Read Khoekhoegowab Danieli 3 Bible Online

Danieli 3 - Khoekhoegowab bible

Danieli 3

¹Gao-aob Nebukadnesari ge ǃhuniǀurib ǀkha ība ge dī, ǃnanidisi ǂhâgu kō ǀgapiba ūhâb tsî ǃnani ǂhâgu kō ǂhababa ūhâba; tsîb ge ǁîba ǃgoaǃnāb Durab ǃnâ ge mâi ǃhūǃâs Babilons dis ǃnâ.

²Tsî gao-aob Nebukadnesari ge ge sî, ǀhaoǀhaob nîse ǃāǃkhōmâi-aogu tsî ǂamsagu tsî ǃhūǃkhōmâi-aogu tsî ǂhanuǃkhōmâi-aogu tsî ǁuiǃkhōmâi-aogu tsî ǀapemā-aogu tsî ǃoabasabegu tsî ǃhūǃâdi gaosabegu hoaga khais ǁnā īb, gao-aob Nebukadnesari ge mâib dis ǁga.

³ǃNubai gu ge ǃāǃkhōmâi-aogu tsî ǂamsagu tsî ǃhūǃkhōmâi-aogu tsî ǂhanuǃkhōmâi-aogu tsî ǁuiǃkhōmâi-aogu tsî ǀapemā-aogu tsî ǃoabasabegu tsî ǃhūǃâdi di gaosabegu hoaga ge ǀhao ǁnā īb, gao-aob Nebukadnesari ge mâib, di khais ǁga; tsî gu ge ǁîga ǁnā īb, Nebukadnesari ge mâib aiǃâ si ge mâ.

⁴Tsî ǂgaiǂui-aob ge ǂgai: Sadu ge ra mîbahe, sa ǁaedo, sa ǃhaodo, sa namdo:

⁵ǀŌb ǁnâb tsî ǂnunib tsî siters tsî harps tsî psalmǀkhōxūs tsî ǁhōs di ǀkhōxūs tsî ǂguiǃnâgu ǀkhōxūn hoan diba du ga ǁnâu, ǃnubai du ge ǁnāǁgoe tsî ǁnā ǃhuniǀuri īb, gao-aob Nebukadnesari ge mâiba nî ǀgoreǀî.

⁶Tsî ǁnā tsî ga ǀgoreǀî tama ī-i hoa-i, ǁnā-i ge ǁnā īri ǁkhāb ai khau ra ǀaexa ǁganoms ǃnâ nîra aoǂgāhe.

⁷ǁNā-amaga ǁnā ǁaedi hoadi, ǀōb ǁnâb tsî ǂnunixūs tsî siters tsî vedels tsî psalmǀkhōxūs tsî musikǃnôan hoan diba ge ǁnâu ǁaeb ain ge ǁaedi tsî ǃhaodi tsî namdi hoadi dina ǁnāǁgoe rase ǁnā ǃhuniǀuri-īb, gao-aob Nebukadnesari ge mâiba ge ǀgoreǀî.

⁸ǁNā-amaga gu ge Xaldeaǁî aoga ǁkhā ǁaeb ai ge ǃgû, Jodeǁîna ǂhaisase ra ǀanaǃgâga.

⁹ǁÎgu ge ǃeream tsî gao-aob Nebukadnesari ǃoa ge mî: Ae, gao-aotse, ǀamosib kōse ûi re!

¹⁰Sats gao-aots ge mîmā-e ge mā, ǁnā khoen ǀōb ǁnâb tsî ǂnunixūs tsî siters tsî vedels tsî psalmǀkhōxus tsî ǁhōs di ǀkhōxūs tsî musikǃnôan hoan diba ga ǁnâun hoan nî ǁnāǁgoe tsî ǃhuniǀuri ība ǀgoreǀî ǃkhaisa,

¹¹tsî ǁnāǁgoe tsî ga ǀgoreǀî tama i-i hoa-i, ǁnā-i khau ra ǀaexa ǁganoms di ǁaegub ǃnâ nî aoǂgāhe ǃkhaisa.

¹²O gu ge Jodeǁî aoga hâ, sats xa ǃhūǃâs Babilons dis di ǃoabas ǃnâ ge mâihega, Sadraxi, Mesaxi tsî Abednegob tsîga, ǁî aogu ge sats gao-aots ai ǃgaoǃgâ tama hâse sa eloga ǃgôa tama tsî ǁnā ǃhuniǀuri īb, sats ge mâiba ǀgoreǀî tama hâ.

¹³Ob ge Nebukadnesara ǁaib tsî ǁgôasib tsîkha ǃnâ ge mî Sadraxi, Mesaxi tsî Abednegob tsîgu nî ūǀkhīhe ǃkhaisa; ǃnubai gu ge ǁnā aoga gao-aob aiǃâ ge ūhāhe.

¹⁴Ob ge Nebukadnesara ǁîgu ǃoa ge mî: ǂAnapegasa kha ǁnâi sago, Sadraxi, Mesaxi tsî Abednegob tsîgo, ti eloga ǃgôa tama i tsî ǁnā ǃhuniǀuri īb, tita ge mâiba ǀgoreǀî tamasa?

¹⁵Nēsi ǁnâi, sago ǀōb ǁnâb siters tsî vedels tsî psalmǀkhōxūs tsî musikǃnôan hoan diba go ga ǁnâu ǁaeb ai ǂhomisen hâ, ǁnāǁgoe tsî go ǁnā ǃhuniǀuri īb, tita ge mâiban nî ǀgoreǀîse, o i ge a ǃgâi; xawe ǁîba go ga ǀgoreǀî tama i ǁaeb ǁkhāb ai go ge khau ra ǀaexa ǁganoms di ǁaegub ǃnâ nîra aoǂgāhe; tsî tariba ǁnā Elob sago ti ǃomǁaeba xu nî ore ǁkhāba?

