Read Khoekhoegowab Esegieli 7 Bible Online

Esegieli 7 - Khoekhoegowab bible

Esegieli 7

¹ǁNās khaoǃgâs ge ǃKhūb di mîsa ge hāba te, mî ra ǃâ:

²ǃAruǀî, sats khoenôa ǀgôatse, nētib ra ǃKhūb ǃKhūba mî Israeli di ǃhūb xa: ǀAms ge go hā, ǀams ge haka ǁhôadi ǃhūb didi ǂama go hā.

³Nēsis ra ǀamsa sats ǂama hā; tita ge ti ǁaiba sa ǃoagu nîra sî, tsî tita ge satsa nîra ǀgoraǃgâ sa daogu ǃoa, tsî tita ge sa ǁgaidīn hoana sa ai nîra ūhā.

⁴Tsî ti mûs ge satsa ǃkharesi tide tsî tita ge ǀkhom tide; tsî ta ge daogu âtsa sa ai nîra ūhā, tsî ǁgaidīn âts ge sa ǁaegu nîra hâ, tsî sadu ge nîra ǂan tita a ǃKhū ǃkhaisa.

⁵Nētib ra ǃKhūb ǃKhūba mî: Tsū-i ǀgui-i, tsū-i ǀgui-i, mû, ǁî-i ge go hā.

⁶ǀAms ge go hā, ǁnā ǀams ge go hā, ǁîs ge go ǃnoaǂkhaiǂam tsi, mû, tsûb ge go hā.

⁷ǁGoas xats ge go hāǂamhe, sats ǁansabets ǃhūb ditse. ǁAeb ge go hā, tsēs gongonǃnâs dis ge go hāǀgū, tsî dâ-i ǃhomgu di-i xare-i ge a ǀkhai.

⁸O ta ge tita nēsi ǀase ti ǁgôasiba nîra ǁhōǂui tsî ti ǁaiba sa ǃoagu nîra ūǀkhī tsî nîra ǀgoraǃgâ tsi sa daogu ǃoa tsî nîra ūhāǂam tsi sa ǁgaidīn hoana.

⁹Ti mûs ge ǃkharesi tide, tsî tita ge ǀkhom tide, tita ge sado nîra mā sadu di daogu ǃoa, tsî sadu ǁgaidīn ge sadu ǁaegu nîra hâ, tsî sadu ge nî ǂan, tita a ǁnā ǃKhū, ǂnau ra ta ǃkhaisa.

¹⁰Mû, tsēsa mû, ǁîs ra hā, ǁgoas ge go ǁgoa, hais ge go ǃkhā, ǃgurisib ge go ǃam.

¹¹ǀGaidīs ge go eloxoresasib di hai kai, xū-i xare-i ge ǁîn xa ǃgau tide tsî ǁîn di ǂguib xa tsî ǁîn di ǂkhupib xa, tsî ǃgâi-i xare-i ge ǁîn ǂama nîra ǀkhai.

¹²ǁAeb ge go hā, tsēs ge go ǀgū, ab ǁama-aoba tā ǃgâiaǂgao, îb ǁamaxū-aoba tā ǃoa, khau hâ ǁaib ǁîn di ǂguib ǃhūb dib hoab ai ra hā xuige.

¹³ǁAmaxū-aob ge ǁamaxūhe hâ-i ǃoa oa tide, ganupeb ga ûib âba ûitsaman ǁaegu hâ xawe; ais ǁîn di ǂguib hoab dis xasa, ǁîs ge oa tide, tsî khoe-i xare-i ge ǂhanuoǃnâsib â-e xu ǁî-i di ûiba ǀgaiǀgai tide.

¹⁴ǁÎn ge xâiǁnâs ǀkha ge xâi, tsî xūn hoana ge ǁāǁā, xawe khoe-i xare-i ge ǃkhams ǁga ǂoa tama, ti khau hâ ǁaib ǁîn di ǂguib ǃhūb dib hoab ai hâ xui-ao.

