Read Khoekhoegowab Danieli 10 Bible Online

Danieli 10 - Khoekhoegowab bible

Danieli 10

¹ǃNonaǁî kurib Koreb, Persiab gao-aob dib ǃnâb ge Danieli, Belsasar ti ǀon hâba ǃkhai-e ge ǂhaiǂhaibahe, tsî ǁnā ǃkhai-i ge a ama, xawe ǂnûihesa kai ǁaeb ǃnâ; tsîb ge ǁnā ǃkhaisa ge ǁnâuǃā, tsîb ge ais di ǁnâuǃāba ge ūhâ i.

²ǁNā tsēdi ǃnâ ta ge tita Danielta ǃnona wekhegu tsēdi kōse ge ǃoa hâ i.

³ǃGâi ǂûna ta ge ǂû tama tsî ǁgan-i tsî ǂauxûi-i tsîn ge ti ams ǃnâ ǂgâ tama ge i, tsî ta ge ǁkhāti ǂkhauǀkhāsen tama ge i, ǁnā ǃnona wekhegu tsēdi digu ge ǀoas kōse.

⁴Tsî ǀgamdisihakaǀaǁî tsēs ǂguro ǁkhâb dis ai ta ge tita ǃāb, ǁnāb Tigrisi amǃgâ ge hâ i.

⁵O ta ge ǃgapakhâi tsî kō tsî ge mû, aob ge ǁnāpa ge hâ i, lineǃkhaib ǀkha anasen hâb tsî kamanab âba ǀui ǃhuniǀurib Ufab dib ǀkha ǃgae hâba.

⁶Tsî soros âb ge kristali khami ge ī i, tsî ais âb ge napab di īsib khami tsî mûra âba ǀaexa ǃamǀae-i khami tsî ǁôakha âb tsî ǂaira âba ǀûb ǂkhanuǂkhanuhe hâ ǂaib dib khami ge ī i; tsî dommi ǁîb di mîdi dib ge dommi ǂguib dib khami ge tsâ i.

⁷Tsî tita Danielta ǀguita ge ǁnā aisa ge mû, xawe ǁnā aogu ti tawa hâgu ge ǁnā aisa mû tama ge hâ i, tsî kai ǃhurib ge ǁîgu ai ge ǁnā, tsî gu ge ge ǁhâ, gaugausen gu nîga.

⁸O ta ge ge tita ǀguri ǃgau tsî ǁnā kai aisa ge mû, tsî ǀgai-i xare-i ge ti ǃnâ ge ǃgau tama i, tsî ti îsasib ge ti tawa ǁgaisisib ǃnâ ge ǀkhara, ǀgai-i xare-e ta ge ūhâ tama īs kōse.

⁹Tsî tita ge dommi ǁîb di mîdi diba ge ǁnâu; tsî dommi mîdi âb diba ta ge ǁnâuo, o ta ge tita ti ais ai ǃgam ǂom xa ge dāhe, o ta ge ais âtas ǀkha ǃhūb ai ge ǁnā.

¹⁰Tsî mû, ob ge ǃomma tita tsâǀkhā tsî tita ti ǁgoara tsî ti ǃomǃnākha ai ǀkhū rase ge mâ kai.

¹¹Ob ge tita ǃoa ge mî: Danieltse, sats ǀnamǀnamsa aotse, ti mîdi, satsa ta nî ǃhoa-ūdi ai ǃgaoǃgâ, îts mâǃkhais âts ai mâ, nēsi ǀase ta go sa ǃoa sîhe xuige. Tsî nē mîsab ra ǃhoa-ū te hîa ta ge tita mâ gere ǀkhū.

¹²Ob ge tita ǁga ge mî: Tā ǃao, Danieltse, ǂguro tsēs ǂgaob âtsats ge, ǁnâuǃāts nîga tsî ais sa Elob dis aiǃâts nî ǃgamǃgamsenga, māsa xu di ge sa mîde ge ǁnâuhe, tsî sa mîdi ǃaroma ta ge go tita hā xuige.

¹³Xawe gaosab Persiab gaosis dib ge ǀgamdisiǀguiǀa tsēdi kōse tita ge mâǃoa; tsî kō, ob ge Mixaeli, ǂamgaosagu di ǂguroba hā ge hui te, tsî ta ge tita ǁnāpa Persiab di gao-aogu tawa ge xūhe.

¹⁴O ta ge tita nēsi go hā, ǁnâuǃā kai tsi ta nîse, ǁnān sa ǁaes ǂama ǀuni tsēdi ai nîra hāna; ais a ganupe ǃgoaxa tsēdi di ai xui-ao.

¹⁵Tsî nē mîdeb ra tita ǃhoa-ū ǃnubai ta ge tita ti aisa ǃgam tsî ge ǃnō.

¹⁶Tsî kō, ob ge ǀguib khoenôan di khami ība ti am ǁaukha ge tsâǀkhā; o ta ge tita ti amsa khowa tsî ge ǃhoa tsî ǁnāb ti ǃoa-ai mâblî ge mî: Ti ǃKhūtse, ǁnā aisa xus ge ti tsûgu xa ta go hāǂamhesa, ǀgai-i xare-e ta ūhâ tamas kōse.

¹⁷Tsî mati ta kha ǁnâi sats ti ǃkhūts di ǃgāta ǁnāti ǃkhūts ǀkha go ǃhoa ǁkhā? Tsî tita xasa; nēsisa xu i ge ǀgai-i xare-e ti ǃnâ a ǀkhai, tsî ǀom-i xare-i ge ti ǃnâ ǃgau tama hâ.

¹⁸ǃNubaib ge ǁkhawa ge tsâǀkhā te, khoe-i khami ība; tsîb ge tita ge ǀgaiǀgai.

¹⁹Tsîb ge: Tā ǃao, kaise ǀnamǀnamsa aotse; ǂkhîba ab hâǀkhā tsi, ǀgai re, ā, ǀgai re! ti ge mî. Tsî tita ǀkhab ra ǃhoa hîa ta ge tita ǀgai tsî: ǃKhūtse, ǃhoa re, sats go ǀgaiǀgai te xuige, ti ge mî.

²⁰Ob ge ǁîba ge mî: ǂAnts a xare tare xū-i ǃaroma ta go sa ǃoa hāsa? Xawe nēsi a ta oa, gaosab Persiaǁîn diba ta nî ǃkhamūse; tsî ǂoa ta kao, mû, ob ge gaosab Grikeǁîn ǃhūb diba nîra hā.

²¹Xawe tita nî satsa ǂanǂan, xoas amab dis ǃnâ xoamâihe hâna; tsî ǀnî-i nēb ǃoagu tita ǀkha ra ǀgaiǀgaisen-i xare-i ge a ǀkhai; gaosab Mixaeli ǀguib.