Read Khoekhoegowab Danieli 4 Bible Online

Danieli 4 - Khoekhoegowab bible

Danieli 4

¹Gao-aob Nebukadnesari ǁaedi tsî ǃhaodi tsî namdi hoadi din, ǃhūbaib ai ǁan hân ǃoa: Ab sadu di ǂkhîba ǂguiǂguihe ti.

²Tita ge ra ǃgâibahe ǁnā saodi tsî buruxa dīn tsîn, hoan xa ǀgapi Elob ge dī-ū tena ǂhôasa.

³Matikōse di saodi âba a kai! Tsî matikōsen buruxa dīn âba a ǀgaisa! ǁÎb di gaosib ge a ǀamo gaosi, tsî gaosis âb ge ǃhaosa xu ǃhaos kōse hâ.

⁴Tita Nebukadnesarta ge sâsase ti ommi ǃnâ hâse tsî ti î-ommi ǃnâ ra ǃamse,

⁵ǁhapo-e ge ǁhapo, tita ge ǃhurigâ kai-e, tsî ǂâidi, ti kharob ai ta ge ūhâ idi tsî ti danas di ǂâidi tsîn ge ge sâoǃnâ kai te.

⁶ǁNās xa i ge mîmā-e tita xu ge ǂoa, gā-aigu Babilons digu nî ti aiǃâ ūǂgâxahe, ǁguiǃās ǁnā ǁhapos disa gu nî ǂanǂan tega, ti.

⁷ǃNubai gu ge ǃgaidī-aogu tsî ǀgamirokō-aogu tsî Xaldeaǁîgu tsî aimûǀgaru-aogu tsîga ge ǂgâxa; o ta ge tita ǁhaposa ǁîgu aiǃâ ge mî, xawe gu ge ǁguiǃās âsa ǂanǂan te tama ge i;

⁸ǀUnis aib ge Danieli, ti elob di ǀons ǁga Belsasar ti ǀon hâb, ǃanu elogu di gagas ǁîb ǃnâ hâba, ti aiǃâ hās kōse; o ta ge ǁîb aiǃâ ti ǁhaposa ge ǃhoa, mî rase:

⁹Belsasartse, sats ǃgaidī-aogu di ǂamsatse, tita ge a ǂan gagas ǃanu Elogu dis sa ǃnâ hâsa tsî ǂganǃgâsi-i xare-i xats ǃgomdāhe tama ǃkhaisa: ǁNâi ti ǁhapos mû ta ges di aide mîba te, ǁnās ge ǁîs di ǁguiǃāsa.

¹⁰Tsî aidi ti danas didi ti ǁgoeǃkhais ai ta ge ūhâ idi ge nēde: Tita ge ge kō, tsî mû, hais ge ǃhūbaib di ǁaegub ǃnâ ge mâ i, tsî ǀgapib âs ge ge kai i.

¹¹ǁNā hais ge kai tsî ge ǀgai; tsî ǀgapib âs ge ǀhommi kōse ge sī, tsî ǁîs ge ǃhūbaib hoaragab di ǀams kōse ge mûhe.

¹²ǁÎs di ǂgaen ge îsa ge i, tsî ǂûn âs ge ǂgui ge i, tsî ǂûn ǁîs ai hân ge hoana ge ǂâu hâ i; ǁîs ǃgaon ge ǀgurun ǃaub dina somma ge hō, tsî anin ǀhommi din ge ǁnâugu âs ǃnâ ge ǁan, tsî ǁgans hoas ge ǁîs xa ge ǂû kaihe.

¹³Tita ge ǃaruǀî aidi ti danas didi ǃnâ ge kō ti kharob ai tsî mû: ǃÛi-aob, hîa ǃanub ge ǀhomma xu ge ǁgôaxa,

¹⁴ǀgaib ǀkha ra ǂgai tsî nēti ra mîse: Haisa ǁhāǁnâ î du ǁnâugu âsa ǃgaoǁnâ, î du ǂgaen âsa xuruǁnâ, î du ǂûn âsa tsoromâi, în ǀgurun ǀhommi ǃnaga hâna ǁîb ǃgaosa xu ǁhâma tsî anina ǁnâugu âsa xu.

¹⁵Xawe ǃgaob âsa ǃnomagu âb ǀkha ǃhūb ǃnâ ǁnāxū, îb ǂnūǀuri tsî ǂaiǃgae-ūda-i ǀkha ǃgaehe hâse ǃam ǀgâb ǃaub dib ǃnâ hâ; îb ǀaub ǀhommi dib xa ǀâǀâhe, îb ǀgurun ǀkha ǁhaon ǃhūb din ǃnâ amǃnâxa.