¹⁵Gôab ge ǃauga hâ tsî ǂhīǁōb tsî ǃâtsūǀkhāb tsîkha ge ǃnāb ǃnâ hâ; ǃaub ai ga hâ-i ge gôab xa nîra ǁō, tsî ǃās ǃnâ ga hâ-i ge ǃâtsūǀkhāb tsî ǂhīǁōb xa nîra dītoahe.

¹⁶Tsî ǃkhoe-ûi kan ge nîra ûi, xawen ge ǃhomgu ai nîra hâ, ǁîn hoan ge ǂnabun ǃgoaǃnāgu din khami nîra ī, hoatsama ra āǃâ, mâ-i hoa-i ǁî-i di ǂhanuoǃnâsib ǃaroma.

¹⁷ǃOmgu hoagu ge nîra ǃopo, tsî ǁgoadi hoadi ge ǁgammi axase nîra dâuǃari.

¹⁸Tsîn ge ǁkhāti ǁhōga nîra ana tsî ǀkhūb xan ra ǃgū-aihe, tsî aidi hoadi aib ge taoba nîra hâ tsî danadi hoadi ai ǃgorasiba.

¹⁹ǁÎn ge ǀhaiǀurib âna daogu ai nîra aoǂui, tsî ǃhuniǀurib ân ge ǃanuoǃnâsise nîra i, ǁîn di ǀhaiǀurib tsî ǁîn di ǃhuniǀurib tsîkha ge ǁîna huiǂui ǁoase nîra ī, ǁgôasib ǃKhūb dib di tsēs ai; ǁîn di ǀomsan ge ǁâǁâ tide, tsî ǃnāxūn ânan ge ǀoaǀoa tide, ǁîs ge ǁîna ǃnôa-aixū-i ǂhanuoǃnâsib di-i ase nîra ība xui-ao.

²⁰Tsî ǁîb ge îsasib ǁîb di anixūb diba anusise ge ǂnûi, xawen ge ǁîna ǁîs ǃnâ īsigu ǁîn di ǁgaidīn tsî ǁîn di ûi-ûis diga ge dībasen; ǁnā-amaga ta ge tita ǁî ǃkhaisa ǁîna ǃanuoǃnâsise ge ǂnûiba.

²¹Tsî tita ge ǁîna ǃhaokhoen ǃomǁae ǁkhâuǁnâse nîra māǁnâ tsî eloxoresan ǃhūbaib dina ǃnarixūse, tsîn ge ǁîsa nîra ǀuriǀuri.

²²Tsî tita ge ti aisa ǁkhāti ǁîna xu ūdawa, on ge ti ǁuiba nîra ǀuriǀuri, tsîn ge ti ǂganǃgâsa ǃkhaisa nîra ǀuriǀuri, ǁgari-aon ge ǁîs ǃnâ nîra ǂgâ tsî ǁîsa nîra ǀuriǀuri.

²³ǁKham-e dībasen, ǃhūb ǀaobǀgoraǃgâdi xa ǀoa hâ tsî ǃās ǁgaridīs xa ǀoa hâ xuige.

²⁴ǁNā-amaga ta ge tita hoan xa ǂkhaban ǁaedi dina nîra hā kai, ǁîn di omde ǀumise nîra ūhâna, tsî ta ge ǃgurib ǀgaisan diba nîra ǀû kai, tsî ǁîna ga khain, ǁîn ge nîra ǀuriǀurihe.

²⁵ǂŌǂōsib ga hā, on ge ǂkhîba nîra ôa, xawe ǁîb ge nîra ǀkhai.

²⁶ǁGaoǁgaosasib ge ǁgaoǁgaosasib ǂama nîra hā, tsî gommi ge gommi ai nîra hā. ǃNubain ge ais kēbo-aob disa nîra ôa, xawe ǂhanub ge pristera xu nîra kā tsî ǀapesa kaiga xu.

²⁷Gao-aob ge nîra ǃoa, tsî gaosigu ge hîkākāsiba nîra ana, tsî ǃomgu ǃhūb di ǁaes digu ge nîra ǃopo; tita ge ǁîna ǁîn daob ǃoa nî dī-ū, tsî ǁîn di ǂhanugu ǀkha ta ge tita ǁîna nîra ǀgoraǃgâ, tsîn ge ǁîna nî ǂan tita a ǃKhū ǃkhaisa.