Read Khoekhoegowab Danieli 7 Bible Online

Danieli 7 - Khoekhoegowab bible

Danieli 7

¹ǂGuro kurib Belsasari Babilons gao-aob dib ǃnâb ge Daniela ǁhapos tsî aidi danas âb didi tsîde ǁgoeǃkhais âb ai ge mû; ǃnubaib ge ǁnā ǁhaposa ge xoa, tsîb ge ǃkhōǀhaos ǃkhaidi disa ge ǃhoaba.

²Tsî Danieli ge ǃeream tsî ge mî: Tita ge ti ais ǃnâ tsuxuba ge mû, tsî kō haka ǂoagu ǀhommi digu ge hurib kaib ǂama ge ǃkhopaǂoaxa.

³O gu ge haka kai ǀguruga huriba xu ge ǂoaxa, nēb nauba xu ǀkharase īga.

⁴ǂGurob ge xammi khami ge ī i, tsîb ge ǃariǃkhās ǁgabokha ge ūhâ i; tita ge ge kō hâ, ǁgabokha âb ge ǂgaeǂuihes kōse, tsî ǃhūba xub ge ūǃapahe tsî ǂaidi âb ai ge mâihe khoe-i khami, tsîb ge khoe-i ǂgaoba ge māhe.

⁵ǁNās khaoǃgâ mû, ǀnî ǀgurub ǀgamǁîb ge bēri khami ge ī i, tsîb ge ǀgui ǀkhāb ai sī ge mâ; tsîb ge ǃnona ǀaraga amǃnâb âb ǃnâ ǁgûgu âb ǁaegu ge ūhâ i, tsîn ge nēti ǁîb ǃoa ge mî: Khâi îts kaise ǁgan-e ō!

⁶ǁNās khaoǃgâ ta ge kō tsî ge mû, ǀnî ǀgurub ge ge hâ i ǃarub khami ība, tsîb ge haka ǁgabogu ani-i digu khami īga ǃgâb ai ge ūhâ i, ǁkhātib ge ǁnā ǀgurub ǁkhāba haka danade ge ūhâ i, tsî gaosis ge ǁîba ge māhe.

⁷ǁNās khaoǃgâ ta ge tsuxu-aidi ǃnâ kō tsî ge mû, hakaǁî ǀgurub ge ǃaoǃaosa tsî ǃhuriǃhurisa ge i tsî kaise ǀgaisa, tsîb ge kai ǂnūǀuriǁgûga ge ūhâ i; tsîb ge ge hapu tsîb ge ge khôaǂkhūǂkhū, tsî ǃgau ge xū-eb ge ǂaidi âb ǀkha ge dākākā, tsîb ge nau ǀgurugu ǁîb aiǃâ ge hâ igu hoaga xu ge ǃgō i, tsîb ge disi ǁnâga ge ūhâ i.

⁸Tita ge ǁnâga ǃgaoǃgâ tsî ge mû, ǀnî ǂkhari ǁnârob ge ǁîgu ǁaegu ge ǀkhī, tsî ǃnonagu nau ǁnâgu digu ge ǁîb aiǃâ ge ǂgaeǂuihe; tsî mû ǁnā ǁnâb ǁkhāb ǃnâ di ge mûdi khoen mûdi khami īde ge hâ i tsî ams, kai xūna ra ǃhoasa.

⁹Nēna ta ge ge kō trondi ge ǂnûihe tsî Kairab tsēde ūhâb ge ǂnûs kōse, sarab âb tsamaros kōse a ǃurib tsî ǀûn danas âb din ǃanu ǀûn khami ge ība; trons âb ge ǀaeǁhabu ge i tsî ǁîs di ǀnūde khau hâ ǀae.

¹⁰ǀAexa ǃāb ge dâu tsî ǁîba xu ge ǂoa, ǀoadisin di ǀoadisin ge ǁîba gere ǃoaba tsî disi ǀoadisin di disi ǀoadisin ge ǁîb aiǃâ ge mâ i; ǀgoraǃgâs ge ge dīhe tsî ǂkhanidi ge ge khobahe.

¹¹ǃNubai ta ge tita ge kō, dommi ǁnā kai mîdi, ǁnāb ra ǃhoadi ǃaroma; tita ge ge kō ǀgurub ge ǃgamhe tsî soros ab ge hîkākāhe tsî māǁnâhes kōse, ǀaes ǃnâb nî khauǃkhūhese.

¹²Tsî nau ǀgurugu on xasa: ǁÎgu di gaosib ge ge ūbēhe, ǁîgu ge ǃnūǃnūbahe xui-ao ǁaeb tsî iri kōse.

¹³ǃAruǀî ta ge tita tsuxu-aidi ǃnâ kō tsî ge mû, ǀhommi di ǀnanudi ǀkhab ge ǀguib, Khoen Ôab khami ība ge hā, tsî ǁîb ge Kairab tsēde ūhâb kōse ge hā, tsîn ge ǁîba aiǃâb kōse ge ǀgū kai.