¹⁶Îb ǂgaob âba ǀkharaǀkharahe, îb ǃaruǀî tā khoe-i di ǂgaose ī, îb ǀguru-i di ǂgaoba māhe, î gu hû ǁaega ǁîb ǂama ǃgôa-ī.

¹⁷Nē ǃkhais ge ǂâibasens ǃûi-aogu dis ǃnâ hâ, tsî nē ǂgaoǀkhās ge mîs ǃanugu dis ǃnâ hâ, ûitsaman nî ǂanse, Hoan xa ǀGapib khoen di gaosidi ǂama gaosa ūhâ ǃkhaisa, tsî ǁîb ra ǁîde ǂgaob ra khoeb hoaba mā, ā, khoen ǃnâ a hoan xa ǂkharibab ra ǁîdi ǂama mâi ǃkhaisa.

¹⁸Nē ǁhaposa ta ge tita, gao-ao Nebukadnesarta ge mû; ǁnâi sats Belsasartsa ǁguiǃās âsa mî, gā-aigu ti gaosis digu hoagu ge ǁguiǃāsa ǂanǂan te ǁoa i xuige; xawe sats ge a ǁkhā, gagas ǃanu elogu dis sats ǃnâ hâ amaga.

¹⁹ǃNubaib ge Danieli, Belsasar ti ǀon hâba, ǂkhari ǁaero-e ge burugâ tsî ǂâidi âb ge ge sâoǃnâ kai bi. Ob ge gao-aoba ǃeream tsî ge mî: Belsasartse, î ra ǁhapos tsî ǁîs di ǁguiǃās tsîra tā sâoǃnâ kai tsi. Ob ge Belsasara ǃeream tsî ge mî: Ti ǀhonkhoetse, as ǁhaposa sa ǁkhansabena hāba tsî ǁguiǃās âsa sa mâǃoasabena!

²⁰ǁNā hais, sats ge mûs, kai tsî ge ǀgaisa is, ǀgapib âs ǀhommi kōse ge sīs tsî ǃhūbaib hoaragab kōse ge mûhes,

²¹ǂgaen âs ge îsa is tsî ǂûn âs ge ǂgui is, tsî ǂûn ge hoana ǁîs ai hâba is, ǀgurun ǃaub din ge ǁîs ǃgao ǁan hâ is, tsî ǁnâugu âs ǃnân ge anina ǁan hâ is,

²²ǁîts ge sats gao-aots, kai tsî ge ǀgaitsa; kaisib âts ge ǁnāti ge ǀom, ǀhommi tawab ra sīs kōse tsî gaosis âtsa ǃhūbaib di ǀkhâuǀams kōse xui-ao.

²³Tsî gao-aots ge ǃûi-aob, ǁnāb ge ǃanuba, mû ǃkhaisa ǀhomma xu ra ǁgôaxa tsî ra mîba: Haisa ǁhāǁnâ î du ǁîsa hîkākā, xawe ǃgaosa ǃnomagu âs ǀkha ǃhūb ǃnâ ǁnāxū, îs ǂnūǀuri tsî ǂaiǃgae-ūda-i ǀkha ǃam ǀgâb ǃaub dib ǃnâ ǃgaehe, îs ǀaub ǀhommi dib xa ǀâǀâhe, îs ǀgurun ǃaub din ǀkha amǃnâxa, hû ǁaegu ǁîs ǂama nîra ǃgôa-īs kōse.

²⁴Nēs ge ǁîs di ǁguiǃāsa, gao-aotse, tsî nēs ge ǂâibasens Hoan xa ǀGapib dis, ti ǀhonkhoe gao-aots ǂama nîra hāsa.

²⁵ǁNās ge khoena xuts nî satsa ǂhāǂuihe, tsîs ge ǀgurun ǃaub din ǀkha ǁanǃkhais âtsa nî hâ, tsîts nî gomagu khami ǁhaona ǃû kaihe, tsîts nî ǀaub ǀhommi dib xa ǀâǀâhe tsî hû ǁaegu ge sa ǂama nîra ǃgôa-ī, Hoan xa ǀGapib khoen di gaosidi ǂama gaosa ūhâ tsî ǂgaob ra-i hoa-eb ra ǁîde mā ǃkhaisats nî ǂans kōse.

