Read Khoekhoegowab Danieli 8 Bible Online

Danieli 8 - Khoekhoegowab bible

Danieli 8

¹ǃNonaǁî kurib gao-aob Belsasari di gaosis dib ǃnâ ta ge tita ai-i xa ge ǂhaibahe, tita Danielta, tsoatsoas ǃnâ ge ǂhaiba te-i ǁkhā-i khami ī-i xa.

²Tsî tita ge ai-i ǃnâ ge kō, tsî i ge ge ī, ǁî-e ta ge kō ǃnubai ta ge tita ǁaposa ǃkhais Susas, Elam ǃhūǃâs ǃnâ ǁgoes ǃnâ hâ ǃkhaisa, tita ge ai-i ǃnâ ge mû ǃāb Ulaib amǃgâ ta hâ ǃkhaisa.

³Tsî tita ge ǃgapakhâi tsî ge kō, tsî mû bairab ge ǁnā ǃāb amǃgâ ge mâ i, ǀgam ǁnâkha ūhâba; tsî ǁnā ǁnâkha ge ǀgapi ge i, tsî ǀguib ge naub ǃgâ-ai ǀgapi ge i, tsî hoan xa ǀgapib ge ǀunis ai ge ǀkhī.

⁴Tita ge ge mû, bairab ǁnâkha ǀkha huriǂoasǀî tsî ǀapasǀî tsî ǃkhawagasǀî ge ǃkhā ǃkhaisa tsî ǀgoa-i xare-i ge ǁîb aiǃâ ge mâ ǁoa i tsî khoe-i ǁîb ǃomǁaeba xu ore ǁkhā-i ge ge ǀkhai i; tsîb ge ǂgaob ra khami ge dī, tsîb ge ge kaikaisen.

⁵Tsî nēn xa ta ra ǂâiǂâisen hîa, mû, ob ge piriba huriǂoasa xu ǃhūbaib hoaragab ǂama ge hā, tsîb ge ǃhūba tsâǀkhā tama ge hâ i; tsî ǁnā pirib ge mûhesa anu ǁnâba mûra âb ǁaegu ge ūhâ i.

⁶Tsîb ge ǁnā bairab, ǀgam ǁnâkha ūhâb, ǃāb amǃgâb mâ ǃkhaisa ta ge mûb tawa ge hā; tsîb ge ǁgôasib ǀgaib âb dib ǀkha ǁîb ai ge ǃkhoesī.

⁷Tsî tita ge ǁîb ra bairaba ǀgū ǃkhaisa ge mû, tsîb ge ǁîb ǃoagu ge au-ausen, tsîb ge bairaba ge ǃkhā, tsîb ge ǁnâkha âba ge khôa; tsî bairab ge ǁîb di ais aiǃâb nî mâ ǁkhāse ī ǀgai-i xare-e ūhâ tama ge hâ i; ob ge ǁîba ǃhūb ai ge ǃgau tsî ǁîba ge dāǃgâ, tsî khoe-i bairaba nî ǁîb ǃomǁaeba xu ore-i xare-i ge ge ǀkhai i.

⁸Ob ge bairaba ǃnā hâse ge kaikaisen; tsî ǀgaisab ge ǃnubaib ge ǁnā kai ǁnâba ge khôa, tsî gu ge haka mûhesa anu ǁnâga ǁîb di amǃnâs ai ge ǀkhī haka ǂoagu ǀhommi digu ǃoa.

⁹Tsî ǁîgu di ǀguiba xub ge ǂkhari ǁnâroba ge ǀkhī, ǃnā hâse ge kaiba ǃkhawagasǀî tsî aiǂoasǀî tsî îsa ǃhūbǀî.

¹⁰Tsîb ge ǁîba ǀhommi di ǂnubis kōse ge kai; tsîb ge ǀnîdi ǁnā ǂnubidi didi, ǁnāti ge ǀgamirode, ǃhūb ai aoǁgui tsî ǁîde ge dākākā.

¹¹A, ǁîb ge gaosab ǁnā ǂnubis dib kōse ge kaikaisen, tsî ǁîba xus ge tsēkorobe ǁguibasa ge ūbēhe, ǁanǃkhais ǁîb di ǃanusib dis ge ge aoǁguihe.

¹²Tsî ǂnubisab ge ǁîba ge māhe tsēkorobe ǁguibas ǃoagu ǁnāǁgôas ǃaroma; tsîb ge amaba ǃhūb ai ge aoǁgui, tsîb ge ǁî ǃkhaisa ge dī, tsîb ge ǃgâise ge amǁnā.

