Read Khoekhoegowab Esegieli 5 Bible Online

Esegieli 5 - Khoekhoegowab bible

Esegieli 5

¹Tsî sats khoenôa ǀgôatse, ǀā gôa-e ū, ǂkhomgôa-i ǂkhomaogu di-ets ge nî ū, ǁî-i ǀkhats nî danas âtsa tsî ǀhaus âtsa ǂkhomai; ǁnās khaoǃgâts ge ǀnō-ūxū-e ū tsî ǁnā ǀûna nî ǀgora.

²ǃNonaǁî ǃâs ânats ge ǃās ǁaegu ǀaes ǀkha nî khauǃkhū, xāǂgās di tsēdi ga ǀoa ǃnubai; ǁnās khaoǃgâts ge ǀnî ǃnonaǁî ǃâs âna nî ū, gôab ǀkha ǁîs ǂnamipe ra ǂnauǃâ, tsî ǀnî ǃnonaǁî ǃâs ânats ge ǂoab ǃnâ nîra tsoroxū. Tita gôaba ǁîn khaoǃgâ nîra ǂgaeǂui xui-ao.

³Tsîts ge ǁkhāti ǀororon âna ū tsî nî sa sarab ǀamdi ǃnâ ǃgae.

⁴Tsîts ge ǃaruǀî ǁîn xa ū tsî nî ǁîna ǀaes di ǁaegub ǃnâ aoǂgā tsî ǀaes ǃnâ ǁîna nî khauǃkhū, ǁîna xu i ge ǀae-e nîra ǀkhī Israeli di ommi hoab ǃoagu.

⁵Nētib ra ǃKhūb ǃKhūba mî: Nēs ge Jerusalems, ǁaedi ǁaegu ta ge ǂnûisa, tsî ǃhūga ǁîs ǂnamipe.

⁶Xawes ge ǁîsa ti ǂhanuga ǁaedi ǃgâ-ai eloxoresasib ǃnâ ge ǀkharaǀkhara tsî ti ǂnûiǂgāde ǁîs ǂnamipe hâ ǃhūgu hoagu ǃgâ-ai; ti ǂhanugan ge ǁîna ge ǃharaxū, tsî ti ǂnûiǂgādi ǃnân ge ǁîna tanisen tama i xui-ao.

⁷ǁNā-amagab ra ǃKhūb ǃKhūba nēti mî: Sadu ge ǁî xūna ǁnā ǁaedi, sadu ǂnamipe hân xa ǃnāǂamsase ge dī tsî ti ǂnûiǂgādi ǃnâ du ge tanisen tama, tsî ti ǂhanuga du ge dī tama i, ā, ǁnā ǁaedi sadu ǂnamipe hâdi di ǂhanugu ǃoa du ge dī hâ i amaga;

⁸ǁnā-amagab ra ǃKhūb ǃKhūba nēti mî: Mû, tita ge nîra hāǂam du, ā, tita, tita ge nîra ǀgoraǃgâ sadu ǁaegu ǁnā ǁaedi di mûdi aiǃâ xui-ao.

⁹Tsî tita ge sadu ǁaegu nîra dī ǁnān, tātsē ta dī taman tsî tātsē ta dī tidena sadu di ǁgaidīn hoan ǃaroma.

¹⁰ǁNā-amaga gu ge ǁgûga ǀgôana nîra ǂû sadu ǁaegu tsî ǀgôan ge ǁgûga nîra ǂû, tsî tita ge sadu ǁaegu nîra ǀgoraǃgâ, tsî ta ge sadu di ǃgauron hoana ǂoadi hoadi ǃnâ nîra ǀgaruǀgaru.

¹¹ǁNā-amaga, tita a ûitsama ǃkhais ao, tib ra ǃKhūba mî: Ti ǃanusiba du ge sadu di ui-uisan hoan ǀkha tsî sadu di ǁgaiǁgaisan hoan ǀkha ǀuriǀuri amaga, ǁnā-amaga ta ge tita ǁkhāti nîra ǀoroǀoro du, tsîs ge ti mûsa ǁkhāti ǃkharesi du tide, tsî tita ge ǁkhāti ǀkhom tide.

¹²ǃNonaǁî ǃâs sadu dis ge ǂhīǁōb xa nîra ǁō tsî ǃâtsūǀkhāb xa sadu ǁaegu nîra ǁō, tsî ǃnonaǁî ǃâs ge gôab ǃnâ nîra ǁnā sadu ǂnamipe; tsî ǃnonaǁî ǃâsa ta ge tita ǂoadi hoadi ǃnâ nîra ǀgaruǀgaru, tsî tita ge sadu khaoǃgâ gôaba nîra ǂgaeǂui.

¹³ǁNātib ge ti ǁaiba nîra toa tsî tita ge ti ǁgôasiba ǁîn ai nîra sâ kai tsî nîra ǁkhaeǂgaosen, on ge nîra ǂan tita ǃKhūta ge ti ôasasib ǃnâ ǃhoa ǃkhaisa, ti ǁgôasiba ta ga ǁîna dī-ūtoa ǃnubai.

¹⁴ǁNās tawa ta ge tita sado ǃū-aisa xūse tsî ǃharaxūxūse nîra ǂnûi, ǁaedi sadu ǂnamipe hâdi ǁaegu, ǁnān ǃgû-īǀkhā ran hoan di mûdi aiǃâ.

¹⁵O kha ge ǃharaxūb tsî ǃhōb tsîkha ǁnā ǁaedi sadu ǂnamipe hâde ǁgau-aise tsî burugâxūse nî ība, tita sadu ǂama ǀgoraǃgâde ǁaib ǃnâ tsî ǁgôasib ǃnâ tsî ǁgôasa ǁkhara-ain ǃnâ nî dī ǃnubai. Tita ǃKhūta ge ǁîsa go ǃhoa.

¹⁶Tita ga tsū ǂāgu ǃâtsūǀkhāb digu, ǁgaoǁgaose iga a sî, tita nî sado gu nî ǁgaoǁgaose sîǂuiga, ǃnubai ta ge tita ǃâtsūǀkhāba sadu ǂama nî kaikai tsî sadu hais pereb disa nîra khôa.

¹⁷Ā, ǃâtsūǀkhāb tsî ǁaixa ǀgurun, hîa nî ǀgôao kai dun tsîna ta ge tita sadu ǂama nîra sî. ǁKhāti kha ge ǂhīǁōb tsî ǀaoǂnâxūb tsîkha sadu ǃnâ nîra ǃgûma, tsî ta ge tita gôaba nîra ūhāǂam du. Tita ǃKhūta ge ǁîsa go ǃhoa.