²⁶Tsî ǁnās, ǁkhāti ge mîhes, ǃgaos nî ǁnā hais di ǃnomagu ǀkha ǁnāxūhe ǃkhaisa; sa gaosis ge nîra mâǁapo, ǀhommi ra gaosîsen ǃkhaisats nî ǂans khaoǃgâ.

²⁷ǁNā-amaga, gao-aotse, ti ǀapemās xa ǃgâibahe, îts sa ǁorena khôaǁnâ ǂhanu-aisib ǀkha tsî sa ǂhanuoǃnâsiga ǀkhomǀkhomsabenats ra dī-ū ǀkhommi ǀkha, iseb ǀnîsi ǂkhîb âtsa ǃnūǃnūhe tidesa.

²⁸Nēn hoan xab ge gao-aob Nebukadnesara ge hāǂamhe.

²⁹Disiǀgamǀa ǁkhâgu di ǀunis ai, ǁîb ra gao-aosi î-ommi Babilons dib ai ǀnarema,

³⁰hîab ge gao-aoba ǃhoa tsî ge mî: Nēsa kha ǁnā kai Babilon tamasa, tita ge gaosis di ǂnûǃkhaise ti ǀgaib di ǁkhāsiba xu tsî ti ǂkhaisib di ǃgôasib ǃoa ǂnubibasensa?

³¹Nē mîs ganupe gao-aob di ams ǃnâ hâ hîab ge domma ǀhomma xu ǁnā tsî ge mî: Sats gao-aots, Nebukadnesarts ra mîbahe: Gaosis âts xats ge go ǂgōxūhe.

³²Tsîts ge satsa khoena xu nîra ǂhāǂuihe, tsî ǁanǃkhais âts ge ǀgurun ǃaub din tawa nîra hâ; tsîts ge ǀgâba nîra ǃû goman khami, tsî hû ǁaegu ge sa ǂama nîra ǃgôa-ī, Hoan xa ǀGapib khoen di gaosidi ǂama gaosa ūhâ tsî ǁîb ra ǂgao-i hoa-eb ra ǁîde mā ǃkhaisats nî ǂans kōse.

³³ǁNā īri ǁkhāb ais ge nē mîsa Nebukadnesari ǂama ge ǀoa, tsîb ge khoena xu ge ǂhāǂuihe tsîb ge ǀgâba gere ǃû goman khami, tsî soros âb ge ǀaub ǀhommi dib xa ge ǀâǀâhe, ǀûn âb ge ǃariǃkhās di ǃamgu khami tsî ǁgorogu âb ge anin digu khami ǀoms kōse.

³⁴Nē tsēdi ǀunis ai ta ge tita, Nebukadnesarta, ǀhommiǀî ge ǃgapakhâi, ti ǁnâuǃāb ge ǁkhawa ti ǃnâ hā xui-ao; o ta ge tita Hoan xa ǀGapiba ge koa; o ta ge ǀamose ûi hâba ge kare tsî ǃgôa, ǁîb di gaosib ge a ǀamo gao tsî gaosib âb ǃhaosa xu ǃhaos ǁga hâ amaga.

³⁵Tsî ǁansaben ǃhūbaib din hoan ge xū tamase ǃgôahe hâ, tsî ǁîb ge ǁîb di ǂâis ǃoa ra dī ǀhommi di ǂnubis tsî ǃhūbaib di ǁansaben tsîn ǀkha, tsî khoe-i ǃommi âba ǂnaubē tsî ǁîb ǃoa: Tare-ets ra dī? ti mî ǁkhā-i xare-i ge a ǀkhai.

³⁶ǁNā ǁaeb ǁkhāb aib ge ti ǁnâuǃāba ǁkhawa ge hāǃnâ te; tsî ǂkhaisib ti gaosis dib, ti anusib tsî ti ǂkhaib on ge ǁkhawa ge hā te; o gu ge ti ǀapemā-aogu tsî ti ǃgari-aogu tsîga ge ôa te, o ta ge ti gaosis ǃnâ ge ǁapoǁapohe; o ta ge ǃnā hâ ǂkhaisiba ge ǀarobahe.

³⁷O ta ge tita, Nebukadnesarta, gao-aob ǀhommi diba ra kare tsî ǀgapiǀgapi tsî ǂkhaiǂkhai, ǁîb di sîsengu hoagu a ama tsî ǁîb di daogu a ǂhanu amaga; tsî ǁîb ge a ǁkhā ǁnān ǃgurib ǃnâ ra tanisenna ǃgamǃgamsa.