¹⁶O gu ge Sadraxi, Mesaxi tsî Abednegob tsîga ǃeream tsî gao-aob Nebukadnesari ǃoa ge mî: Sige ge ǂhâba tama hâ nē ǃkhais ǂama ge nî ǃeream tsi ǃkhaisa.

¹⁷ǁNāti i ga ī, ob ge sige di Elob, sige ra ǃgôaba, a ǁkhā, khau ra ǀaexa ǁganomsa xub nî ore ge ǃkhaisa tsî ǁîb ge sige ǃomǁaeb âtsa xu nî ore, gao-aotse.

¹⁸Tsî dī tamab ga ī, xawets ge nî ǂan, gao-aotse, sa eloga ge sige ǃgôa tide tsî ǁnā ǃhuniǀuri-īb, sats ge mâiba ge sige ǀgoreǀî tide ǃkhaisa.

¹⁹ǃNubaib ge Nebukadnesara ǁgôasib xa ǀoa, tsî īb ǁîb di ais dib ge ge ǀkhara Sadraxi, Mesaxi tsî Abednegob tsîguǀî; ob ge ǃeream tsî ge mî, ǁganoms nî hû ǃnādi kōse hugas ra ǀgamǀgamhes ǃgâ-ai ǀgamǀgamhe ǃkhaisa.

²⁰Tsîb ge hoagu xa ǀgaisa aogu, ǁîb di ǂnubis ǃnâ hâgu ǃoa ge mî, î gu Sadraxi, Mesaxi tsî Abednegob tsîga ǃgae, khau ra ǀaexa ǁganoms ǃnâ gu nî aoǂgāhese.

²¹O gu ge ǁnā aoga ge ǃgaehe ǁîgu di anaǂamsaragu tsî ǁîgu di purukhoen tsî nau saran ǁîgu din ǃnâ, tsî gu ge ǁîga khau ra ǀaexa ǁganoms di ǁaegub ǃnâ ge aoǂgāhe.

²²ǁNā-amaga, gao-aob di mîs ra ǃhaeǃhaehe tsî ǁganoms kaise a ǀgamsa amaga gu ge ǀaes di naniga ǁnā aogu, Sadraxi, Mesaxi tsî Abednegob tsîga ge ūkhâiga ge ǃgam.

²³Tsî ǁnā ǃnona aogu, Sadraxi, Mesaxi tsî Abednegob tsîgu, ge khau ra ǀaexa ǁganoms di ǁaegub ǃnâ ǃgaehe hâse ǁnāo,

²⁴ob ge gao-aob Nebukadnesara ge ǃhurigâ tsî ǃhaese khâi, tsîb ge ǀapemā-aogu âb ǃoa ge mî: Sage ǃnona aoga ge ǃgaehe hâse ǀaes di ǁaegub ǃnâ aoǂgā tama hâ? O gu ge ǁîga ǃeream tsî gao-aob ǃoa: Ti i kom īo, gao-aotse, ti ge mî.

²⁵Ob ge ǁîba ǃeream tsî ge mî: Mû tita ge haka aoga xoresen hâse ǀaes di ǁaegub ǃnâ ra ǃgûmase ra mû tsî ǁgaoǁgaosi-i xare-i ge ǁîgu tawa a ǀkhai; tsî īb hakaǁîb dib ge elogu ôab dib khami ī.

²⁶ǃNubaib ge Nebukadnesara dao-ams khau ra ǀaexa ǁganoms disa ǀgū tsî ge mî: Sago, Sadraxi, Mesaxi tsî Abednegob tsîgo, Hoan xa ǀGapi Elob di ǃgāgo, ǂoaxa î go nēxopa hā. ǃNubai gu ge Sadraxi, Mesaxi tsî Abednegob tsîga ǀaes di ǁaeguba xu ge ǀkhī.

²⁷O gu ge ǃāǃkhōmâi-aogu tsî ǃhūǃkhōmâi-aogu tsî gao-aob di ǀapemā-aogu tsîga ge ǀhû, nē aoga ra kōǀkhāse, matis ǀaesa ǁîgu di sorode gao tama, tsî matin ǀûn ǁîgu danadi dina ǀīhe tama, tsî mati gu anaǂamsaragu âga ǂhubi tama, ā, matib ǁamab ǀaes diba ǁîga ǃganu tamasa.

²⁸Ob ge Nebukadnesara ǃeream tsî ge mî: Ab ǃkhōǀkhāhe Elob Sadraxi, Mesaxi tsî Abednegob tsîgu diba, ǀhomǃgāb âba ge sîb tsî ǁîb di ǃgāgu, ǁîb ai ge ǂgomaiǂnûiga go oreb, gao-aob mîsa ge ǀkharaǀkhara tsî sorodi âga go māǁnâga, ǀkhara elo-e tama i tsî ǁîgu di Elob ǀguiba gu nî ǃgôa tsî ǀgoreǀîse.

²⁹ǁNā-amaga i ge tita xa mîmā-e ra māhe, mâ ǁaes tsî ǃhaos tsî nams di-i Sadraxi, Mesaxi tsî Abednegob tsîgu di Eloba kara ǃkhāǃkhā-i hoa-i ǃâdi ǃnâ nîra ǁhāǃāhe tsî ommi â-e nîra ǂgoaǁkhopo kai ǃkhaisa; ǀkhara elo-i nē Elob khami ra ore-i a ǀkhai xui-ao.

³⁰ǃNubaib ge gao-aoba Sadraxi, Mesaxi tsî Abednegob tsîga ge ǃgâiǃgâ kai ǃhūǃâs Babilons dis ǃnâ.