Read Khoekhoegowab Danieli 2 Bible Online

Danieli 2 - Khoekhoegowab bible

Danieli 2

¹Tsî ǀgamǁî kurib Nebukadnesari gaosib dib ǃnâb ge Nebukadnesara ǁhapode ge ǁhapo; os ge gagas âba ǁîdi xa ge ǃhurigâ tsî ǂoms âb ge ǁîb ǃnâ ge ǀkhai.

²ǃNubaib ge gao-aoba ge mî, a gu ga ǃgaidī-aogu tsî ǀgamirokō-aogu tsî nūǀî-aogu tsî Xaldeaǁîgu tsîga ǂgaihe, ti, gao-aoba gu nî ǁhapodi âba ǂanǂanse; o gu ge hā tsî gao-aob di ais aiǃâ sī ge mâ.

³Ob ge gao-aoba ǁîgu ǃoa ge mî: Tita ge ǁhapo-e go ǁhapo; os ge ti gagasa ge sâoǃnâ ǁnā ǁhaposa ta nî ǂanse.

⁴ǃNubai gu ge Xaldeaǁîga gao-aob ǃoa Siriaǁîgowab ǃnâ ge mî: Ai gao-aotse, ǀamose ûi re! ǁHaposa sige mîba re, o ge ge sige ǁguiǃāsa nî ǂanǂan.

⁵Ob ge gao-aoba ǃeream tsî Xaldeaǁîgu ǃoa ge mî: ǃKhais ge kā te hâ: Sago ga ǁhapos tsî ǁîs di ǁguiǃās tsîra ǂanǂan te tama io, o go ge ǃâdi ǃnâ nî ǁhāǃāhe, o gu ge sago di omga nî ǂgoaǁgabo kaihe,

⁶xawe ǁhapos tsî ǁîs di ǁguiǃās tsîra go ga ǂanǂano, o go ge ǀkhaexūn tsî hōdi tsî kai ǃgôasib tsîna tita xu nî hō; ǁnā-amaga ǁhapos tsî ǁîs di ǁguiǃās tsîra ǂanǂan te re.

⁷O gu ge ǀgamǁî ǃnās ai ǃeream tsî ge mî: Ats gao-aotsa sa ǃgāge ǁhaposa mîba re, o ge ge sige ǁguiǃāsa nî ǂanǂan.

⁸Ob ge gao-aoba ǃeream tsî ge mî: Tita ge ǁaposase a ǂan ǂnami go ra ǃkhaisa, ǃkhais kā te hâ ǃkhaisa go ra mû amaga.

⁹Sago ga ǁnā ǁhaposa ǂanǂan te tama io, os ge ǀgoraǃgâs âgo a ǀgui; ǁî ǃkhais ǃaroma go ge mîǀgui hâ, ǂhumimîs tsî ǁgaoǁgaosa mîs, ti aiǃâ go nî mîsa, ǁaeb nî dawas kōse; ǁnā-amaga ǁhaposa mîba te, o ta ge nî ǂan ǁîsa go a ǁguiǃāba te ǁkhā ǃkhaisa.

¹⁰ǃNubai gu ge Xaldeaǁîga gao-aob aiǃâ ǃeream tsî ge mî: Khoe-i xare-i ge ǃhūbaib ai a ǀkhai, gao-aots di mîsa nî ǂanǂan ǁkhā-e, ǁnā-amaga i ge gao-ao-i kai-i tsî gaosa-e a ǀkhai, nēti ī ǃkhaisa ǃgai-aob tawas kas, ǀgamirokō-aob tawas kas Xaldeaǁîb tawas kasa ra ǂgaoǀkhā-e.

¹¹ǁNā ǃkhais, gao-aots ra ǂgaoǀkhās ǃnā hâse a ǃgom xui-ao tsî ǀnî-i xare-i ge a kā, gao-aotsa ǁî ǃkhaisa ǂanǂan ǁkhā-e, ǁnā elogu ǁanǃkhais âgu khoen ǃnâ hōhe tamagu ǀguigu.

¹²ǁNā-amagab ge gao-aoba ǁaixa tsî kaise ǁgôa tsî ge mîmā, gā-aigu Babilons digu hoagu nî ǃgamhe ǃkhaisa.

