Read Khoekhoegowab Esegieli 46 Bible Online

Esegieli 46 - Khoekhoegowab bible

Esegieli 46

¹Nētib ra ǃKhūb ǃKhūba mî: ǁĀb ǃnâ hâ ai-ommi dib, aiǂoasǀî ǃoa hâb ge ǃnani sîsentsēde nî ǂganamsase hâ, xawe sâtsēs aib ge nî ǁkhowa-amhe; ǁkhātib ge ǂkham ǁkhâb di tsēs ai nî ǁkhowa-amhe hâ.

²Ob ge gaosaba ǁnā ǁāb ai-ommi di daoba-ū nî ǂgâ ǃaugaba xu, tsîb ge ǂkhâǃnâhaib ǁāb dib tawa nî sī mâ, tsî pristergu ge ǁîb di khauǁguibas tsî ǁîb di ganganǁguibadi tsîde nî ǁāǁā, tsî ǁîb ge nî ǀgoreǀî dā-aihaib ǁāb dib tawa tsî ǁnās khaoǃgâ nî ǂoa, xawe ǁāb ge ǃuis kōse ǂganamhe tide.

³ǁKhātis ge ǁaes ǃhūb disa dao-ams ǁnā ǁāb dis aiǃâ nî ǀgoreǀî sâtsēdi ai tsî ǂkham ǁkhâgu ai ǃKhūb di ais aiǃâ.

⁴Tsî khauǁguibas, gaosab nî ǃKhūba ǁguibas ge sâtsēs ai nî ī; ǃnani ūo ǁkhaogu tsî ǀgui ūo bairab tsîga.

⁵Tsî ǂûǁguibas ǀgui efaba bairab tawa, tsî ǁkhaogu tawas ge ǂûǁguibasa ǁîb ǃommi di hōse nî ī, tsî olib xa ǀgui hinni kōse ǀgui efab tawa.

⁶Tsî ǂkham ǁkhâb di tsēs ai ǀgui ǁgōb, ǂkham gomab, ūogu dib tsî ǃnani ǁkhaogu tsî ǀgui bairab tsîga, ǁîgu ge ūose nî ī.

⁷Tsî ǂûǁguibaseb ge ǁîba nî ǁāǁā ǀgui efaba ǁgōb tawa tsî ǀgui efaba bairab tawa, tsî ǁkhaogu tawa ǃommi âb ga hō khami; tsî ǀgui hinni olib xa ǀgui efab tawa.

⁸Tsî gaosab ga ǂûo, ob ge ǁāb ai-ommi di daoba-ū nî ǂgâ tsî ǁnā daob ǁkhāba ū ǁkhawa nî ǂoa.

⁹Tsî ǁaes ǃhūb dis ga ǃKhūb di ais aiǃâ hāo ǂnûihe hâ ǀgapi ǁaegu ai, o i ge ǀapas di daoba-ū ǀgoreǀî nîse ga ǂgâ-e ǃkhawagas ǁāb di daoba-ū ǁkhawa nî ǂoa, tsî ǃkhawagas ǁāb di daoba-ū ga ǂgâ-e ǀapas ǁāb di daoba-ū ǁkhawa nî ǂoa, ǁî-i ge ǁnā daob ǁāb dib ǁîba ūb ge ǂgâba ū ǁkhawa oa tide, tsî i ge ǂhanuse nî ǂoa.

¹⁰Tsî gaosab ga ǁîn ǁaegu ǂgâo, ǁîn ga ǂgâ ǃnubai tsî ǂoan kao, on ge ǀhûpe nî ǂoa.

¹¹ǃAruǀî kaitsēdi ai tsî ǂnûihe hâ ǀgapi ǁaegu ais ge ǂûǁguibasa ǀgui efaba ǁgōb tawa nî ī tsî ǀgui efaba bairab tawa, tsî ǁkhaogu ge ǁîb ǃommi di hōse nî ī, tsî olib xa ǀgui hinni efab tawa.

¹²Tsî gaosab ga māsenxa ǁguiba-e ǃKhūba ǁguibao, khauǁguibas kas ganganǁguibadi kas hoasa, on ge ǁāba ǁîba nî ǁkhowa-amba aiǂoasǀî ǃoa hâba, ob ge ǁîba khaiǁguibas âb tsî ganganǁguibadi âba sâtsēs aib nî dī hâ is ǁkhās xase nî dī; tsî ǁkhawab ga ǂoao, on ge ǁāba nî ǂganam, ǂoab kas khaoǃgâ.

