Read Khoekhoegowab Danieli 9 Bible Online

Danieli 9 - Khoekhoegowab bible

Danieli 9

¹ǂGuro kurib Dariub, Ahasverob ôab, Medeǁîn surib dib, gaosis Xaldeaǁîn dis ǂama ge gao-aodīheb dib ǃnâ,

²ǂguro kurib gaosîsens âb dib ǃnâ ta ge tita, Danielta, ǂkhanidi ǃnâ ge hōǃâ ǀgaus ǁnā kurigu, ǃKhūb mîs ge ǁîgu ǃnâ kēbo-aob Jeremiaba ǃnaebagu dis nîra ǀoa ǃkhaisa, hîǀhurudi Jerusalems didi ǃnâ hûdisi kurigu, ti.

³O ta ge ti aisa ǃKhūbǀî ge unu, ǁîba ta nî ǀgores tsî ǀkhomabasendi tsî ǂûtama hâs tsîn ǀkha ǁhōs tsî tsaob tsîra ǃnâ ôase.

⁴O ta ge ǃKhūb ti Elob ǃoa ǀgore tsî ǁguiǁnâ tsî ge mî: Okha ǃKhūtse, sats ge kai tsî ǃhuriǃhurisa Elots, ǃgaeǀhaos tsî ǃgâidīb tsîra ǁnān satsa ǀnam hân tsî mîmādi âtsa ra dīna ra ǃkhōǀgaipebatsa.

⁵Sida ge ge ǁore tsî ǂkhabase ge dī tsî eloxoresase ge sîsen tsî ge mâǃoa sa mîmādi tsî sa ǂhanuga xu ǁnāǁgôas ǀkha.

⁶Tsî sida ge ǁnâu tama ge i sa ǃgāgu, kēbo-aogu, sa ǀons ǃnâ sida di gao-aogu tsî sida di gaosagu tsî sida di îgu ǃhūb di ǁaes ǃoa ge ǃhoagu ai.

⁷Sats ǃKhūts tawab ge ǂhanu-aisiba hâ, xawe sida tawa taosib aidi diba, nētsē i īs ǁkhās xase Judab di gao-aogu tawa tsî Jerusalems di ǁansaben tsî Israeli hoab din tawa, tsî ǁnān ǀgūse tsî ǃnūse hân tawa, ǁnā ǃhūgu sats ǁîna ǁîgu ǃnâ ǃûǂams ân, sa ǃoagun ge ǃûǂams ǃaroma ge ǀgaruǀgarugu hoagu ǃnâ.

⁸Okha ǃKhūtse, sida tawab kom taosib sida aidi diba hâo, sida gao-aogu tawa tsî sida gaosagu tawa tsî sida îgu tawa, sa ǃoagu da ge ǁore amaga.

⁹ǃKhūb, sida Elob tawan ge ǀkhomxaǂgaosigu tsî ǀûbadi tsîna hâ, ǁîba da ge mâǃoa xawe.

¹⁰Tsî da ge dommi ǃKhūb, sida Elob diba ǁnâuǀnam tama ge i, ǁîb di ǂhanugu, sida aidi aiǃâb ge ǁîb di ǃgāgu kēbo-aogu di ǃomǁaeba xu māgu ǃnâ da nî tanisense.

¹¹Tsî Israeli hoab dida ge ǂhanub âtsa ǃûǂam tsî ge ǁnāǁgôa, sa domma ǁnâuǀnam tamase, ǁnā-amagab ge sida ǂama ǁhōǂuihe hâ ǀâxareb tsî ǁnā nūs, Moseb Elob ǃgāb di ǂhanub ǃnâ xoamâihe hâsa, ǁîb ǃoagu da ge ǁore amaga.

¹²Tsî ǁîb ge ǁîb di mîdi, sida tsî sida ǂhanuǂhanu-aogu, sida ra ǂhanuǂhanugu tsîdab ge ǃhoa-ūde ge ǁapoǁapo; kai tsūǃōb, ǁîb khami īb, ge ǀhommi hoaragab ǃnaga tātsē ī tama hâ, sida ǂama ra ūhāǃâ, Jerusalems tawa i ge ī khami.

¹³ǂHanub Moseb dib ǃnâ i xoahe hâs ǁkhās xase da ge sida ǁnā ǂkhabab hoab xa ge hāǂamhe, xawe sida ge ais ǃKhūb sida Elob disa ǀkhomabasen tama ge i, sida di ǂhanuoǃnâsiga xu oa tama tsî sida di amab ai ǃgaoǃgâ tamase.

¹⁴ǁNā-amagab ge ǃKhūba ǂkhabab ǂama ǂkhaikari ge hâ i, tsîb ge sida ǂama ge hā kai bi: ǃKhūb sida Elob, ǁîb di sîsengu, dīb ge gu hoagu ǃnâ a ǂhanu-ai xui-ao, sida ge dommi âba ǁnâuǀnam tama i amaga.

¹⁵Tsî nēsi, sats ǃKhūts, sida Elots, sa ǁaesa ge Egipteǃhūba xu ǀgaisa ǃommi ǀkha ǂgaeǂguiǂuits, tsî ǀonsa ge dībasentse, nētsēs ǁîsa ī khami; sida ge ge ǁore, sida ge eloxoresa ge i.

