Read Khoekhoegowab Esegieli 8 Bible Online

Esegieli 8 - Khoekhoegowab bible

Esegieli 8

¹Tsî i ge ǃnaniǁî kurib ǃnâ ǃnaniǁî ǁkhâb ǃnâ koroǁîtsēs ǁkhâb dis ai ge ī, tita ti oms ǃnâ ǂnôa tsî kaigu Judab digu ti ais aiǃâ ǂnôa hîab ge ǃommi ǃKhūb ǃKhūb diba ti ai ǁnā ǃkhaisa.

²ǃNubai ta ge ge kō tsî mû, īsi-i khami ī-e, īsib ǁîb di kamanab dib tsî ǁnāpa xu ǃnaga i ge ǀae ge i, tsî ǁîb di kamanaba xu, tsî ǀgapise i ge ǂkhaisi-i Hasmali di ǀûb khami i ge i.

³Tsîb ge ǃommi khami ī xū-e ǀhōǂui, tsî ti danas di ǀûn tawa ge ǃkhō te, tsî Gagab ge tita ǃhūb tsî ǀhommi tsîkha ǁaegu ge ǂgaeǂgui, tsîb ge aidi Elob didi ǃnâ Jerusalems tawa ge ūsī te ams ǃnāb ǃnâ hâ ai-ommi di ǁāb, ǀapasǀî ǃoa hâb dis tawa, ǁnāpas ge ǂnûǃkhais tauxasib di īb tauxa kai rab disa ge hâ i.

⁴Tsî mû, ǂkhaisib Israeli Elob dib ge ǁnāpa hâ, ǁnā īb, ǃgoaǃnāb ǃnâ ta ge mûb xase ība.

⁵Tsîb ge ǁîba tita ǁga ge mî: Khoenôa ǀgôatse, ǃgapakhâi ǀapas ǀkhāb ai ǁgoe daobǀî. O ta ge ǀapas ǀkhāb ai ǁgoe daobǀî ge ǃgapakhâi, tsî mû, ǀapasǀî altars di ǁāb tawab ge īb tauxasib diba ge hâ i ǂgâdaos ǃnâ.

⁶Ob ge ǁîba tita ǃoa ge mî: Khoenôa ǀgôatse, mûts ra xare ǁîn ra dīna ǁnā kai ǁgaidīn, Israeli ommi din nēpa ra dīna, tita nî ti ǃanusiba xu ǃnūse bēga? Xawets ge ǁkhawa ǀnî kai ǁgaidīna nîra mû.

⁷Nētib ge ǁîba tita ai-ommi di dao-ams tawa ge ūsī. ǃNubai ta ge ge kō tsî mû, ǁhū-i ge ǂnubiǂgaob ǃnâ hâ.

⁸Ob ge ǁîba tita ǃoa ge mî: Khoenôa ǀgôatse, ǁnā ǂnubiǂgoaba khaoǃkhopa. O ta ge ǁnā ǂgoaba ge khaoǃkhopa tsî mû, ǁnāpas ge dao-amsa ge hâ i.

⁹ǃNubaib ge ǁîba tita ǃoa ge mî: ǂGâ îts kō ǁnā ǂkhaba ǁgaidīn, nēpan ra dīna.

¹⁰O ta ge ǂgâ tsî ge kō tsî mû, mâ īsin ǂhanaben tsî ui-uisa ǀgurun din hoan tsî Israeli ommi di ǁgôa-elogu hoagu din ge ǂnubiǂgoab ai ge xoahe hâ i.

¹¹Tsî hûdisi aogu Israeli ommi di kaigu digu ge Jaasanjab, Safanni ôab, ǁîn ǁaegu mâb ǀkha ǁîgu di aidi aiǃâ ge mâ i, tsî mâb hoab âgu ge ǁîb di ǀanǀansoasa ǃomǁaeb âb ǃnâ ge ūhâ i tsî ǃnāǂamsa ǀnanus ǀanǀans dis ge ge ǃapa.

¹²ǃNubaib ge ǁîba tita ǃoa ge mî: Mûts go xare khoenôa ǀgôatse, kaigu Israeli di ommi digu ǃkhaenas ǃnâ ra dīna, mâb hoaba ǁîb di ī-īhe hâ ǃnā-omdi ǃnâ? ǁÎn ǃKhūb ge sida mû tama hâ, ǃKhūb ge ǃhūba ǁnāxū hâ ti ra mî xui-ao.

¹³Ob ge ǁîba tita ǁga ge mî: Sats ge ǁkhawa ǀnî kai ǁgaidīn, dīn rana nîra mû.

¹⁴Ob ge ǁîba tita dao-ams ǃKhūb ommi di ǁāb dis, ǀapasǀî hâs tawa ge ūsī tsî mû, ǁnāpa di ge tarade ge ǂnôa i, Tamuba ra ābade.

¹⁵Ob ge ǁîba tita ǃoa ge mî: Mûts go xare, sats khoenôa ǀgôatse? Sats ge ǁkhawa ǀnîn nēn ǃgâ-ai kai ǁgaidīna nîra mû.

¹⁶Ob ge ǁîba tita ai-ommi ǃKhūb ommi dib di ǃnāb ǃnâ ge ūǂgâ, tsî mû, dao-ams ǃKhūb di tempeli dis tawa ai-ommi tsî altars ǁaegu, ǁnāpa gu ge ǀgamdisikoroǀa aoga ge hâ i, ǁîgu di ǃgâgu ge tempeliǀî tsî aidi âgu ge aiǂoasǀî ge hâ i, tsî ǁîgu ge aiǂoasǀî ge ǃgamǃgâsen sores aiǃâ.

¹⁷Ob ge ǁîba tita ǃoa ge mî: Mûts go xare sats khoenôa ǀgôatse? Xū-i Judab ommi xa nē ǁgaidīn nēpan ra dīn ǃgâ-ai supuse ra ūhe-e hâ-e xare? ǃHūban ga ǀgaidīs ǀkha ǀoaǀoao, on ra ǃhoba, titan nî ǁaiǁaise, tsî kō, ǁîn ra ǂauxûiǂgonaba ǂguis ân tawa ǁgui.

¹⁸ǁNā-amaga ta ge tita ǁkhāti ti ǁgôasib ǃnâ nî sîsen, ti mûs ge sâu tsî ǃkharesi tide, ti ǂgaera aiǃân ga ǃgari dommi ǀkha ǂgai xawe ta ge ǁîna ǁnâu tide.