Read Khoekhoegowab Danieli 11 Bible Online

Danieli 11 - Khoekhoegowab bible

Danieli 11

¹Tsî tita, ā, tita on ge ǁîba ǂguro kurib Dariub Medeǁîb dib ǃnâ mâǃgâ tsî ge ǀgaiǀgai.

²Tsî nēsi ta ge amaba nî ǂanǂan tsi: Mû, ǀnî ǃnona gao-aogu ge Persiab ǃnâ nîra mâ, tsî hakaǁîb ge naugu hoagu ǃgâ-ai kai ǃkhūsiba nîra ūhâ; tsî ǃkhūsib âb ǃnâb ga ǀgai ǃnubaib ge ǁîgu hoaga nîra ǂkhaiǂkhaikhâi Grikeǁîn ǃhūb ǃoagu.

³ǁNās khaoǃgâb ge ǃgari gao-aoba nîra khâi tsî kai gaosiba nîra ūhâ, tsî ǁîb ge ǁîb ra ǃgâiǂâi khami nîra dī.

⁴Tsî ǁîb ga mâo, os ge gaosis âba nîra khôa tsî haka ǂoadi ǀhommi didi ǃnâ nîra ǀgoraǃāhe, xawe ǁîb di suriba tama tsî ǁkhāti ǁîb di gaosis ǁîb gere gaosîsensa tama; ǁîb di gaosis nîra ǃhomǂuihe tsî nîra naugu di kai, nēgu ose xui-ao.

⁵Tsî gao-aob ǃkhawagas dib ge nîra ǀgaisa, xawe ǀnîb ǁîb gaosagu dib ge ǁîb xa nîra ǀgaisa, tsî ǁîb ge nîra gaosîsen, gaosib âb ge kai gaosise nîra i.

⁶Tsî ǀunis ǀnî kurigu dis ai gu ge nîra khoexagu tsî ǀgôas ǃkhawagas gao-aob dis ge ǀapas gao-aob tawa nîra hā, ǃgaeǀhao-es nî dīse; xawe ǁîs ge ǀgaib ǁôab diba sâu tide amagab ge ǁîba mâhō tide tsî ǁîb di ǁôab on, tsîs ge ǁîs ǂûsa nîra māǁnâhe tsî ǁîsa ge ūhāgu tsî ǁîsa ge ôab tsî ǁnā ǁaegu ǃnâ ǁîsa ge ǀgaiǀgaib tsîna.

⁷Tsî ǃnomagu âs di ǂgonaga xub ge ǀguiba ǁîb di ǃās ǃnâ nîra khâi; ǁîb ge ǀgaisa ǂnubis ǀkha nîra hā, tsîb ge ǁîba ǀgaisa ǃkhaidi ǀapas di gao-aob didi ǃoagu nîra hā, tsîb ge ǁîde nîra sîsenū, tsîb ge ǁîde nîra dā.

⁸Tsîb ge ǁkhāti ǁîn di eloga ǁîn di gaosagu ǀkha tsî ǁîn di ǃgomǀgausa xapan ǀhaiǀurin tsî ǃhuniǀurin tsîn ǀkha ǃkhōsis ǃnâ Egipteb ǁga nîra ūsī; tsîb ge ǁîba ǀnî kurigu kōse ǀapas di gao-aoba nîra ǁnāxū.

⁹Nētib ge gao-aob ǃkhawagas diba gaosis ǃnâ nîra sī, tsîb ge ǁkhawa ǃhūb âb ǃoa nîra oa.

¹⁰Tsî ǀgôagu âb ge toroba nîra aiǂhomi, tsî gu ge kaise ǂguikhoexa ǂnubide nîra ǀhaoǀhao; tsî ǀguib âgu ge ǃhaese nîra hā tsî dâu-i khami nîra dâuǂam tsî nîra ǃgûǃganu; tsîb ge ǁîba ǁkhawa nîra hā tsî ǁîba nîra ǃkhamū ǁaposa ǃkhais âb kōse.

