Read Khoekhoegowab Danieli 6 Bible Online

Danieli 6 - Khoekhoegowab bible

Danieli 6

¹Tsî Dariub Medeǁîb ge gaosisa ge hō, ǃnanidisiǀgamǀa kurixab a hîa.

²Tsî Dariub ge ge ǃgâiǂâi, gaosis ǂamab nî ǀguikaidisi tsî ǀgamdisi ǃāǃkhōmâi-aoga mâi ǃkhaisa, gaosis hoaragas ǂama nî hâga.

³Tsî ǁîgu ǂamai ǃnona gaosaga, ǁîgu xab nî Daniela ǂguroba; ǁîga gu nî ǃāǃkhōmâi-aoga ǃereamsa māga, gao-aob ǂkhôahe tidese.

⁴ǃNubaib ge nē Daniela ǁnā gaosagu tsî ǁnā ǃāǃkhōmâi-aoga ge ǃnā, ǁnāgu ǃgâ-ai ǃgâi gagas ge ǁîb ǃnâ hâ i amaga; ob ge gao-aoba ge ǂâibasen, ǁîbab nî gaosis hoas ǂama mâi ǃkhaisa.

⁵O gu ge gaosagu tsî ǃāǃkhōmâi-aogu tsîga ǃgâi ǁae-e ge ôa-am Danieli ǃoagu gaosis ǃaroma, xawe gu ge ǃgâi ǁae-i tsî dīsā-i xare-e hō tama ge i, îǂhôab ge i tsî ǃkhōsā-i tsî dīsā-i xare-i ge ǁîb ǃnâ hōhe tama hâ i xui-ao.

⁶ǃNubai gu ge ǁnā aoga ge mî: Sage ge nē Danieli ǃoagu ǃgâi ǁae-i xare-e hō tide, xū-e ge ga sage, Elob âb di ǂhanub ǃnâ hōba bi tama io.

⁷O gu ge nē gaosagu tsî ǃāǃkhōmâi-aogu tsîga ǀhûpe gao-aob ǃoa hā tsî nēti ǁîb ǃoa ge mî: Ae, gao-ao Dariutse, ǀamosib kōse ûi re!

⁸Gaosis di gaosagu hoagu tsî ǂamsagu tsî ǃāǃkhōmâi-aogu tsî ǀapemā-aogu tsî ǃhūǃkhōmâi-aogu tsîgu ge ge ǀapeǀhao, gao-aosi ǂnûiǂgā-i nî ǂnûihe tsî ǀgaisa mîmā-i nî ǂoa kaihe ǃkhaisa mâ-i hoa-i ǃnonadisi tsēdi ǃnâ elo-i tawas kas khoe-i tawas ka xawe xū-e ga ǂgan-i, sats gao-aots ǀguits tawa i ga ǂgan tama io, xamgu di āb ǃnâ nî aoǂgāhe ti.

⁹Ots ge sats gao-aotsa nēsi mîmā-e nî ǁapoǁapo tsî xoa-e nî xoamâi, xoa-i ǀkharaǀkharahe ǁoa-e, Medeǁîn tsî Persiaǁîn di ǂhanub ǂgaidaba ǁoab ǃoa.

¹⁰ǁNā-amagab ge gao-aob Dariuba ǁnā xoas tsî mîmās tsîra ge xoamâi.

¹¹Tsî Danieli ge ǁnâuǃāo, ǁnā xoas xoamâihe hâ ǃkhaisa, ob ge ommi âb ǃnâ ge ǂgâ, tsî ǁîb ge ǂamommi âb ǃnâ Jerusalemsǀî ǁkhowa-amsase hâ mûǂuidaode ge ūhâ i, tsîb ge tsēa ǃnona ǃnādi kōse ǃhonǁgoa tsî ge ǀgore tsî Elob âb aiǃâ ǁguiǁnâsa ge dī, nēn aiǃâb gere dīs ǁkhās xase.

¹²O gu ge ǁnā aoga ǀhûpe hā tsî Daniela Elob âb aiǃâ ǀgore tsî ǀkhomabasen rase ge hō.

¹³ǃNubai gu ge ǀgū tsî gao-aob aiǃâ ǁnā mîmās gao-aob dis xa ge ǃhoa: Mîmā-ets kha satsa xoamâi tama hâ, mâ khoe-i hoa-i, ǃnonadisi tsēdi ǃnâ elo-i tawas kas khoe-i tawas ka xawe xū-e ga ǂgan-i sats gao-aots ǀguits tawa tama-i nî xamgu di āb ǃnâ aoǂgāhe ti? Ob ge gao-aoba ǃeream tsî: ǁAposa mîs ge a ǁî, Medeǁîn tsî Persiaǁîn ǂhanub ǂgaidawahe ǁoab ǃoa, ti ge mî.

¹⁴ǃNubai gu ge ǁîga ǃeream tsî gao-aob aiǃâ ge mî: Danieli, Judaba xu ǃkhōsase ge ūǃgûhen di ǀguib ge sats gao-aots ai ǃgaoǃgâ tama hâ, tsî ǁnā ǃkhâikhoms, sats ge xoamâis on ai tama; tsîb ra ǃnona ǃnade tsēs ǃnâ ǀgores âba dī.

