Read Khoekhoegowab Danieli 12 Bible Online

Danieli 12 - Khoekhoegowab bible

Danieli 12

¹Tsî ǁnā ǁaeb ǁkhāb aib ge Mixaeli, ǁnā kai gaosab, ǀgôan sa ǁaes dina mâbaba nîra khâi; tsîb ge ǁnā ǁaeba ǂōǂōsib di ǁaese nîra ī, ǁîb khami ī i, ǁae-i ge hâsa xu ǁnā ǁaeb ǁga hâ tama ge hâ is kōse; tsî ǁnā ǁaeb ais ge sa ǁaesa nîra orehe, mâ-i ǂkhanis ǃnâ xoahe hâse ga hōhe-i hoa-e.

²Tsî ǀoasan ǁnān, tsarab ǃhūb dib ǃnâ ǁom hân din ge nîra ǃnoaǂkhai, nēna ǀamo ûib ǃoa tsî nauna ǃharaxūdi ǃoa tsî ǀamo ǁgaiǁgais ǃoa.

³Tsî ǁkhāǁkhā-aogu ge nîra ǂkhai ǃāǂuisab ǂkhaib khami, tsî ǁnān ǀoasana ra ǂhanu-ai kaina ǀgamirodi khami, hugaǀgui tsî ǀamos kōse.

⁴Tsî sats, Danieltse, ǂganam nē mîde îts ǂkhanisa ǂganamǀgaiǀgai ǀunis di ǁaeb kōse; ǂguin ge ǁî xūna nîra ôaǃnâ tsî ǂans ge nîra ǂguiǂguihe.

⁵Tita, Danielta, ge kō tsî ge mû, ǀnî ǀgamkha ge ǁnāpa ge mâ i: ǀGuiba ǃāb di nē ǀnommi ai tsî nauba ǃāb di nau ǃnanib ai.

⁶Tsîb ge ǁnā aob, lineǃkhaib ǀkha anasen hâb, ǁgam-i ǃāb di-i ǂamǃnâ mâb ǃoa: Mâ ǁaeb kōsesa nē buruxan nî ǀamǂoasa? ti ge mî.

⁷Tsî tita ge ǁnā aob, lineǃkhaib ǀkha anasen hâb, ǁgam-i ǃāb di-i ǂamǃnâ mâba ge ǁnâu, tsîb ge amǀkhāb tsî ǁareǀkhāb ǁôab âba ǀhommiǀî ǀhōǃapa tsî ge nū, ǁnāb ǀamose ûi hâb tawa: Mîmâihesa ǁaeb ai tsî mîmâihesa ǁaegu ai tsî ǃkhareb ǁaegu dib ai, tsî ǁîb ga ǃâs ǃanu ǁaes disa ǀgaruǀgarutoa ǃnubain ge nēn hoana nîra ǀamǀamhe ti.

⁸ǁÎ ǃkhaisa ta ge ǁnâu, xawe ta ge ǁnâuǃā si tama ge i; o ta ge tita: Ti ǃkhūtse, mâsa kha ǁnâi ǀam nî ī nēn disa? ti ge mî.

⁹Ob ge ǁîba ge mî: ǃGûsī, Danieltse, nē mîdi ge ǂganamhe tsî ǂganamǀgaiǀgaihe hâ xuige, ǀunis di ǁaeb kōse.

¹⁰ǂGuin ge ǃanuǃanuhe tsî ǃuriǃurihe tsî nîra ǀkhaiǀkhaiǃganuhe, xawe eloxoresan ge eloxoresase nîra sîsen, tsî eloxoresan xaren ge ǁî ǃkhaisa ǁnâuǃā tide, tsî ǁnâuǃāxan ge ǁî ǃkhaisa nîra ǁnâuǃā.

¹¹Tsî ǁnā ǁaeb ais ge tsēkorobe ǁguibasa nîra ūbēhe tsî ǁgaidīb hîǀhurus dib nî mâihesa xu di ge ǀguiǀoadisiǀgamkaidisi tsî khoesedisi tsēde nîra hâ.

¹²ǃGâiǃō i ge ǁnā-i, ǃâubasen tsî ǀguiǀoadisiǃnonakaidisi tsî ǃnonadisikoroǀa tsēdi kōse ga sī-i hoa-e.

¹³Xawe satsa ǃgû ǀams kōse, sats nîra sâ tsî sa amǃnâs ǃoa khâi ǀuni tsēdi ai xuige.