Read Khoekhoegowab Danieli 1 Bible Online

Danieli 1 - Khoekhoegowab bible

Danieli 1

¹ǃNonaǁî kurib Jojakimmi Judab gao-aob di gaosis dib ǃnâb ge Nebukadnesari, Babilons di gao-aoba, Jerusalems tawa hā tsî ge xāǂgā si.

²Tsî ǃKhūb ge Jojakimmi, Judab di gao-aoba, ǁîb ǃomǁae ge mā tsî soadi Elob ommi didi di ǃâba; tsîb ge ǁîde ǃhūb Sinari ǃoa ǁîb Elob di ommi ǃnâ ge ūsī; tsîb ge soade Elob âb di ǁui-ommi ǃnâ ge ūǂgā.

³Tsî gao-aob ge Aspenab, omǃoabasabegu âb di ǂamsab ǃoa ge mî, îb ǀnîgu Israeli ôan diga ǀkhī-ū, ti, gao-aosi suriba xu ge ǀkhīga tsî gao-aob ôagu diga.

⁴ǀGôagu îsa tsî ūo aisa ūhâgu, tsî gā-aisib hoab ǃnâ ǁnâuǃāxagu tsî ǂans ǃnâ hōǃâxagu tsî ǀoa hâ ǁnâuǃāba ūhâgu tsî ǁkhāsiba ūhâgu, gao-aob di î-ommi ǃnâ gu nî mâ ǁkhāse; î gu Xaldeaǁîn di ǂkhanidi tsî gowab ǃnâ ǁgauǃnâhe ǁkhā.

⁵Tsî gao-aob ge ǁîga ge mîmā, tarexūna gu nî tsēkorobe gao-aob ǂûn di ǃâdi xa tsî āxūn âb di ǂauxûib xa māhe ǃkhaisa, î gu ga ǃnona kurigu kōse ǁnāti kaikaihe, î gu ga ǁîgu di ǀams ai gao-aob di ais aiǃâ hā mâ, ti.

⁶ǁÎgu ǃnâ gu ge Judab ôan digu xa Danieli, Hananjab, Misaeli tsî Asariab tsîga ge hâ i.

⁷Tsî omǃoabasabegu di ǂamsab ge ǁîga ǀkhara ǀonde ge mā, tsîb ge Daniela Belsasar tsî Hananjaba, Sadrax tsî Misaela Mesax tsî Asariaba Abednego ti ge ǂgai.

⁸Tsî Danieli ge ǂgaob âb ǃnâ ge ǂâibasen, gao-aob ǂûn di ǃâdi tsî ǁkhāti āxūn âb di ǂauxûib ǀkhab ǀuriǀurisen tide ǃkhaisa; ǁnā-amagab ge ǂamsab omǃoabasabegu diba ge ǂgaoǀkhā, îb ga tā ǀuriǀurisen kaihesa.

⁹Tsî Elob ge Daniela ǀkhommi tsî ǀkhomxaǂgaosib tsîkha ge mā omǃoabasabegu di ǂamsab aiǃâ.

¹⁰Ob ge ǂamsab omǃoabasabegu diba Danieli ǃoa ge mî: Tita ge ti ǀhonkhoeb gao-aoba ra ǃao, sago di ǂûn tsî āxūna ge mîmāba; tarexab kha ǁnâi ǁîba sago di aide ǁnā ǀgôagu sago di ǁhāgu didi xa ǃoa hâ ǃkhaisa nî mû? Nēti go kom ti danasa gao-aob tawa nî ǀhapixa kaio.

¹¹ǃNubaib ge Daniela Melsari, omǃoabasabegu di ǂamsab xa Danieli, Hananjab, Misaeli tsî Asariab tsîgu ǂama ge mâiheb ǃoa ge mî:

¹²ǁNâi disi tsēdi kōse sa ǃgāge ǀkha dītsâ, ī ge tsorohe hân xa ǂû, î ge ǁgam-i xa ā.

¹³Î gu sige di īsiga sa ais aiǃâ kōhe tsî īsib ǁnā ǀgôagu, gao-aob ǂûn di ǃâdi xa ra ǂûgu diba, îts ǁnâi sa ǃgāge ǀkha sats nî mû khami dī.

¹⁴ǃNubaib ge ǁîga nē ǃkhais ǃnâ ge ǁnâu tsî disi tsēdi kōse ǁîga ge ǃâitsâ.

¹⁵Tsî disi tsēdi di ǀunis ai i ge ge mûhe, ǁîgu di īsigu ge ǁnā ǀgôagu, gao-aob ǂûn di ǃâdi xa ra ǂûgu hoagu digu xa îsa tsî ǁganxa i ǃkhaisa.

¹⁶ǃNubai i ge ge ī, Melsari ge ǁîgu ǂûn di ǃâdi tsî ǁîgu āxūn di ǂauxûiba ūbē ǃkhaisa, tsîb ge ǁîga tsorohe hân xa ge mā.

¹⁷Ob ge Eloba nē haka ǀgôaga ǂans tsî ǁnâuǃāb tsîna ge mā ǂkhanidi hoadi ǃnâ tsî gā-aisib ǃnâ; xawe Danielab ge ǁîba ǁnâuǃāba ge mā aidi tsî ǁhapodi hoadi ǃnâ.

¹⁸Tsî ǁnā tsēdi gao-aob ge îgu ǁîdi ai ūǂgâhe ti a mîmādi di ǀunis aib ge omǃoabasabegu di ǂamsaba ǁîga Nebukadnesari di ais aiǃâ ge ūsī.

¹⁹Ob ge gao-aoba ǁîgu ǀkha ge ǃhoa tsî ǁîgu hoagu ǃnâb ge ǀnîb xareba hōhe tama ge i, Danieli, Hananjab, Misaeli tsî Asariab tsîgu khami ība; o gu ge ǁîga gao-aob di ais aiǃâ sī ge mâ.

²⁰Tsî ǁnâuǃāxa gā-aisib hoab, gao-aob ǁîga ǁîgu xa ge dîb di ǃkhaidi ǃnâb ge ǁîga disi ǃnādi kōse ǃgaidī-aogu tsî ǀgamirokō-aogu, ǁîb di gaosis hoas ǃnâ hâgu hoaga ǃnā hâse ge hō.

²¹Danieli ge ǂguro kurib gao-aob Koreb dib kōse ge hâ.