¹⁵Ob ge gao-aoba, nē mîsab ge ǁnâu ǃnubai, ǁîb ǂûb ǃnâ kaise ge ǃoa, tsîb ge ǂgaoba Danieli ai ge ǂnûi, ǁîbab nî orese, ā, sores ra ǂgâ ǁaeb kōseb ge ge ǀhupuǀhupusen, ǁîbab nî orese.

¹⁶O gu ge ǁnā aoga ǀhûpe gao-aob ǃoa ge hā, tsî gu ge gao-aob ǃoa ge mî: ǂAn, gao-aotse, Medeǁîn tsî Persiaǁîn di ǂhanu-i a ǃkhaisa, mîmā-i tsî ǂnûiǂgā-i, gao-aob xa ǂnûihe hâ-i xare-i ǀkharaǀkharahe ǁoa ti.

¹⁷ǃNubaib ge gao-aoba ge mîmā, on ge Daniela ge ūǀkhī tsî xamgu di āb ǃnâ ge aoǂgā bi; ob ge gao-aoba Danieli ǃoa ge mî: Sa Elob, sats hugaǀgui ra ǃoabab, ǁîba ab ore tsi.

¹⁸Os ge ǀuisa ge ūhāhe tsî āb di ams ai ge ǁguihe; gao-aob ge ǁîsa ǀkhunuǂnûidas âb ǀkha ge ǂganǀgai tsî ǃgari-aogu âb di ǀkhunuǂnûidas ǀkha, Danieli xa i xū-i xare-e ǀkharaǀkharahe tidega.

¹⁹ǃNubaib ge gao-aoba î-ommi âb ǃoa ǁaru tsî ǂûtamase ge hâǁgoa, tsîb ge dâǁnae-i xare-e ǁîb aiǃâ hā kai tama ge i; tsî ǂoms âb ge ǃnūse ǁîba xu ge ǂgō.

²⁰Ob ge gao-aoba ǃnauǁgoaga, ǁgoas ra ǁgoa hîa, khâi tsî ǃnoesase xamgu di āb ǃoa ge ǃgû.

²¹Tsî ābab ge ǀgūo, ob ge ǃoaxa dommi ǀkha Daniela ge ǂgai; tsî gao-aob ge Danieli ǃoa ge mî: Ae, Danieltse, ûitsama Elob di ǃgātse, xareb kha ǁnâi sa Elob, ǁîbats hugaǀgui ra ǃoababa ǁkhā go i, xamga xu satsa oresa?

²²ǃNubaib ge Daniela gaob ǃoa: Ae, gao-aotse, ǀamose ûi re! ti ge mî.

²³Ti Elob ge ǀhomǃgāb âba go sî, tsî ǁîb ge amǃnâb xamgu diba go ǂganam, ǁîgu go ǂkhôa te ǁoa is kōse, ǁîb aiǃâb ǀhapiosiba ti ǃnâ hâ amaga; tsî ta ge tita sats gao-aots on ǃoagu dīsā tama hâ.

²⁴ǃNubaib ge gao-aoba ǁîb ǃnâ kaise ǃgâiaǂgao tsî ge mî, Danieli nî āba xu ǂgaeǂuihe ǃkhaisa. Tsî Danieli ge āba xu ǂgaeǂuiheo, o i ge ǂkhôa-i xare-e ǁîb tawa hōhe tama ge i, ǁîb di Elob ǃnâb ge ǂgom hâ i xui-ao.

²⁵ǃNubaib ge gao-aoba ge mîmā, o gu ge ǁnā aogu, Daniela ǂhaisase ge ǀanaǃgâga ūǀkhīhe tsî ǁîga xamgu di āb ǃnâ ge aoǂgāhe ǁîgu di ôan tsî ǁîgu di taradi tsîn ǀkha; tsîn ge, āb di ǃhūb ain sī tama hâ hîa, xamgu xa gaohe tsî ǁîn di ǂkhōgu hoaga ge khôaǂkhūhe.

²⁶ǃNubaib ge gao-aob Dariuba ǁaedi tsî ǃhaodi tsî namdi hoadi ǃhūbaib hoab ai ǁan hâdi ǃoa: Ab sadu di ǂkhîba ǂguiǂguihe, ti ge xoa.

²⁷Tita xu i ge mîmā-e ge ǂoa, în ti gaosis di gaos hoas ǃnâ hâna ǃao tsî ǀkhū Elob Danieli dib di ais aiǃâ, ǁîb a ûitsama Elo xuige, ǀamosigu kōse ǁaposaba, tsî gaosib ǁîb dib ge a hîkākāhe ǁoa, tsî gaosib âb ge ǀunis kōse nîra hâsa.

²⁸ǁÎb ge ǁnāb, ore tsî ra sâuba, tsî ǁîb ge ǁnāb, saodi tsî buruxa dīn tsîna ǀhommi ǃnâ tsî ǃhūbaib ai ra dība: ǁÎb ge Daniela xamgu di ǀgaiba xu go oreba.

²⁹Tsî nē Danieli ge ge ǃgâiǃgâ gaosis Dariub dis ǃnâ tsî gaosis Koreb, Persiaǁîb dis ǃnâ.