¹⁴Tsî ǁîb ge ǁkhāsib tsî ǃgôasib tsî gaosib tsîna ge māhe; ǁaedi tsî ǃhaodi tsî namdi hoadi tsîn ǁîba nî ǃgôase; ǁîb di ǁkhāsib ge a ǀamo gaosi, tātsē kā tidesa, tsî ǁîb di gaosib ge hîkākāhe tide.

¹⁵Tita Danielta di gagas ge soros di ǃnāb ǃnâ ge ǃkhāǃganuhe, tsî aidi ti danas didi ge ge ǃhuriǃhuri te.

¹⁶O ta ge ǀguib ǁnā mân diba ǀgū tsî nēn hoan ǂama ǁaposasiba ge ǂgaoǀkhā. Ob ge ge mîba te tsî ǁguiǃās nē ǃkhaidi disa ge ǂanǂan te.

¹⁷Nē kai ǀgurugu hakagu ge haka gao-aogu, ǃhūbaiba xu nîra khâimaga.

¹⁸Xawe ǃanun Hoan xa ǀGapib din ge gaosiba nîra ǃkhōǃoa, tsî ǁîn ge gaosiba ǀamosib kōse nîra ūhâ, ā, ǀamosigu di ǀamosib kōse.

¹⁹ǃNubai ta ge tita amab hakaǁî ǀgurub, naugu hoaga xu ǃgōse īb, kaise a ǃhuriǃhurisab, ǂnūǀuriǁgûga ūhâb, ǂaiǁkhorab hapu rab tsî ǂkhūǂkhū rab tsî ǃgau ge-e ge dākākāb di-e ge ǂan ǂgao.

²⁰Tsî ǁkhāti ǁnā disi ǁnâgu danas âb ai hâgu tsî naub ǀkhī geb tsî ǁîb aiǃâ gu ge ǃnona ǁnâga ǁnāǂoab, ǁnā ǁnâb hîa mûra ūhâb tsî ams kai xūna ge ǃhoasa, soros âb horesagu ǃgâ-ai kai ge ība.

²¹Tita ge ge mû, ǁnā ǁnâb ra ǃanun ǃoagu torodī tsî ǁîna dan ǃkhaisa.

²²ǁNā Kairab tsēde ūhâb ge hā, tsî ǀgoraǃgâs ge ǃanun Hoan xa ǀGapib dina māhe tsî mîmâihesa ǁaeb, ǃanun nî ǁîb ai gaosiba hōs dib ge hās kōse.

²³ǁÎb ge nēti ge mî: Hakaǁî ǀgurub ge hakaǁî gaosisa nîra ī, ǃhūbaib ai nau gaosidi hoade xu ǃgōse nî ība; tsîs ge ǁîba ǃhūbaib hoaba nîra hapu tsî ǁîba nîra dāǃgâ tsî ǁîba nîra ǂkhūǂkhū.

²⁴Tsî ǁnā disi ǁnâgu xasa: ǁNā gaosisa xu gu ge disi gao-aoga nîra khâima, tsî ǀnîb ge naugu khaoǃgâ nîra khâima, tsî ǁîb ge aiǃâ ge hâ iga xu ǃgōse nîra ī, tsîb ge ǃnona gao-aoga nîra ǃgamǃgam.

²⁵Tsîb ge mîde nîra ǃhoa Hoan xa ǀGapib ǃoagu tsîb ge ǃanun Hoan xa ǀGapib dina nîra hîkākā, tsîb ge, ǁaegu tsî ǂhanub tsînab a ǀkharaǀkhara ǁkhā, ti nî ǂâi, tsîn ge ǁîna ǃomǁaeb âb ǃnâ nîra māǁnâhe ǀgui ǁaeb tsî ǁaegu tsî ǁaeb di ǃkhareb kōse.

²⁶ǁNās khaoǃgâ gu ge ǀgoraǃgâsa ra dīga nîra ǂnû, os ge gaosis âba nîra ūbēhe, ǁîsa ra hîǀhuru tsî hîkākāse ǀunis kōse.

²⁷Xawe gaosib tsî gaos tsî kaisib ǁnā gaosidi ǀhommi hoab ǃnaga hâdi dib tsîn ge ǃanun ǁaes Hoan xa ǀGapib disa nîra māhe; gaosib ân a ǀamo gaosi, tsî gaosidi hoadi ge ǁîba nîra ǃgôa tsî ǁnâuǀnam.

²⁸Nētikōses ge nē mîsa go ǀamǂoa. Tita Danielta xasa: Ti ǂâidi ge kaise ge ǃhuriǃhuri te, tsî ti ǂkhaib ge ti tawa ge ǀkhara, xawe ta ge tita ǁnā mîsa ti ǂgaob ǃnâ ge sâu.