Read Khoekhoegowab Esegieli 47 Bible Online

Esegieli 47 - Khoekhoegowab bible

Esegieli 47

¹ǁNās khaoǃgâb ge tita ǁkhawa dao-ams ommi dis tawa ge ūsī, tsî mû, ǁgamgu ge dā-aihaib ommi dib ǃnaga ge dâuǂoa aiǂoasǀî, aiǃâ hâ ǃâs ommi dis ge aiǂoasǀî hâ i xui-ao; tsî ǁgamgu ge ǃnagaba xu ge dâuǁgôa amǀkhāb ommi diba xu, altars di ǃkhawagas ǀkhāba xu.

²Tsîb ge tita ǀapas ǁāb di daoba-ū ǂgaeǂguiǂui tsî ǃaugab ǃoa gau daoba-ū ge ǂgaeǂguima te, ǃauga ǁāb ǃoa ǁnā daob aiǂoas ǃoa hâbǀî, tsî mû, ǁgamgu ge amǀkhāba xu ge ǀkhī.

³Tsî ǁnā aob ra aiǂoasǀî ǂoa hîa i ge ǀguirotsuri-e ǃomǁaeb âb ǃnâ ge hâ i, tsîb ge ǀoadisi ǂhâgu kōse ǀguiro tsî ǁgamga ge xanuǃgâu kai te, o gu ge ǁgamga ǃnôara kōse ge ǃkhō te.

⁴Ob ge ǀnî ǀoadisi ǂhâgu kōse ǀguiro tsî ǁgamga ge xanuǃgâu kai te, o gu ge ǁgamga ǁgoakha kōse ge ǃkhō te; tsîb ge ǀnî ǀoadisiga ǀguiro tsî ge xanuǃgâu kai te, o gu ge ǁgamga kamanab kōse ge ǃkhō te.

⁵ǃAruǀîb ge ǀnî ǀoadisiga ge ǀguiro, ǃāb ǁîba ta ge xanuǃgâu ǁoa iba, ǁgamgu ge ǃgam ge i xui-ao, sats khoets nî tsâǃganuse ǃāb, sats khoets xa xanuhe ǁoaba.

⁶Ob ge tita ǁga ge mî: Mûts go ǁî ǃkhaisa, khoenôa ǀgôatse? ǃNubaib ge ǂgaeǂgui tsî ǁkhawa ǃāb amǃgâ ge ūsī te.

⁷Tsî kōnǃgâ ta geo, mû, ob ge amǃgâb ǃāb diba kaise haixa ge i nē ǀkhāb tsî nau ǀkhāb tsîkha hoakha ai.

⁸ǃNubaib ge ǁîba tita ǃoa ge mî: Nē ǁgamgu ge aiǃâ ǁgoe Galileab ǃoa ra dâuǂoa tsî ǂgās ǃaub dis ǃoa ra dâuǁgôa; ǁnās khaoǃgâ gu ge hurib ǃnâ ra sī; hurib ǃnâ ūǂuihe hâse gu ge ǁgamga ra ǂuru.

⁹Ā, ī i ge nîra, mâ ûitsama ǀoms gon ras hoas ge mâ ǃkhais nē ǀgam ǃārokha, ǁîs tawa nî sīs hoas tawa nîra ûi ǃkhaisa, tsî ǁnā ǃkhais ge nîra ǁauxa nē ǁgamgu nîra ǁnāpa sī xui-ao, on ge nîra ǂuru, on ge nē ǃārob ga sī ǃkhais tawa hân hoana nîra ûi.

¹⁰Tsî i ge ǁkhāti nîra ī, ǁauǃkhō-aogu ǁî ǃkhais tawa nîra mâ ǃkhaisa Engedisa xu En-Eglaims kōse; ǁnāpa di ge ǀûidi ra ǃāǂuihe ǃkhaide nîra hâ, ǁîs di ǁaub ge Kaihurib di ǁauǃnôab xase nîra ī tsî kaise nîra ǂgui.

