Read Khoekhoegowab Esegieli 6 Bible Online

Esegieli 6 - Khoekhoegowab bible

Esegieli 6

¹Tsî mîs ǃKhūb dis ge tita ge hāba, mî rase:

²Khoenôa ǀgôatse, sa aisa ǂnûi Israeli di ǃhomguǀî, îts ǁîga kēboba,

³îts mî: Sago Israeli ǃhomgo, ǁnâu go ǃKhūb ǃKhūb di mîsa. Nētib ra ǃKhūb ǃKhūba mî ǃhomgu ǃoa tsî ǃnomdi ǃoa tsî ǃgoarogu ǃoa tsî ǃgoaǃnāgu tsîn ǃoa: Mû, tita, tita ge gôaba sadu ǂama ra ūhā tsî tita ge sadu di ǀgapiga nîra hîkākā.

⁴ǁNās tawa gu ge sadu altarde nîra hîǀhuruhe tsî sadu sore-īga nîra khôahe, tsî tita ge sa ǂnauǃanhesana sa ǁgôa-elogu di ais aiǃâ nîra aoǁgui.

⁵Tsî tita ge ǁō hâ sorodi Israeli ôan dide ǁgôa-elogu ân di ais aiǃâ nîra ǁgui, tsî tita ge sadu ǂkhōga sadu altardi ǂnamipe nîra tsoromâi.

⁶Sadu ǁanǃkhaidi hoadi ǃnâ di ge ǃāde nîra hîǀhuruhe tsî ǀgapiga nîra ǃū-aisa ǃkhai kai, sadu altardi nî ǃū-aisa tsî ǁnāxūhe hâse, tsî sadu ǁgôa-elogu nî khôahe tsî toase, tsî sadu sore-īgu nî ǁhāǁnâhese, tsî sadu sîsengu nî ǀarihese.

⁷Tsî ǃkhamdanhe hân ge sadu ǁaegu nîra ǁgoe, ǂan du nîga tita a ǃKhū ǃkhaisa.

⁸O ta ge tita gorose ǃâro-e nîra ǃgau kai ǀnîn gôaba ǁaedi ǃnâ ge ûixūna du ga ūhâo, sadu ga ǃhūgu ǃnâ ǀgaruǀgaruheo.

⁹ǃNubain ge sadu di ûiǂoa hâna tita xa nîra ǂâi, ǁaedi ǁîn ǃoa ge ǃkhōsase ūǃgûhedi ǁaegu, tita ǁîn di ǀaixa ǂgaob tita xu ge ǁnāǁgôab, tsî ǁîn di mûdi, ǁgôa-elogu âna ge ǀaiǃgondi tsîna nîra khôa ǃnubai, on ge ǁîn ǃnâ aitsama uixa ǁnā ǂkhabasin, hîan ge ǁgaidīn ân hoan ǃnâ gere dīn ǂama.

¹⁰Tsîn ge nîra ǂan, tita a ǃKhū ǃkhaisa; tita ge ǁause ǃhoa tama hâ, nē ǂkhabab hoaba ta nî ǁîna dī-ū ǃkhaisa.

¹¹Nētib ra ǃKhūb ǃKhūba mî: ǂNau sa ǃommi ǀkha, îts ǂnāǀgam sa ǂais ǀkha, îts: Okha, ti mî, ǁnā ǁgaidīn Israeli ommi di ǂkhabasigu din hoan ǂama, ǁîn ge gôab xa tsî ǃâtsūǀkhāb xa tsî ǂhīǁōb xa nîra ǁō xui-ao.

¹²ǃNūse ga hâ-i ge ǂhīǁōb xa nîra ǁō, tsî ǀgūse ga hâ-i ge gôab xa nîra ǁnā, tsî ǃgau ka-i tsî xāǂgāhe ka-i ge ǃâtsūǀkhāb nîra ǁō. Nēti ta ge tita ti ǁgôasiba ǁîna nî dī-ūtoa.

¹³ǃNubai du ge nî ǂan tita a ǃKhū ǃkhaisa, ǂnauǃanhesan ân ga ǁîn di ǁgôa-elogu ǁaegu ǁîn di altardi ǂnamipe hâo mâ ǀgapi ǃnomdi hoadi ai tsî mâ ǂaodi ǃhomgu didi hoadi ai tsî mâ ǃam hais hoas ǃgao, mâ ǃkhai-i ǁî-i tawan ge ǁîn di ǁgôa-elogu hoaga ǃgâihamxūna ǁguiba-i hoa-i ai.

¹⁴ǁNā-amaga ta ge tita ti ǃomma ǁînǀî nîra ǀhōǂui tsî ǃhūb âna nîra ǃū-aisa kai, ā, ǃgaroǃhūb Diblatsǀî ǁgoeb ǃgâ-ai ta ge ǁîba nî ǃū-aisa kai ǁîb di ǁanǃkhaidi hoadi ǃnâ, on ge nîra hōǃâ, tita a ǃKhū ǃkhaisa.