¹³ǁNās khaoǃgâ ta ge ǀgui ǃanub ra ǃhoasa ge ǁnâu; tsî ǀnî ǃanub ge naub ǃhoa rab ǃoa ge mî: Matikōses kha ǁnâi ǁnā ais tsēkorobe ǁguibas dis tsî hîǀhurusa ǁnāǁgôas disa nîra hâ; ǃanusib kas ǂnubis kas hoas nî dākākāsa māǁnâhese?

¹⁴Ob ge tita ǃoa ge mî: ǀGamǀoadisi tsî ǃnonakaidisi ǃoedi tsî ǁgoadi tsîdi kōse; ǃnubaib ge ǃanusiba nîra ǂhanu-ai kaihe.

¹⁵Tsî i ge ge ī, nē aisa ta ge tita Danielta kō ǃnubai ta ge ǁnâuǃāb âsa ge ôa, tsî mû, ob ge ǀguib, ao-i īsi-e ūhâba ti aiǃâ ge mâ i.

¹⁶Tsî tita ge khoe-i di domma Ulaib ǁaegu ge ǁnâu; ǁîb ge ǂgai tsî: Gabrieltse, nē aisa nēba ǁnâuǃā kai, ti ge mî.

¹⁷Ob ge ǁîba tita mâ ǃkhais xōǀkhā ge hā; tsî hāb geo, o ta ge tita ge ǃhuri tsî ais âtas ai ge ǁnā. ǃNubaib ge ǁîba tita ǃoa: ǁNâuǃā, sats khoenôa ǀgôatse, nē ais nî ǀuni ǁaeb dise ī ǃkhaisa, ti ge mî.

¹⁸Tsî tita ǀkhab ra ǃhoa hîa ta ge tita ǂoms xa ge hāhe, ti ais ai ǃhūb ai ǁgoeǃâ; ǃnubaib ge ǁîba tita ge tsâǀkhā tsî ti mâǃkhais ai ge mâi te.

¹⁹Tsîb ge ge mî: Mû, tita ge satsa nî ǂanǂan nē ǁgôasib di ǀunis ai nîra īna, mîmâihesa ǁaeb ais nî ǀamsa hā xui-ao.

²⁰ǁNā bairab ǀgam ǁnâkha ūhâb, sats go mûb, ge gao-aogu Medeǁîn tsî Persiaǁîn diga.

²¹Tsî ǁnā ǀûxa pirib ge gao-aob Grikeǁîn ǃhūb diba; tsî ǁnā kai ǁnâb mûra âb ǁaegu hâb ge ǂguro gao-aoba.

²²Tsî hakagu ge ǁîb di amǃnâs ǃnâ, ǁîb ge khôa ǃnubai, mâ is ra ǁgauǂui: Haka gaosidi ge ǁnā ǁaesa xu nîra ǀkhī, xawe ǁîb di ǀgaib ǀkha tama.

²³Tsî ǀams ǁîgu di gaosis dis ai ǁnāǁgôasan ga ǃnūse sī ǃnubaib ge ǀgui gao-aob ǃgari-aiba nîra khâi tsî ǀhae-aide nîra ǁnâuǃā.

²⁴Tsî ǀgaib âb ge nîra kai, xawe ǁîb di ǀgaiba xu tama; tsîb ge buruxase nîra hîǀhuru tsî nîra ǃgâiǃgâ tsî ǁî ǃkhaisa nîra dī; tsîb ge ǀgaisana ǃanu ǁaes ǀkha nîra hîkākā.

²⁵Tsî gā-aisib âba xub ge gāxaǃnâsiba ǃomǁaeb âb ǃnâ nîra amǁnā; tsîb ge ǂgaob âb ǃnâ nîra ǀgapiǀgapisen; tsîb ge ǃnōsa sâb ǃnâ ǀoasana nîra hîkākā tsî gaosagu di gaosiba nîra mâǃoa; xaweb ge ǁîba ǃom-i ose nîra khôahe.

²⁶Tsî ǁnā ais ǃuis tsî ǁgoas tsîra dis, mîhe ges, ge a ama; tsî satsa nē aisa ǂganam, ganupe di tsēde a ǂgui xuige.

²⁷ǃNubai ta ge tita Danielta ǂkhabu tsî ǀnî tsēde ge ǀaesen; ǁnās khaoǃgâ ta ge tita khâi tsî gao-aob di sîsenna ge dī; tsî tita ge nē ais ǂama ge ǃhurigâ, xawe khoe-i xare-i ge ǁî ǃkhaisa hōǃâ tama ge hâ i.