Read Khoekhoegowab Esegieli 48 Bible Online

Esegieli 48 - Khoekhoegowab bible

Esegieli 48

¹Tsî nē di ge ǀondi ǃhaodi dide: ǀApasǀî hâ ǀamsa xu Hetlonsa ǃoa gau daob xōǀkhā, Hamats tawats ra sīs kōse, Hasar-Enons Damaskus di ǀkharib ǀapasǀî Hamats xōǀkhā, ǁkhātis ge aiǂoas tsî huriǂoas di ǁhôara nî ūhâ, ǁnāpab ge Danna ǀgui amǃnâ-e nîra ūhâ.

²Tsî Danni di ǀkharib tawa aiǂoas di ǁhôasa xu huriǂoas di ǁhôas kōse Asera ǀgui amǃnâsa.

³Tsî Aseri di ǀkharib tawa aiǂoas di ǁhôasa xu huriǂoas di ǁhôas kōse Naftaliba ǀgui amǃnâsa.

⁴Tsî Naftalib di ǀkharib tawa aiǂoas di ǁhôasa xu huriǂoas di ǁhôas kōse Manaseba ǀgui amǃnâsa.

⁵Tsî Manaseb di ǀkharib tawa aiǂoas di ǁhôasa xu huriǂoas di ǁhôas kōse Efraimma ǀgui amǃnâsa.

⁶Tsî Efraimmi di ǀkharib tawa aiǂoas di ǁhôasa xu huriǂoas di ǁhôas kōse Rubenna ǀgui amǃnâsa.

⁷Tsî Rubenni di ǀkharib ai aiǂoas di ǁhôasa xu huriǂoas di ǁhôas kōse Judaba ǀgui amǃnâsa.

⁸Tsî Judab di ǀkharib tawa aiǂoas di ǁhôasa xu huriǂoas di ǁhôas kōses nî ǃkhōkhâiǁguibas, sadu nî ǁguibasa hâ, ǀgamdisikoroǀaǀoadisi ǀguiroǂāgu kō ǂhababa ūhâs, tsî gaxusib âsa nau ǃādi di ǀguis ǁkhās khami aiǂoas di ǁhôasa xu huriǂoas di ǁhôas kōse; tsî ǃanusib ge ǁîs ǁaegu nîra hâ.

⁹ǃKhōkhâiǁguibas, ǃKhūba du nî ǁguibas ge ǀgamdisikoroǀaǀoadisis kōse nî gaxu tsî disiǀoadisis kōse nî ǂhaba.

¹⁰Tsî nēs nî ǃanu ǃkhōkhâiǁguiba pristergu ǃaroma: ǀApasǀî ǀgamdisikoroǀaǀoadisis kō gaxuba ūhâs tsî huriǂoasǀî disiǀoadisis kō ǂhababa ūhâs, tsî aiǂoasǀî disiǀoadisis kō ǂhababa ūhâs tsî ǃkhawagasǀî ǀgamdisikoroǀaǀoadisis kō gaxuba ūhâsa; tsî ǃanusib ǃKhūb dib ge ǁîdi ǁaegu nîra hâ.

¹¹ǁÎs ge ǁnā pristergu, Sadoki ôagu xa khaihe hâgu ti soas ǃnâ gere ǃûigu dise nî ī, ǁnāgu, ǁhapu tama ge hâ igu, Israeli ôan ge ǁhapu ǃnubai, nau Leviǁîgu gere ǁhapu xase.

¹²Tsî ǁguibas, ǃhūb di ǃkhōkhâiǁguibas dis ge ǁîga ǃanusin di ǃanusise nî ība, Leviǁîgu di ǀkharib tawa.

¹³ǃAruǀî gu ge Leviǁîga pristergu di ǀkharigu ǃoa-ai ǀgamdisikoroǀaǀoadisi gaxuba ūhâs tsî disiǀoadisi ǂhababa ūhâsa nîra ūhâ; gaxusib hoaragab ge ǀgamdisikoroǀaǀoadisis kōse tsî ǂhababa disiǀoadisis kōse nîra ī.

¹⁴Tsî gu ge ǁîdi xa ǁamaxū tide tsî ǁkhāti ǂgurosan ǃhūb dina ǁamaǃkhuni tide, ǃKhūban ǃanusise ība xui-ao.

¹⁵Xawe ǁnā koroǀoadisidi, ǂhabasib xa ge ǃgaudi, ǁîdi ge hoan dise nîra ī ǃās di ǁanǃnâǃkhaise tsî aiǃāse, tsî ǃās ge ǁîdi ǁaegu nîra hâ.

¹⁶Tsî nēdi ge ǁîdi ǀguiro nîra ī: ǀApas di ǁhôas hakaǀoadisi tsî korokaidisi ǀguiroǂāgu kōse; tsî ǃkhawagas di ǁhôas hakaǀoadisi tsî korokaidisigu kōse; tsî aiǂoas di ǁhôasa xu hakaǀoadisi tsî korokaidisigu kōse; tsî huriǂoas di ǁhôasa xu hakaǀoadisi tsî korokaidisigu kōse.

¹⁷Tsî aiǃādi ǃās didi ge ǀapasǀî ǀgamkaidisi tsî korodisi, ǃkhawagasǀî ǀgamkaidisi tsî korodisi tsî aiǂoasǀî ǀgamkaidisi tsî korodisi, tsî huriǂoasǀî ǀgamkaidisi tsî korodisise nî ī.