¹³Tsî ǁnā ǂhanub ge ge ǂoa, gā-aigu nî ǃgamhe ǃkhaisa; Danieli tsî horesagu âb on ge gere ôahe, ǃgamhe gu nîga.

¹⁴ǃNubaib ge Daniela ǀapes tsî ǀgoraǃgâs tsîra Arioxi, gao-aob ǃkhoe-aogu di ǂamsaba, ge ūsība, ǃgûǂoa ge hâ iba, gā-aigu Babilons digab nî ǃgamse.

¹⁵Tsîb ge ǃeream tsî Arioxi, gao-aob di mîmā-aob, ǃoa ge mî: Tarexasa kha ǂhanub ra gao-aob xa nētikōse ǃhaeǃhaehesa? Ob ge Arioxa Daniela ǃkhaisa ge ǂanǂan.

¹⁶Ob ge Daniela ǂgâ tsî gao-aoba ge ǂgaoǀkhā, ab mîmâihesa ǁaeba ǁîba mā, ti, gao-aobab nî ǁguiǃāsa ǂanǂanse.

¹⁷ǃNubaib ge Daniela ǁaru tsî horesagu âb Hananjab, Misaeli tsî Asariab tsîga ge ǂanǂan,

¹⁸ǁîgu nî Elob ǀhommi dib tawa ǀkhomxaǂgaosiga ǂganse, nē ǂganǃgâsib ǂama Danieli tsî horesagu âb nau gā-aigu Babilons digu ǀkha ǃgamhe tidega.

¹⁹ǃNubaib ge ǂganǃgâsiba tsuxu-ai-i ǃnâ Daniela ge ǂhaiǂhaibahe; ǃnubaib ge Daniela ǀhommi di Eloba ge koa.

²⁰Ob ge Daniela ǃeream tsî ge mî: ǀOns Elob disa as koahe ǀamosiba xu ǀamosib kōse; gā-aisib tsî ǀgaib tsîkha a ǁîb di xuige.

²¹ǁÎb ra ǁaegu tsî īrgu tsîga ǀkharaǀkhara, ǁîb ra gao-aoga ǂnûiǁnâ, tsî ǁîb ra gao-aoga ǁapoǁapo; ǁîb ra gā-aina gā-aisiba mā tsî ǂansa ǁnān ǁnâuǃāba ūhâna xui-ao.

²²ǁÎb ra ǃgam tsî ǂganǃgâsa xūna ǂhaiǂhai; ǁîb ge a ǂan ǃkhaenab ǃnâ hâna, ǃnâb ǁîb tawa ǁan hâ xui-ao.

²³Tita ge sats, ti îgu di Elotsa gangan tsî ra ǃkhōǀkhā; Sats ge tita gā-aisib tsî ǀgaib tsîkha ge mā tsî sige ge sats tawa ǂgannats go ǂanǂan te ǃkhais xa; sats ge sige gao-aob di ǃkhaisa go ǂanǂan.

²⁴ǁNā-amagab ge Daniela Arioxi, gao-aob xa gā-aigab nî ǃgamse ge mâiheb tawa ge ǂgâ; tsî sī tsîb ge nēti ge mî: Tā gā-aigu Babilons diga ǃgam îts tita gao-aob aiǃâ ūǂgâ, o ta ge tita gao-aoba ǁguiǃāsa nî ǂanǂan.

²⁵ǃNubaib ge Arioxa Daniela ǃhaese gao-aob aiǃâ sī ge ūǂgâ, tsîb ge nēti ǁîb ǃoa ge mî: Tita ge ao-i Judaba xu ǃkhōsabese ge ūǃgûhen di-e, sats gao-aotsa ǁguiǃāsa nî ǂanǂan-e go hō ti.

²⁶Ob ge gao-aoba ǃeream tsî Danieli, Belsasar ti ǀon hâb ǃoa ge mî: ǁKhāts a xare, titats nî ǁnā ǁhapos, hîa ta go mûsa, ǂanǂansa tsî ǁîs di ǁguiǃāsa?