¹³ǃAruǀîts ge tsēkorobe ǀgui ūo ǀgui kurixa ǁkhaoba ǃKhūba ǁguibase nî ǁāǁāba; mâ ǁgoas hoasats ge ǁîba nî ǂhomi.

¹⁴Tsîts ge ǂûǁguibase nî dīǀaro mâ ǁgoas hoas ai, ǃnaniǁî ǃâs efab dis tsî olib xa ǃnonaǁî ǃâs hinni disa, ǀgui tsampereb nî ǂnâ-aihega, ǂûǁguibas, ǃKhūba ǀamo ǂnûiǂgāse ra ǁguibahes ge nî ǁî hugaǀgui.

¹⁵On ge ǁkhaob tsî ǂûǁguibas tsî olib tsîna mâ ǁgoas hoas ai hugaǀgui hâ khauǁguibase nî ǁāǁā.

¹⁶Nētib ra ǃKhūb ǃKhūba mî: Gaosab ga ǀgôagu âb di ǀguiba ǀumis âb xa ǀkhaexū-e māo, o i ge ǀumis âb ase nî ī; ǀgôagu ge ǁî-e nî ūhâ, ǁî-i ge nî ǁîgu di ǀumis ase ī.

¹⁷Tsî ǀumis âb xab ga ǃgāgu âb di ǀguiba ǀkhaexū-e māo, ǁnāb ge ǁî-e ǃnorakurib kōse nî ūhâ; ǃnubai i ge ǁî-e gaosab ǃoa ǁkhawa nî oa, ǁîb di ǀumis a xui-ao, ǀgôagu âb ge ǁîsa nî ūhâ.

¹⁸Tsî gaosab ge ǀumis ǁaes dis xa xū-i xare-e ū tide, ūn hâna xub nî ǁîna ūǂuise; ǁîb di xūn ǂûn xab ge ǁîb di ôaga nî ǀumi kai, îs ti ǁaesa mâ-i hoa-i âsa tā ǁî-i ǀumisa xu ǀgaruǀgaruhe.

¹⁹ǁNās khaoǃgâb ge tita ǁga ǂgâdaos ǁāb xōǀkhā hâsa ū ǁnā ǃanu ǃnā-omdi, pristerga anuba hâdi, ǀapasǀî ǃoa hâdi ǃoa ge ūsī, tsî mû, ǁnāpa i ge ǃkhai-e ge hâ i ǃnamkha hoakha ai huriǂoasǀî.

²⁰Ob ge tita ǃoa ge mî: Nēs ge ǁnā ǃkhais, pristergu ǁîs tawa ǀhapiǁguibas tsî ǁoreǁguibas tsîra nî sâisa, tsî ǁîs tawa gu nî ǂûǁguibasa amsa, ǃauga hâ ai-ommi ǃoagu ǁîra ūǂui tidese, ǁaesa gu nî khaise.

²¹ǃNubaib ge ǁîba tita ǃauga hâ ai-ommi ǃoa ge ūsī tsî haka ǁhôadi ai-ommi didi ǃnâ ge ǂgaeǂguima, tsî mû, mâ ǁhôas ai-ommi dis hoas ǃnâ i ge ai-omro-e ge hâ i.

²²Haka ǁhôadi ai-ommi didi ǃnâ gu ge ai-omroga ge hâ i, ǀanǂoab daodi ǀkha, hakadisi ǂhâgu kō gaxusib tsî ǃnonadisi ǂhâgu kō ǂhababa ūhâga; ǁî haka ǁhôa-omrogu ge ǀgui ǀguirob ǀguib di ge i.

²³Tsî ǃgupuǂgoab ge ǁîgu ǂnamipe ge hâ i ǁî hakagu ǂnamipe, tsî sâiǃkhaidi ge ǃnaga ǃgupuǂgoagu ǂnamipe ge dīhe hâ i.

²⁴Ob ge ǁîba tita ǁga ge mî: Nēdi ge ǁnā sâiǃkhaidi, ommi di ǃoabasabegu nî ǁîdi ǃnâ ǁaes di ǂāǁguibasa sâide.