Read Khoekhoegowab Danieli 5 Bible Online

Danieli 5 - Khoekhoegowab bible

Danieli 5

¹Gao-aob Belsasari ge ǀoadisi ǃgari-aogu âba ǂûǁae-e ge dība, tsîb ge ǁnā ǀoadisigu aiǃâ ǂauxûiba ge ā.

²Belsasari ge ǂauxûiba tsâtsâo, ob ge ge mî, ǁnā ǃhuniǀuri tsî ǀhaiǀurixapan, ǁîb di îb Nebukadnesari xa tempeli Jerusalems diba xu ge ūǃgûhen nî ūǀkhīhe ǃkhaisa, gao-aob tsî ǁîb di ǃgari-aogu tsî ǁîb di taradi tsî ǁîb di ǀgamitaradi tsîn nî ǁîn ǃnâ āga.

³ǃNubain ge ǃhuniǀurixapan Elob ommi di tempeli, Jerusalems tawa ge hâ iba xu ge ūǃgûhena ge ūǀkhīhe; tsî gao-aob tsî ǁîb di ǃgari-aogu tsî ǁîb di taradi tsî ǁîb di ǀgamitaradi tsîn ge ǁîn ǃnâ ge ā.

⁴On ge ǂauxûiba ra āse ǃhuniǀuri tsî ǀhaiǀuri tsî ǂai tsî ǂnūǀuri tsî hai tsî ǀui-eloga ge kare.

⁵ǁNā īri ǁkhāb ai gu ge khoe-i ǃommi di ǀkhunuga ge ǀkhī, ǁîgu ge kandelari ǃoa-ai ǃurib ǂnubiǂgoab dib gao-aosi î-ommi dib ai ge xoa, tsî gao-aob ge ǃommi di ǀams xoa rasa ge mû.

⁶Ob ge ǂkhaib gao-aob ais diba ge ǀkhara, tsî ǂâidi âb ge ǁîba ge ǃhuriǃhuri, tsî ǃgaesengu ǁîb di kamanab digu ge ge xoresen, tsî ǁgoara âb ge ge ǂgâugu.

⁷Ob ge gao-aoba ǀgaib ǀkha ge ǂgai, ǀgamirokō-aogu tsî Xaldeaǁîgu tsî aimûǀgaru-aogu tsîgu nî ūǂgâxahesa; ob ge gao-aoba ǃeream tsî gā-aigu Babilons digu ǃoa ge mî: Mâ khoeb hoab nē xoasa khomaisa a ǁkhāb tsî ǁguiǃās âsa ǂanǂan ǁkhāb, ǁîb ge purpuri ǀkha nî anahe tsî ǃhuniǀuriǁkhamma nîra ǁgāhe ǃaob âb ai, tsîb ge ǁîba nîra ǃnonaǁî gaosa i nē gaosis ǃnâ.

⁸ǃNubai gu ge gā-aigu gao-aob digu hoaga ge ǂgâxa; xawe gu ge ǁnā xoasa khomai ǁoa tsî ǁguiǃās âsa gao-aoba ǂanǂan ǁoa ge i.

⁹Ob ge gao-aob Belsasara kaise ge ǃhuri, tsî ǂkhaib âb ge ǁîb tawa ge ǀkhara tsî ǃgari-aogu âb ge ge ǃhurigâ.

¹⁰Os ge gaosasa nē mîdi gao-aob tsî ǃgari-aogu âb didi ǃaroma ǂûǁaeb di ommi ǃnâ ge ǂgâ. Os ge gaosasa ǃeream tsî ge mî: Ae, gao-aotse, ǀamose ûi re; tā ǂâidi âts xa ǃhurikaisen, îb īsib âtsa tā ǀkhara re.

¹¹ǀGui aob ge sa gaosis ǃnâ hâ, ǃanu elogu di gagas ǁîb ǃnâ hâba, sa îb di tsēdi ǃnâ gu ge ǃnâb tsî ǁnâuǃāb tsî gā-aisib, Elogu di gā-aisib khami ība ǁîb tawa ge hōhe: ǁNā-amagab ge gao-aob Nebukadnesari, sa îba ǁîba ǃgaidī-aogu tsî ǀgamirokō-aogu tsî Xaldeaǁîgu tsîgu di ǂamkhoese ge mâi, ā, sa îb ge ǁî ǃkhaisa ge dī, gao-aotse.

¹²ǃNā hâ gagas tsî ǂans tsî ǁnâuǃāb, ǁhapode ra ǁguiǃāb dib tsî ǀhaede ra ǁgaub dib tsî ǃhûde ra xoreb dib ge ǁîb tawa a hōhe amaga, Danieli, sats gao-aots ge Belsasar ti ǂgai-unuba; ab ǁnâi Daniela ǂgaihe, ob ge ǁîba ǁguiǃāsa nî ǂanǂan.

¹³ǃNubaib ge Daniela gao-aob tawa ge ūǂgâhe. Ob ge gao-aoba ǃeream tsî Danieli ǃoa ge mî: ǁNā Danieltsa satsa, Judaba xu ǃkhōsabese ge ūǃgûhen, gao-aob, ti îb xa Judaba xu ge ūhāhen di ǀguitsa?