²⁷Ob ge Daniela gao-aob aiǃâ ǃeream tsî ge mî: ǁNā ǂganǃgâsib, sats gao-aots ra ǂgaoǀkhāb, ǁîba gu ge gā-aigu tsî ǀgamirokō-aogu tsî ǃgai-aogu tsî aimûǀgaru-aogu tsîga gao-aotsa a ǂanǂan ǁoa,

²⁸xawe Elob ge ǀhommi ǃnâ hâ, ǂganǃgâsiga ra ǂhaiǂhaiba, ǁîb ge gao-aots Nebukadnesartsa ǀuni tsēdi ai nîra īna ge ǂanǂan; sa ǁhapos tsî aidi sa danas didi ǁgoeǃkhais âts ai di ge nēde:

²⁹Sats gao-aots ge, ǁgoeǃkhais âts ai hâǃâ, ǂâidi âts xa ge khâiǃnâhe ega nî īn xa, ti; ob ge ǁîb ǂganǃgâsana ra ǂhaiǂhaiba satsa ī nîrana ge ǂhaiǂhaiba.

³⁰Tsî tita, ā, tita ge ǁnā ǂganǃgâsiba go ǂhaiǂhaibahe, ti gā-aisib ûitsaman hoan ǃgâ-ai ti ǃnâ hâba xu tama i tsî nē ǃkhais ǃaroma sats gao-aots nî ǁguiǃāsa hōhōhega, tsî ǂâidi ǂgaob âts didets nî ǂanga.

³¹Sats gao-aots ge ge kō tsî mû kai īsib ge ge hâ i; nē īsib ge kai tsî ǂkhaib âb ge ǃnāsa ge i, sa ǃoagu mâba; tsî ǁîb di īsib ge ǃhuriǃhurisa ge i.

³²Danas īsib dis ge ǃgâi ǃhuniǀuri ge i; ǁîb di ǁkhaib tsî ǁîb di ǁôakha ge ǀhaiǀuri ge i; ǁîb di ǃnāb tsî ǁîb di kamanab ge ǂai ge i.

³³ǁÎb di tîra ge ǂnūǀuri ge i; ǁîb di ǂaira ge ǀgui ǃâb ai ǂnūǀuri tsî nau ǃâb ai ge ǂgoa i.

³⁴ǁÎ xūnats ge satsa ge mû, ǀui-i ge khoe ǃomgu ose xoresens kōse: ǁÎ-i ge īsiba ǁîb di ǂaira ǂnūǀuri tsî ǂgoa ge ira ai ǂnau tsî ǁîra ge ǂkhūǂkhū.

³⁵ǃNubai gu ge ge ǀgui ǂkhūǂkhūhe, ǂnūǀurib tsî ǂgoab tsî ǂaib tsî ǀhaiǀurib tsî ǃhuniǀurib tsîga, tsî gu ge ǁkhunab dāǃnâǃkhaidi di ǀapob khami ge ī kaihe, tsî gu ge ǂoab xa ge ūbēhe, tsî ǃkhai-i xare-i ge ǁîga hōbahe tama ge i; xawe ǁnā ǀuis, īsiba ge ǂnaus, ǁîs ge ge kai ǃhom kai, ǃhūbaib hoaragabas ge ǀoaǀoas kōse.

³⁶Nēs ge ǁhaposa; ǁguiǃās âsa ge nēsi gao-aob aiǃâ nî mîsa.

³⁷Sats gao-aots ge gao-aogu di gao-aotsa: Elob ǀhommi dib ge satsa gaosis tsî ǁkhāsib tsî ǀgaib tsî ǃgôasib tsîna mā xui-ao;

³⁸tsî khoen ôan ǁan hâ ǃkhai-i hoa-i tawab ge ǁîba ǀgurun ǃaub din tsî anin ǀhommi din tsîna sa ǃomǁae ge mā tsî ǁîb ge satsa ǁîn hoan ǂama gaosase ge mâi; sats ge a ǁnā ǃhuniǀuridana.

³⁹Tsî sa khaoǃgâs ge ǀnî gaosisa nî khâi, sas xa ǃnaga hâsa; ǁnās khaoǃgâ ǀnîsa ǃnonaǁî gaosis ǂaib dis, ǃhūbaib hoaragab ǂama nîra gaosa.