¹¹Tsî gao-aob ǃkhawagas dib ge nîra au-ausen tsî nîra ǂoa tsî ǁîb, ǁnāb ge ǀapas di gao-aob, ǁkhāti kai ǂnubisa ūkhâi hâba nîra ǃkhamū, xawe ǂnubis ge ǁîb ǃomǁae nîra māhe.

¹²Tsî ǂnubis ga ūbēhe, ob ge ǂgaob âba nîra ǃguri, tsîb ge ǀnî disiǀoadisi khoena nîra ǂnauǁgui, xaweb ge ǀgai tide.

¹³Gao-aob ǀapas dib ge nîra oa tsî ǂguros ǃgâ-ai kai ǂnubisa nîra ūkhâi; tsî ǁaegu kurigu digu di ǀunis aib ge ǃhaese nîra hā kai ǂnubis ǀkha tsî ǂgui toroxūn ǀkha.

¹⁴ǁKhāti gu ge ǂguiga ǁnā ǁaegu ǃnâ ǃkhawagas di gao-aob ǃoagu nîra khâi; tsî ǁnāǁgôasagu sa ǁaes digu ge nîra ǃguri, nē aisa gu nî ǀgaiǀgaise; xawe gu ge nîra ǁnā.

¹⁵Ob ge gao-aob ǀapas diba nîra hā tsî ǁkhui-e nîra aokhâi tsî ǁaposa ǃāsa nîra ū; o gu ge ǃkhamaogu ǃkhawagas diga nîra mâhō ǁoa tsî ǃkhōǂuihesagu âb ona, ā, mâǀgai ǁkhāsi-i xare-i ge nîra ǀkhai.

¹⁶Ob ge ǁnāb, ǁîb ǃoagu ra hāba ǁîb ra ǂâi khami nîra dī, tsî khoe-i xare-i ge ais âb aiǃâ mâ ǁkhā tide; ǁîb ge ǁkhāti ǃhūb îsasib dib ǃnâ nîra mâ, tsî ǁgaoǁgaos ge ǁîb ǃomǁae nîra hâ.

¹⁷Tsîb ge ais âba nē ǃkhais ai nîra ǂnûi, ǁîb gaosis hoas di ǀgaib ǀkhab nî hāsa, tsîb ge ǂhanu ǂkhî-aide nîra ūhâǀhao, tsîb ge ǁîde nîra dī; tsîb ge ǁîba ǀgôas taradi disa tarase nîra mā, hîkākāheb nîse, xawes ge ǁîsa mâ ǁkhā tide, tsîs ge ǁîb di tide.

¹⁸ǁNās khaoǃgâb ge ais âba ǃnāǃnuidiǀî nîra unu tsî ǂguidi âde nîra ū; xawe ǀgui ǂamsab ge ǁîb di ǃharaxūs, ǁîbab ra ǃharaxū-ūsa nîra toa kai, tsîb ge ǁnās ǃgâ-ai ǃharaxūs âba ǁîba nîra mādawa.

¹⁹Tsîb ge ais âba ǀgaisa ǃkhaigu ǁîb ǃhūgu digulî nîra unu, xaweb ge ǃnôa tsî nîra ǁnā tsî ǁkhawa hōhe tide.

²⁰Tsî ǁîb ǃās ǃnâb ge ǀguiba nîra khâi mariǂgan-aoba gao-aosi ǂkhaisib ǃnâ ra ǃgûǃnâǃganu kaiba; xaweb ge ǀnî tsēdi ǃnâ nîra khôahe, ǁîba xu tama tsî toroba xu tamas ka ī xawe.

²¹ǁNās khaoǃgâb ge ǃharaxūhe hâba ǁîb ǃās ǃnâ nîra mâ, gao-aosi anusiba māhe tideba, xaweb ge ǃnōsasib ǃnâ nîra hā tsî gaosisa ǁgoasenaidi ǀkha nîra ǀgaidā.

²²Tsî ǁôagu dâus digu ge ais âb aiǃâba xu nîra dâu-īǂamhe tsî nîra khôahe tsî gaosab ǃgaeǀhaos dib ona.