¹¹Xawe ǂgoaxa ǃkhaidi âb tsî ǃāgu âb ge ǂuru tide, ǁîn ge nîra ǀūǁgam kai.

¹²Tsî ǃārob tawa amǃgâb âb tawan ge ǂûtanixa haiǃnôan hoan, ǂgaegu ân ǁnā tama tsî ǂûn an kā tamana nîra ǁhao, ǁkhâkorobe ge ǁîna ǀasa ǂûna nîra ūǀkhī, ǁgamgu ân ra ǃanusiba xu dâu xui-ao, tsî ǂûn ân ge ǂûse nîra ī tsî ǂgaen âna ǂgauǂgauxūse.

¹³Nētib ra ǃKhūb ǃKhūba mî: Nēb ge nîra ǀkhari, ǁîb ǁga du nî ǀumise ūbasenna disiǀgamǀa ǃhaodi Israeli didi ǃoa: Joseba ǀgam ǀumi-amǃnâra.

¹⁴Tsî du ge ǁîba nîra ǀumi, ǀguib kas naub kas hoasa, ǁîb ǂama ta ge tita ǃommi âtaba ǀhōǂuiba sadu di îga ta ge ǁîba nî mā ti; tsî nētib ge ǁnā ǃhūba nîra sadu di ǀumi kai.

¹⁵Tsî nēb ge nîra ǃhūb di ǀkhari: ǀApas ǀkhāb Kaihurib diba xu, Hetlons di daoba-ū, Hamats di ǂgâ-ams kōse tsî Sedads tawats ra sīs kōse.

¹⁶Hamats, Berotas, Sibraims, Damaskus di ǀkharib tsî Hamats di ǀkharib ǁaegu ǁgoes, Haser-Hatigons, Haurans di ǀkharib tawa ǁgoes.

¹⁷Nētib ge ǃhūǀkhariba nîra ī, huriba xu Hasar-Enons Damaskus di ǀkharise tsî ǀapasa ǀapasǀî tsî ǀkharib Hamats dib ge nēba; tsî nēs ge ǀapas di ǁhôase nîra ī.

¹⁸Tsî aiǂoas ǁhôasa du ge nî ǀguiro: Haurans ǁaeguba xu tsî Damaskus ǁaeguba xu tsî Gileadi ǁaeguba xu tsî Israeli ǃhūb ǁaeguba xu Jordanǃāb tawa, ǁnā ǀkhariba xu aiǂoas di hurib kōse; tsî nēs ge aiǂoas di ǁhôase nîra ī.

¹⁹Tsî ǃkhawagas di ǁhôasa ǃkhawagasǀî Tamarsa xu ǂnoaguǁgams Kades dis kōse; ǃaruǀî ǃārob ǁga Kaihurib kōse; tsî nēs ge ǃkhawagas di ǁhôase nîra ī ǃkhawagasǀî.

²⁰Tsî huriǂoas di ǁhôasa Kaihurib ǀkhariba xu, Hamats ǃoa-aits ra sīs kōse; nēs ge huriǂoas di ǁhôase nîra ī.

²¹Tsî du ge ǁnā ǃhūb ǁkhāba Israeli di ǃhaodi ī xase nîra ǀgoraǃā.

²²Xawe i ge nîra ī, ǁîba du nî ǀumise sado ǀgoraǃāba ǃkhaisa, tsî ǃhao khoen sadu ǁaegu nî hân, ǀgôana sadu ǁaegu nî hō hân tsîna. Tsîn ge ǁîna Israeli ôan ǁaegu ǃnae hân axase nî ība du; sadu ǀkhan ge ǀumis ǃnâ nîra amǃnâ Israeli di ǃhaodi ǃnâ.

²³ǁKhāti i ge nîra ī, ǁnā ǃhaos, ǃhao khoe-i ǁîs ǃnâ hâs ǃnâ, ǁnāpa du nî ǁî-e ǁî-i di ǀumisa mā ǃkhaisa, tib ra ǃKhūb ǃKhūba mî.