⁴⁰Tsî hakaǁî gaosis ge ǂnūǀurib xase nîra karosa; ǂnūǀurib ra xūn hoana ǂkhūǂkhū tsî ǂnaukākās xase, tsî ǂnūǀurib ra ǁnān hoana khôaǂkhūǂkhū khami, ǁnās ǁkhās khamis ge ǁîsa ǂkhūǂkhū tsî nîra khôakākā.

⁴¹Tsî ǁnā-i, mûts ge i, ǂaira tsî ǀkhunugu tsîn a ǀgui ǃâb ai sūǂnubi-aob di ǂgoa tsî nau ǃâb ai ǂnūǀuri ǃkhaisa: ǁÎs ge ǀgoraǃāhe hâ gaosise nîra ī, xaweb ge ǂnūǀurib di karosasiba ǁîs ǃnâ nîra hâ; ǁî ǃkhais xats ge ǂnūǀurib sūǂnubiǂgoab ǀkha habahe hâ ǃkhaisa ge mû.

⁴²Tsî ǀkhunugu ǂaira digu ǀgui ǃâb ai ǂnūǀuri tsî nau ǃâb ai ǂgoa: ǁNā gaosis ge ǃâb ai ǀgaisa tsî ǃâb ai nîra ǂkhabusa.

⁴³Tsî ǁnā-i, hîats ge mû-i, ǂnūǀurib sūǂnubiǂgoab ǀkha hâ ǃkhaisa; ǁîn ge khoesi ǃkhommi ǀkha nî habagu, xawen ge nē-e nau-i tawa ǂae tide, ǂnūǀurib ǂgoab ǀkha ǃkhōgu tama hâs xase.

⁴⁴Xawe ǁnā gao-aogu di tsēdi ǃnâb ge Elob ǀhommi diba, gaosiba nîra ǂnûikhâi, ǀamosib kōse hîkākāhe tideba; tsîb ge ǁnā gaosiba ǀkhara ǁae-i xare-e ǁnābahe tide: ǁÎb ge nau gaosidi hoade nîra ǂkhūǂkhū tsî hîkākā, xawe ǁîb ge ǀamosib hoab kōse nîra hâhâ.

⁴⁵ǁNā-amagats ge ge mû ǃhomma xus ge ǀuisa ǃommi ose xoresen ǃkhaisa, ǂnūǀurib tsî ǂaib tsî ǂgoab tsî ǀhaiǀurib tsî ǃhuniǀurib tsîna ge ǂkhūǂkhūsa; kai Elob ge gao-aotsa go ǂanǂan, nēs khaoǃgâ nîra īna: ǁHapos ge a ǂanǂansa, tsî ǁguiǃās âs ge a ǂgomǂgomsa.

⁴⁶ǃNubaib ge gao-aob Nebukadnesara ais âb ai ǁnā tsî Daniela ge ǀgoreǀî; tsîb ǂûǁguibas tsî ǀnamǀnamsa ǀanǀan- tsî ǂnâǁguibasab nî ǁguibahe ǃkhaisa ge mîmā.

⁴⁷Ob ge gao-aoba Daniela ǃeream tsî ge mî: Amaseb ge sadu di Eloba elogu di Elo tsî gao-aogu di ǃKhū, ǂganǃgâsiga ra ǂhaiǂhaiba, sats go nē ǂganǃgâsiba ǂhaiǂhai ǁkhā i amaga.

⁴⁸ǃNubaib ge gao-aoba Daniela ge kaikai; tsîb ge ǁîba ǀoasa kai ǀkhaexūna ge mā, tsîb ge ǁîba ǃhūǃâs Babilons dis hoas ǂama gaosase ge mâi tsî Babilons gā-aigu hoaga ǃnā hâ ǂamsase.

⁴⁹Ob ge Daniela gao-aoba ge ǂgaoǀkhā, tsîb ge Sadraxi, Mesaxi tsî Abednegob tsîga ǃhūǃâs Babilons dis di ǃoabas ǂama ge mâi; xawe Danieli ge ǁāb gao-aob dib tawa ge hâ.