¹⁸Tsî gaxusib xa ga ǃgau-i ge ǃanu ǃkhōkhâiǁguibas ǃoa-ai disiǀoadiside nîra ī aiǂoasǀî disiǀoadiside huriǂoasǀî, tsî i ge ǃanu ǃkhōkhâiǁguibas ǃoa-ai nîra ī; tsî ūǀkhīn â-i ge ǁnān, ǃāsa ra ǃoaban di ǂûse nîra ī.

¹⁹Tsî ǁnān, ǃāsa ra ǃoaban ge ǁîsa nî ǃoaba Israeli ǃhaodi hoadi dise.

²⁰ǃKhōkhâiǁguibas hoas ge ǀgamdisikoroǀaǀoadisi ǀguiroǂāgu ǀgamdisikoroǀaǀoadisiga xu nî hâ: Hakaǁhôase du ge ǃanu ǃkhōkhâiǁguibasa nî ǁguiba ǃās di ǂûǂûsas ǀkha.

²¹Tsî ǃgau ka-i ge gaosab dise nîra ī, ǃanu ǃkhōkhâiǁguibas di, nē ǀkhāb tsî nau ǀkhāba xu tsî ǃās di ǂûǂûsasa xu ǀgamdisikoroǀaǀoadisi ǀguiroǂāgu ǃkhōkhâiǁguibas digu aiǃâbǀî aiǂoas tsî huriǂoas di ǀkharib kōse, ǀgamdisikoroǀaǀoadisigu huriǂoas di ǃhūǀkharib digu aiǃâbǀî nau ǃâdi ǃoa-ai, ǁîs ge gaosab dise nîra ī, tsî ǃanu ǃkhōkhâiǁguibas tsî ǃanusib ommi dib tsîra ge ǁîdi ǁaegu nîra hâ.

²²Tsî ǂûǂûsas Leviǁîgu disa xu tsî ǂûǂûsas ǃās disa xu, gaosab di nî īs di ǁaegub ǃnâ, Judab di ǀkharib ǁaegu tsî Benjaminni di ǀkharib ǁaegus ge gaosab dise nîra ī.

²³ǃAruǀî ǃgau ge ǃhaodi xasa: Aiǂoas di ǁhôasa xu huriǂoas di ǁhôas kōse Benjaminna ǀgui amǃnâsa.

²⁴Tsî ǀkharib Benjaminni dib tawa aiǂoas di ǁhôasa xu huriǂoas di ǁhôas kōse Simeonna ǀgui amǃnâsa.

²⁵Tsî ǀkharib Simeonni dib tawa aiǂoas di ǁhôasa xu huriǂoas di ǁhôas kōse Isaskara ǀgui amǃnâsa.

²⁶Tsî ǀkharib Isaskari dib tawa aiǂoas di ǁhôasa xu huriǂoas di ǁhôas kōse Sebulonna ǀgui amǃnâsa.

²⁷Tsî ǀkharib Sebulonni dib tawa aiǂoas di ǁhôasa xu huriǂoas di ǁhôas kōse Gada ǀgui amǃnâsa.

²⁸Tsî ǀkharib Gadi dib tawa ǃkhawagas ǁhôas tawa ǃkhawagasǀî, ǁnāpab ge ǀkhariba nîra hâ Tamarsa xu ǂnoaguǁgams Kades dis kōse, ǃaruǀî ǃārob ǁga Kaihurib kōse.

²⁹Nēb ge ǁnā ǃhūb, ǀumise du Israeli ǃhaode nî ǀgoraǃābaba, tsî nēdi ge ǁîdi ǃâse nîra ī, tib ra ǃKhūb ǃKhūba mî.

³⁰Tsî nēdi ge ǃgûǂoadaodi ǃās didi ase nîra ī, ǀapas di ǁhôasa xu hakaǀoadisi tsî korodisikaidisi ǀguirogu kōse.

³¹Tsî ǁāgu ǃās digu ge ǀondi Israeli ǃhaodi didi ǃoa nîra ī: ǃNona ǁāga ǀapasǀî: ǀGui ǁāb ge nî Rubenni di, ǀgui ǁāb ge nî Judab di, ǀgui ǁāb ge nî Levib di.

³²Tsî aiǂoas di ǁhôas tawa hakaǀoadisi tsî korokaidisi ǀguirogu kōse, tsî ǃnona ǁāga: ǀGui ǁāb Joseb dib, ǀgui ǁāb Benjaminni dib, ǀgui ǁāb Danni dib tsîga.

³³Tsî ǃkhawagas di ǁhôas ge ǁkhāti hakaǀoadisi tsî korokaidisi ǀguirogu kōse nî sī tsî ǃnona ǁāga: ǀGui ǁāb Simeonni dib, ǀgui ǁāb Isaskari dib, ǀgui ǁāb Sebulonni dib tsîga.

³⁴Huriǂoas di ǁhôas ge hakaǀoadisi tsî korokaidisigu kōse nî sī tsî ǃnona ǁāga: ǀGui ǁāb Gadi dib, ǀgui ǁāb Aseri dib, ǀgui ǁāb Naftalib dib tsîga.

³⁵Nētis ge ǃāsa ǁkhaisaǀaǀoadisi ǀguiroga ǁîs ǂnamipe nîra ūhâ, tsî ǀons ǃās dis ge ǁnā tsēs ǁkhāsa xu ǃKhūb ge ǁnāpa hâ ti nîra ǂgaihe.