Read Khoekhoegowab Esegieli 45 Bible Online

Esegieli 45 - Khoekhoegowab bible

Esegieli 45

¹Tsî ǃhūba du ga ǀumise ǀgorao, o du ge ǃKhūba ǃkhōkhâiǁguiba-e nî ǁguiba, ǃanu ǃkhai-i ǃhūb di-e; gaxusib ge ǀgamdisikoroǀaǀoadisi ǂāgu kōse nî gaxu tsî ǂhababa ǀgamdisiǀoadisigu kōse; ǁî ǃkhai-i ge ǁî-i di ǀkharigu hoagu ǂnamipe ǃanuse nî ī.

²ǁÎgu xa gu ge korokaidisiga korokaidisigu tawa ǃanusiba nîra ība haka ǁhôase ǁîb ǂnamipe, tsîb ge korodisi ǂhâgu kōse ǃauga hâ ǃkhai-i axase nî ūhâǂnamipe.

³Nētits ge satsa nē ǀguiroba xu gaxuba nî ǀguiro, ǀgamdisikoroǀaǀoadisigu kōse tsî ǂhababa disiǀoadisigu kōse; tsî ǁî-i ǃnâb ge ǃanusiba nîra hâ ǃanun di ǃanub ǀkha.

⁴ǁÎ-i ge ǃhūba ǃanu ǃkhaise nî ība, ǁî-i nî ǁnā pristergu, ǃanusiba ra ǃoabagu, ǃKhūba nî ǃoabase ra ǀgūga hâba, tsî i ge ǁîga ǃkhaise nî ība omgu ǁga tsî ǃanu ǃkhaise ǃanusib ǁga.

⁵ǃAruǀî gu ge Leviǁîgu, ommi di ǃoaba-aogu ona ǀgamdisikoroǀaǀoadisi gaxusib tsî disiǀoadisi ǂhababa ūhâ ǃkhaisa ǁîgu dise nî ūhâ ǁîgu di ǁanǃkhaise.

⁶Tsî ǃās di ǂûǂûsa-i ase du ge koroǀoadisi ǂhababa ūhâ-i tsî ǀgamdisikoroǀaǀoadisi gaxuba ūhâ ǃkhaisa nî mā ǃanu ǃkhōkhâiǁguibas ǃoa-ai: ǁÎ-i ge Israeli ommi hoaragab dise nîra i.

⁷Tsî gaosab ge ǁîb di amǃnâsa ǃanu ǃkhōkhâiǁguibas tsî ǁîsis ǃās dis di nē ǀkhāb tsî nau ǀkhāba xu nîra ūhâ ǃanu ǃkhōkhâiǁguibas aiǃâbǀî tsî ǁîsis ǃās dis aiǃâbǀî, huriǂoas di ǁhôasa xu huriǂoasǀî tsî aiǂoas di ǁhôasa xu aiǂoasǀî, tsî gaxusib ge ǃâdi di ǀguis ǃoagu nîra hâ huriǂoas di ǀkhariba xu aiǂoas di ǀkharib kōse.

⁸Nē ǃhūb xasa: ǁÎb ge ǁnāba ǂûǂûsase nî ūhâ Israeli ǃnâ, tsî ti gaosagu ge ti ǁaesa ǃaruǀîǀgui ǁgâiǀā tide tsî ǃhūba Israeli ommi dina nîra ǁnāba ǁîn ǃhaodi ī khami.

⁹Nētib ra ǃKhūb ǃKhūba mî: ǂÂuhe go re, sago Israeli di gao-aogo, dībē ǁgaridīs tsî hîǀhurus tsîra, î go ǂhanub tsî ǂhanu-aisib tsîkha dī, î go ti ǁaesa xu sago di ǂhāǂuis ǀkha ǀû, tib ra ǃKhūb ǃKhūba mî.

¹⁰ǂHanu ǀnō-ūxūs tsî ǂhanu efab tsî ǂhanu bats tsîna du ge nî ūhâ.

¹¹Efab tsî bats tsîra ge ǀgui ǀguirob ǀguiba ūhâ nî ī, îs batsa disiǁî ǃâs xomeri disa ǃkhōǂgā tsî efab ona disiǁîǃâs xomeri disa; ǀguirob âra ge xomeri ǃoa nî ī.

