūbasen Israeli ommi din di surib didi xa, tamas ka io, ǃoataras pristeri di ǃoatara ge isa, ǁîsa î gu ūbasen.

²³Tsî gu ge ti ǁaesa ǀgorasa nî ǁkhāǁkhā, ǃanub tsî ǀurisasib tsîkha ǁaegu hâsa, tsî ǁîna nî ǂanǂan, mâ ǀgoras ǃanuoǃnâb tsî ǃanub tsîkha ǁaegu hâ ǃkhaisa.

²⁴Tsî gu ge ǂnoaguǃkhai-e nî mâ tsî ǀgoraǃgâ, ti ǂhanugu ǃoagu ge ǁî-e nî ǀgoraǃgâ; tsî gu ge ti ǂhanugu tsî ti ǂnûiǂgādi tsîna ǂnûihe hā ǀgapiǁaegu âtagu ai nî ǃkhōǀgaipe tsî ti sâtsēde nî khai.

²⁵ǁKhātib ge ǁîgu di ǀguib xareba ǁō hâ khoe-i tawa ǂgâ tide, îb tā ǀurixa, xawe ǁgûb kas, ǁgûs kas, ǀgôas kas, ǃgâsab kas, ǃgâsas kas, hîa aob di tama ge hâ is ǃaroma gu ge ǀuriǀurisen ǁkhā.

²⁶Tsî ǃanuǃanusens âb khaoǃgân ge khoena ǁîba hû tsēde nî ǃgôaba.

²⁷Tsî ǃanusib ǃnâb ga ǂgâ tsēs ai ǃnāb ǃnâ hâ ai-ommi ǃnâ ǃanusib ǃnâb nî ǃoabase, ob ge ǁoreǁguibas âba nî ǁguiba, tib ra ǃKhūb ǃKhūba mî.

²⁸Tsî nēs ge ǁîga ǀumise nî ība: Tita ge ǁîgu di ǀumi ta. ǁNā-amaga du ge ǁîga ǂûǂûsa-e mā tide Israeli ǃnâ; tita ge ǁîgu di ǂûǂûsa ta.

²⁹ǂÛǁguibas tsî ǁoreǁguibas tsî ǀhapiǁguibas tsîde gu ge ǁîga nîra ǂû, ǁkhātin ge Israeli ǃnâ ǀâxarehe hân hoana nîra ǁîgu di.

³⁰Tsî ǂgurosan, ǂguro ǂûn hoan din tsî ǃkhōkhâiǁguibas xūn hoan dis tsî sadu di ǃkhōkhâiǁguibadi hoadi tsîn ge nî pristergu di, ǁkhāti du ge ǂgurosan sadu di tsampereb dina pristera nî mā, ǀkhaeb nî sa ommi ai sâga.

³¹ǁŌ hâ xū-i kas, ǀkhauǃāhe hâ aniǃnôa-i kas, ǀgoa-i kas hoasab ge pristera ǂû tide.