²³Tsî ǁîb ǀkha ǃgaeǀhaosa xub ge gāxaǃnâsiba nîra dī; tsîb ge nîra ǃgûǃapa tsî ǀoro ǁaes ǀkha nîra ǀgaiǀgaihe.

²⁴ǃNōsasib ǀkhab ge ǁkhāti kausa ǃkhaidi ǃhūǃâs didi ǃnâ nîra sī tsî ǁîb îgu tsî ǁîb îgu di îgu ge dī tama hâ ina nîra dī, ǁkhâuǁnâs tsî ǃnarib tsî xūn tsînab nî ǁîn ǃnâ tsoroǂuise; tsî ǁaposa ǃkhaidi ǃoagub nî ǂâibasendi âba ǂâise, xawe ǁaeb ǀguib kōse.

²⁵Tsîb ge ǀgaib âb tsî ǂgaob âba nîra ǂkhaiǂkhaikhâi ǃkhawagas di gao-aobǀî kai toroǂnubi-i ǀkha; tsî ǃkhawagas di gao-aob ge kai tsî ǀgaisa toroǂnubi-i ǃkhamsa nîra ǀhao-ū; xaweb ge mâhō tide, ǁîn nî ǂâide ǁîb ǃoagu ǂâiǂâisen xui-ao.

²⁶Tsî ǃâdi ǁîb ǂûn dide ga ǂûgu ge ǁîba nîra khôa, toroǂnubis âb ge nîra dâu-īǂam tsî ǂgui ǃgamhesan ge nîra ǁnā.

²⁷Tsî ǂgaob nē gao-aokha hoakha dib ge ǂkhabadīs ǀguisa nîra hâba, tsî ǀgui tāb ǀguib tawa kha ge ǂhumiga nîra ǃhoa; xawe kha ge amǁnā tide, ǀams nî gorose ǂnûihesa ǁaeb ai hâ xui-ao.

²⁸Ob ge ǁîba ǃhūb âb ǃoa nîra ǁaru ǂgui xūn ǀkha, tsî ǂgaob âb ge ǃanu ǃgaeǀhaos ǃoagu nîra hâ, tsîb ge ǁî ǃkhaisa nîra dī tsî ǃhūb âb ǃoa ǁkhawa nîra ǁaru.

²⁹Mîmâihesa ǁaeb aib ge ǁkhawa nîra ǃhoba tsî ǃkhawagasǀî nîra sī; xawes ge ǂguro sīs khami ī tide tsî ǁkhāti ǀgamǁî ǃnās dis khami ī tide.

³⁰Doe-omgu Kitimma xu ǁîb ǃoagu nîra hā xui-ao, ǁnā-amagab ge tsûb xa nîra ǃkhōhe, tsîb ge oa tsî ǃanu ǃgaeǀhaos ǃoagu nîra ǁaixa tsî ǁî ǃkhaisa nîra dī; oa raseb nî ǁnān ǃanu ǃgaeǀhaosa ra ǃharaxūn ai ǃgaoǃgâ xui-ao.

³¹Tsî gu ge ǁôaga ǁîba xu nîra ǀkhī, tsîn ge ǃanusiba nîra ǀuriǀuri tsî ǀgaib ona, tsîn ge tsēkorobe ǁguibasa nîra ūbē tsî ǁgaidīb hîǀhurus diba nîra mâi.

³²Tsî eloxoresase ǃgaeǀhaos ǃoagu ra sîsennab ge ǁgoasenaidi ǀkha nîra hîna kai, xawe khoen, Elob âna ǂann ge ǁîna nîra ǃkhō tsî ǁî ǃkhaisa nîra dī.

³³Tsî ǁkhāǁkhā-aogu ǁaes digu ge ǂguina nîra ǁgau, tsîn ge nîra ǁnā gôab xa tsî ǁhabub xa tsî ǃkhōsis xa tsî ǃnarib xa ǁaerob kōse.

³⁴Tsî ǁnān ka ǃnubain ge ǂkhari huiro-i ǀkha nîra huihe; tsî ǂguin ge ǁgoasenaidi ǀkha ǁîna nîra ǁaeǁaesen.