¹²Tsî sekels ge ǀgamdisi gerase nî ī; ǀgamdisi sekeldi, ǀgamdisikoroǀa sekeldi tsî disikoroǀa sekeldi ge sado minase nî ība.

¹³Nēs ge ǃkhōkhâiǁguibas sadu nî ǁguibasa: ǃNaniǁî ǃâs ǀgui efab dis, ǀgui xomers ǃhorob dib; ǁkhāti du ge ǃnaniǁî ǃâs efab disa nî mā ǀgui xomersa gerstǃhorob xa.

¹⁴Olib tsî ǂnûiǂgās xasa: ǀGui bats olib dis xa du ge disiǁî ǃâs bats disa nî ǁguiba, kora xu, ǁnās ge disi batdi xa ǀgui xomersa, disi batdi a ǀgui xomer xui-ao.

¹⁵ǃAruǀî ǀgui ǁkhaob gūn dib, ǀgamkaidisin dib, ǁgamxa ǃhūb Israeli diba xu ra ǀkhība ǂûǁguibase tsî khauǁguibase tsî ganganǁguibase, ǁîn nî ǀûbagusa dībahega, tib ra ǃKhūb ǃKhūba mî.

¹⁶ǁAes ǃhūb dis hoas ge nē ǃkhōkhâiǁguibas ǃnâ nîra hâ gaosab Israeli dib ǃaroma.

¹⁷Tsî gaosab nî anu, khauǁguibadi tsî ǂûǁguibas tsî ganganǁguibas tsîdeb nî kaitsēgu ai tsî ǂkham ǁkhâgu ai tsî sâtsēdi ai mâ ǂnûihe hâ ǀgapi ǁaegu Israeli ommi digu hoagu ai ǁguiba ǃkhaisa; ǁîb ge ǁoreǁguibas tsî ǂûǁguibas tsî khauǁguibas tsî ganganǁguibadi tsîna nî dī, ǀûbagusab nî Israeli ommi dina dībaga.

¹⁸Nētib ra ǃKhūb ǃKhūba mî: ǂGuro ǁkhâb ǃnâ ǂguro tsēs ǁkhâb dis aits ge ūo ǁgōb, ǂkham gomaba nî ū tsîts ge ǃanusiba nî ǁore-o kai.

¹⁹Tsî pristeri ge ǀaob ǁoreǁguibas dib xa ū tsî nî ǁîba ommi di daodi xōǀkhāhaigu ai nî ǂkhau tsî haka ǁhôadi altars ǁgui-amǃgâb didi ai tsî daodi di xōǀkhāhaigu ǃnāb ǃnâ hâ ai-ommi digu ai.

²⁰Nētits ge ǁkhāti hûǁî tsēs ǁnā ǁkhâb dis ai nî dī ǁhapuma ra-i ǃaroma tsî gâre-i ǃaroma; nētimî du ge omma nî ǂkhîǂkhîba.

²¹ǂGuro ǁkhâb ǃnâ disihakaǀaǁî tsēs ǁkhâb dis aib ge Pasxaba nî hāba du, kaitsēs hû tsēdi disa; ǀkhuruoǃnâ peregu ge ǁîb ai nî ǂûhe.

²²Tsî gaosab ge ǁnā tsēs ǁkhās ai ǁî-aitsama tsî ǃhūb di ǁaes hoasa ǁoreǁguibas di ǁgōba nî ǁāǁāba.

²³Tsî hû tsēdi kaitsēs didi aib ge ǁîba khauǁguiba-e ǃKhūba nî ǂhomiba, hû ǁgōgu tsî hû bairagu ūogu tsîga, tsēkorobe hû tsēdi kōse, tsî ǁoreǁguiba-i pirib di-e tsēkorobe.

²⁴ǁKhātib ge ǂûǁguiba-e nî ǁāǁā, ǀgui efaba ǀgui ǁgōb tawa tsî ǀgui efaba ǀgui baib tawa tsî ǀgui hinna olib xa ǀgui efab tawa.

²⁵Hûǁî ǁkhâb ǃnâ, disikoroǀaǁî tsēs ǁkhâb dis aib ge ǁnās ǁkhās xase kaitsēs ai nî dī, hû tsēdi kōse ǁoreǁguibas khami, khauǁguibas khami tsî ǂûǁguibas khami tsî olib khami.