Read Khoekhoegowab Esegieli 9 Bible Online

Esegieli 9 - Khoekhoegowab bible

Esegieli 9

¹ǁNās khaoǃgâb ge ti ǂgaera aiǃâ ǃgari dommi ǀkha ǂgai tsî ge mî: A gu ǀgū ǃās di mûǂamaoga, îb mâb hoaba hîkākās di sîsenūdab ǀkha ǀgū.

²Tsî mû, o gu ge ǃnani aoga ǁnā ǀgapi ǁāb, ǀapasǀî ǃoa hâb di daoba-ū ge ǀkhī, mâb hoab âgu hîkākās di sîsenūdab âba ǃomǁaeb âb ǃnâ ūhâse, tsî ǀgui aob, ǁîgu ǁaegu hâb ge ǀgaisa ǃuri ǃkhaiba anasen hâ tsî xoa-aob di xoa-ūǁgam-i di soaro-i ge kamanab âb tawa ge hâ i. Tsî gu ge ǂgâ tsî ǂai-altars tawa sī ge mâ.

³Ob ge ǂkhaisib Israeli Elob diba xerub, ǁîb aib hâba xu ge khâi ommi ǁāb di dāǃkhais ǁga, ob ge ǁîba ǁnā aob ǀgaisa ǃuri ǃkhaiba anasen hâb, xoa-aob di xoa-ūǁgam-i di soarosa kamanab âb tawa ūhâbǀî ge ǂgai.

⁴Ob ge ǃKhūba ǁîb ǃoa ge mî: ǃGûǃganu ǃās di ǁaeguba tsî Jerusalems di ǁaeguba, îts sao-e ǂnûi ǁnā khoen, ǀhâimâinǀom tsî ra ǃgaen ǁnā ǁgaidīn, ǁîs ǁaegu ra dīhen ǂama.

⁵Xawe naugu ǃoab ge ti ǂgaera ǃnâ ge mî: ǃGûǃganu ǃāsa ǁîb khaoǃgâ, î go ǂnau îs sago di mûsa tā ǃkharesi, î go tā ǀkhom.

⁶Î go ǃgam kairan tsî ǂkhamkhoegu tsî ǂkhamkhoedi tsî ǀgôaron tsî taradi tsîna hîkākā go nîs kōse, xawe tā ǀgū khoe-i, saos ǁî-i ai hâ-e, î go ti ǃanusib tawa tsoatsoa. O gu ge ǁnā kaira aogu ommi aiǃâ hâgu tawa ge tsoatsoa.

⁷Ob ge ǁîba ǁîgu ǃoa ge mî: Omma ǀuriǀuri, î go ai-omga ǂnauǃanhe hân ǀkha ǀoaǀoa, î go ǃgûǂoa. O gu ge ǃgûǂoa tsî ǃās ǃnâ ge ǃgam.

⁸Tsî i ge ge ī, ǁînan ge ǃgam tsî tita ǃgau ǃnubai ta ge tita ti ais ai ǁnā tsî ǂgai tsî mî ǃkhaisa: Okha ǃKhūtse, ǃKhūtse, ǃgauran Israeli din hoanats kha nî hîǀhuru sa ǁgôasiba Jerusalems ǂama ra ǁhōǂuise?

⁹ǃNubaib ge ǁîba tita ǃoa ge mî: ǂHanuoǃnâsib Israeli ommi dib tsî Judab ommi dib ge îbe a kai, tsî ǃhūb ge ǀaob xa ǀoa hâ, tsî ǃās ge ǁnāǁgôas xa ǀoa hâ, ǃKhūb ge ǃhūba ge ǁnāxū, tsî ǃKhūb ge mû tama hâ tin ra mî xui-ao.

¹⁰ǁNā-amaga tita on xasa: Ti mûs ge ǃkharesi tide tsî tita ge ǀkhom tide; tita ge ǁîn di daoba danas ân ai nîra mā.

¹¹Tsî mû, ǁnā aob ǀgaisa ǃuri ǃkhaiba anasen hâb, kamanab âb tawas xoa-ūǁgam-i di soarosa hâb, ǁîb ge amsa ǁkhawa ūhā tsî: Tita ge go dī, sats ge tita mîmā xase, ti ge mî.