¹⁶Okha ǃKhūtse, a kha sa ǂhanu-aisigu hoagu ǃoa sa ǁaib tsî sa ǁgôasib tsîkha ǁkhaedawahe sa ǃās Jerusalemsa xu, sa ǃanu ǃhomma xu; sida ǁoren ǃaroma tsî sida di îgu di ǂhanuoǃnâsigu ǃaromas ge Jerusalems tsî sa ǁaes tsîra ge sida ǂnamipe hân hoana ǃharaxūsase ība ǃkhaisa.

¹⁷Tsî nēsi, o sida Elotse, ǁnâu re ǀgores sa ǃgāda disa tsî ǁîda di ǀkhomabasende, îts ais âtsa ǃnâǃnâ sa ǃanusib hîǀhuruhe hâb ǂama; sats a ǃKhū, xuige dī.

¹⁸Sa ǂgaesa ǂō, ti Elotse, îts ǁnâu, sa mûra khowa îts kō sida di hîǀhurude tsî ǁnā ǃās sa ǀons ǃoa ǂgaihe hâsa, sida di ǀkhomabasende da ge sida di ǂhanu-aisigu ai sa aiǃâ aoǁgui tama i tsî ra sa ǀkhomxaǂgaosigu kaigu ai aoǁgui xuige.

¹⁹O ǃKhūtse, ǁnâu re, o ǃKhūtse, ǀûba re, o ǃKhūtse, ǃgaoǃgâ îts ǁî ǃkhaisa dī, îts tā ǀhawe sats ǂûts ǃaroma, ti Elotse, sa ǃās tsî sa ǁaes tsîra sa ǀons ǃoa ǂgaihe hâ xuige.

²⁰Ganupe ta tita ra ǃhoa tsî ra ǀgore tsî ti ǁoreb tsî ti ǁaes Israels di ǁoreba ra ǁguiǁnâ tsî ti ǀkhomabasende ǃKhūb ti Elob di ais aiǃâ ra aoǁgui hîa, ti Elob di ǃanu ǃhommi ǃaroma;

²¹ā, ganupe ta tita ǀgores ǃnâ ra ǃhoa hîab ge ǁnā aob Gabrieli, tsoatsoas ǃnâ ta ge ai-i ǃnâ mûba ǃnoesase ge ǁkhana hā, tita ra tsâǀkhāse, ǁaupe ǃuiǁguibas di ǁaeb ai.

²²Tsî ǁîb ge ǁgau te tsî ge ǃhoa-ū te tsî ge mî: Danieltse, nēsi ta ge tita go ǂoaxa, ǁî xūna ta nî ǁnâuǃā kai tsise.

²³Tsoatsoas sa ǀkhomabasendi dis ǃnâs ge mîsa go ǂoaxa, o ta ge tita go hā, ǁîsa ta nî ǂanǂan tsise, kaise ǀnamǀnamsa aots a amaga; ǁnâi ǁnâuǃā nē mîsa îts ǃgaoǃgâ nē ais ai.

²⁴Hûdisi wekhegu ge mîmâihe hâ sa ǁaes ǂama tsî sa ǃanu ǃās ǂama, ǃûǂams nî ǂganamhega tsî ǁoren nî ǂganamǀgaiǀgaihese tsî ǂhanuoǃnâsib nî ǂkhîǂkhîhese tsî ǀamo ǂhanu-aisib nî ūhāhese tsî ais tsî kēbo-aob tsîra nî ǂganǀgaiǀgaihese tsî ǃanusigu di ǃanusib nî ǂkhauǀkhāhese.

²⁵ǂAn ǁnâi îts ǁnâuǃā; mîs di ǃgûǂoaxasa xu: Oa tsî du nî Jerusalemsa ǂnubisa xu Mesiab gaosab kōse gu ge hû wekhega hâ tsî ǃnanidisiǀgamǀa wekhegu; o gu ge ǃgangu tsî āgu tsîga ǁkhawa nîra ǂnubihe, xawes ge ǁîsa ǂōǂōsib ǁaegu dib ǃnâ nîra ī.

²⁶Tsî ǁnā ǃnanidisiǀgamǀa wekhegu khaoǃgâb ge Mesiaba nîra ǃhomǂuihe, xawes ge ǁîsa ǁîb ǂûba ība tide; tsî ǁaes gaosab, hā nîb dis ge ǃās tsî ǃanusib tsîra nîra hîkākā tsî ǁîb ge dâu-īǂam ra dâub ǃnâ nîra ǀamǂoa; tsî ǀunis kōseb ge toroba nîra hâ tsî ǁaposase ǂâibasenhe hâ hîǀhuru-aidi tsîna.

²⁷Tsî ǂguinab ge ǁîba ǀgui wekheb kōse ǃgaeǀhaosa nîra ǀgaiǀgaiba; tsî ǃkhareb wekheb dib aib ge ǁîba ǂāǁguibas tsî ǂûǁguibas tsîra nîra toa kai tsî ǃhuriǃhurisa ǁgabob ǂamab ge hîǀhuru-aoba nîra hâ dītoas ǁaposase ǂâibasenhe hâs, hîǀhuru-aob ǂama nîra hās kōse.