³⁵Tsî ǁkhāǁkhā-aogu xa gu ge ǁkhāti ǀnîga nîra ǁnā, ǁîgu nî ǀkhaiǀkhaihe tsî ǃanuǃanuhese tsî ǃuriǃurihese ǁaeb ǀams dib kōse, gorose mîmâihesa ǁaeb kōses nîra ī xui-ao.

³⁶Tsî ǁnā gao-aob ge ǃgâibaheb ra khami nîra dī, tsîb ge ǁî-aitsama nîra ǃguriǃgurisen tsî nîra kaikaisen, mâ Elob hoaba ǃnā hâse, tsîb ge elogu di Elob ǃoagu buruburuxana nîra ǃhoa; tsîb nîra amǁnā, ǁgôasib nîra ǀoas kōse; ǁaposase ǂâibasenhe hâ-i nîra ī xui-ao.

³⁷Tsî elogu ǁîb îgu digu aib ge ǃgaoǃgâ tide tsî taradi turab on ai; ǁîb ge ǁkhāti elo-i xare-i ai ǃgaoǃgâ tide, tsîb ge hoan ǃgâ-ai nîra kaikaisen.

³⁸Tsîb ge elob ǁkhuigu diba ǁîb mâǃkhais ai nîra ǃgôa, ǁîb ge ǁnā elob, ǁîb îgu ge ǂan tama hâ iba nîra ǃgôa ǃhuniǀurib ǀkha tsî ǀhaiǀurib ǀkha tsî ǃgomǀgausa ǀuidi ǀkha tsî turahesa xūn tsîn ǀkha.

³⁹Tsî ǁîb ge ǁaposasigu ǀgaisa ǃkhaidi diga ǃhao elogu ǀkha nîra dī; ǁnān ǁîb nî ǂanǃgânab ge kaise nîra ǃgôa, tsîb ge ǁîna ǂguin ǂama nîra gao kai, tsî ǁîb ge ǃhūba amǃnâse nîra ǀgoraǂui.

⁴⁰Tsî ǁaeb ǀunis dib aib ge ǃkhawagas di gao-aoba ǁîba ǁnâgu ǀkha nîra ǃkhā; tsî gao-aob ǀapas dib ge ǁîba nîra ǃhapi kunidi ǀkha tsî ǃgapi-aogu ǀkha tsî ǂgui doe-omgu tsîn ǀkha; tsî ǁîb ge ǃhūgu ǃnâ nîra sī tsî ǁîb ge ǁîna nîra dâuǂam tsî nîra dâuǃganu.

⁴¹Tsî ǁîb ge ǃhūb îsasib dib ǃnâ nîra sī tsî ǀoasa ǃhūgu ge nîra aoǁguihe; xawe nēkha ge ǁîb di ǃomma nîra ûixū; Edommi tsî Moab tsîkha tsî ǂgurosan Amonni ôan dina.

⁴²ǁÎb ge ǃommi âba ǃhūgu tawa nîra ǁgui tsî Egipteǃhūb on ge ǃnora tide.

⁴³Tsî ǁîb ge ǂganǃgâsa ǁuigu ǃhuniǀurib tsî ǀhaiǀurib tsîkha digu ǂama tsî turahesa xūn Egipteb din ǂama; tsîn ge Libiaǁîn tsî Etiopiaǁîn tsîna ǁîb di dāǃharoga nîra sao.

⁴⁴Xaweb ge gomgu aiǂoasa xu tsî ǀapasa xu ra hāgu xa nîra ǃhuriǃhurihe; ǁnā-amagab ge kai ǁgôasib ǀkha nîra ǂoa, ǀoasanab nî hîkākā tsî ǀâxarese.

⁴⁵Tsî ǁîb ge tentomdi ǁîb di î-ommi dide hurigu ǁaegu tsî ǃhommi ǃanu îsasib dib tawa nîra ǂnaumâi; tsîb ge ǀams âb tawa nîra sī tsî hui-ao-i xare-e ūhâ tide.