¹⁴Tita ge sa xa go ǁnâu, gagas elogu dis sa ǃnâ hâ tsî ǃnâb tsî ǁnâuǃāb tsî ǃnā hâ gā-aisib tsîgu sa ǃnâ ra hōhe, ǃkhaisa.

¹⁵O gu ge nēsi gā-aigu tsî ǀgamirokō-aogu tsîga ti aiǃâ go ūǂgâhe, nē xoasa khomai tsî gu nî ǁguiǃās âsa ǂanǂan tega; xawe gu ge ǁguiǃās nē mîdi disa mā ǁoa go ī.

¹⁶Xawe sats xa ta ge go ǁnâu, ǁguiǃāde mā tsîts ǃhûde a xore ǁkhā ǃkhaisa; nēsi ǁnâi; sats ga nē xoasa khomai tsî ǁguiǃās âsa ǂanǂan te ǁkhā īo, ots ge purpuri ǀkha nî anahe tsî ǃhuniǀuriǁkhamma nî ǁgāhe, tsîts nî ǃnonaǁî gaosa i nē gaosis ǃnâ.

¹⁷ǃNubaib ge Daniela ǃeream tsî gao-aob aiǃâ ge mî: Sa hōde ūbasen îts sa ǃnarexūna ǀkhara-e mā; xawe ta ge tita xoasa gao-aob aiǃâ nî khomai tsî ǁguiǃāsa ǁîba nî ǂanǂan.

¹⁸Sats xasa, o gao-aotse, hoan xa ǀgapi Elob ge sa îb Nebukadnesara gaosis tsî kaisib tsî ǃgôasib tsî ǂkhaisib tsîna ge mā.

¹⁹Tsî ǁnā kaisib, ǁîb xab ge māheb xa di ge ǁaedi tsî ǃhaodi tsî namdi hoade ǁîb aiǃâ ǃao tsî ge ǀkhū; ǁîb ra ǂgao-i hoa-eb ge ge ǃgam tsî ǁîb ra ǂgao-i hoa-eb ge ûib ǃnâ ge sâu tsî ǁîb ra ǂgao-i hoa-eb ge ge ǀgapiǀgapi tsî ǁîb ra ǂgao-i hoa-eb ge ge ǃgamǃgam.

²⁰Xawe ǂgaob âb ge ǀgapio, tsî gagas âb ge karo, ob ge trons gaosis disa xu ge ǂhāǁnâhe, ob ge ǃgôasib âba ǁîba xu ge ūhe.

²¹Ob ge khoenôa ǀgôana xu ge ǂhāǂuihe, tsî ǂgaob âb ge ǀgoa-i khami ge ī, tsî ǁanǃkhais âb ge ǃgoren tawa ge hâ i, tsîb ge ǀgâba ge ǃû kaihe goman khami, tsî soros âb ge ǀaub ǀhommi dib ǀkha ge ǀâǀâhe, Elob, Hoan xa ǀGapib ge khoen di gaosidi ǂama a gaosa tsî ǁîb ra ǂgao-i hoa-eb ra ǁîdi ǂama mâi ǃkhaisab nî ǂans kōse.

²²Tsî sats, Belsasarts, ǁîb ôats ge ǂgaob âtsa ǃgamǃgam tama hâ, nēn hoanats ge ǂan i xawe.

²³Tsîts ge ǃKhūb ǀhommi dib ǃoagu ge khâi, tsî xapan ǁîb di ommi din ge sa aiǃâ ge ūhāhe, tsî sats tsî sa ǃgari-aogu tsî sa taradi tsî sa ǀgamitaradi tsî du ge ǂauxûiba ǁîn ǃnâ ge ā, tsî ǁnā elogu ǀhaiǀurib tsî ǃhuniǀurib tsî ǂaib tsî ǂnūǀurib tsî haib tsî ǀuis digu, hîa mû tsî ǁnâu tsî ǂan ǁoagu, ǁîgats ge satsa go kare, xawe ǁnā Elob, ǃomǁaeb âb ǃnâb ǀommi âtsa hâb tsî sa daogu hoagu ǁîb tawa hâb, ǁîbats ge ǂkhaiǂkhai tama go i.

²⁴ǃNubais ge ǁnā ǀams ǃommi disa ǁîb xa go sîhe tsîs ge nē xoasa go xoamâihe.

²⁵Tsî nēs ge ǁnā xoas, ǁnāpa xoamâihe hâsa: Mene, Mene, Tekel, Ufarsin.

²⁶Nēs ge ǁguiǃās nē mîdi disa: Mene; Elob ge gaosis âtsa go ǃgôa, tsî ǁîb ge ǁîsa go dītoa.

²⁷Tekel; sats ge ǀnō-ūdas ai go ǀnōhe, tsîts ge supuse go hōhe.

²⁸Peres; gaosis âts ge ǀgoraǃāhe hâ, tsîs ge Medeǁîn tsî Persiaǁîna go māhe.

²⁹ǃNubaib ge Belsasara ge mîmā, on ge Daniela purpursaraba ge ana tsî ǃhuniǀuriǁkhamma ge ǁgā, tsîn ge ǁîb xa ǂhaisase ge ǂgai, ǁîb a ǃnonaǁî ǃkhaisa gaosis ǃnâ, ti.

³⁰ǁNā tsuxub ǁkhāb ǃnâb ge Belsasari, Xaldeaǁîn di gao-aoba ge ǃgamhe.