Read Khoekhoegowab Hoseab 10 Bible Online

Hoseab 10 - Khoekhoegowab bible

Hoseab 10

¹Israeli ge a ǀkhaexaǃnâ ǂauxûiǂûhai, ǁîb ra ǂûtanibasen, ǁîb di ǂûn ra ǂguiǂguisens kōseb ge altarde ge ǂguiǂgui; ǃhūb âb ra ǃgâibahes kōsen ge ǂnûikhâihesa īga ge ǃgâiǃgâi.

²ǁÎn ǂgaob ge a ǂkhaba, on ge nēsi nîra hîǀhuruhe. ǁÎb ge altardi âna nîra khôaǁnâ, ǁîb ge ǂnûikhâihesa īgu âna nîra hîkākā.

³On ge ǁnāǃnubai nîra mî: Sida ge gao-ao-i xare-e ūhâ tama hâ; sida ǃKhūba ǃao tama xui-ao; tsî tare-eb kha gao-aoba nî dība da?

⁴ǁÎn ge mîde ge ǃhoa, ǂkhabase ra nūǃâ ǃgaeǀhaodīs ǃnâ; ǁnā-amagas ra ǀgoraǃgâsa ǃgāxa ǁhao-i axase ǃam, ǃhanab di ǃhūǃgaoǃgoagu ǃnâ.

⁵ǁAnsaben Samarias din ge Bet-Avens di tsâub ǂama nîra ǃhuri; ǁîb di ǁaes ge ǁîb ǂama nîra ǃoa ǁgôa-elopristergu âb ǀkha, ǁîb ǂama ge ǃgâiaǂgaoga, ǁîb di ǂkhaisib ǂama ǁîna xub ge bē ǃkhais ǃaroma.

⁶Ā, ǁîb ǂûb ge Asiriaba ǃoa nîra ūǃgûhe gao-aob Jareb di ǃnarexūse; Efraimmi ge taob xa nîra ǃkhōhe, tsî Israeli ge taob xa nîra dāhe ǁîb di ǀape-ais xa.

⁷Gao-aob Samarias dib ge a ǀkhai, goab ǁgam-i ai hâb khami.

⁸Tsî ǀgapigu Avens digu, Israeli ǁoregu ge nîra hîkākāhe; ǁkhūn tsî ǀgamin tsîn ge ǁîn altardi ai nîra ǁhao, tsîn ge ǃhomgu ǃoa: ǃGū-ai da re! tsî ǃnomdi ǃoa: ǁNā-aida re! ti nî mî.

⁹Gibeas di tsēde xus ge sats Israelts ge ǁoresa, ǁnāpan ge sī ge mâ; Gibeas tawa ǂkhabasib di ôana ra ǃkhamū ǃkhams xan ge ǁîna tsâǀkhāhe tide.

¹⁰ǂGao ta kao, o ta ge ǁîna nî ǃgae; tsî ǁaedi ge ǁîn ǃoagu nîra ǀhao, ǁîna ta ga ǃgae ǃnubai, ǀgam ǁorekha ân ǃaroma.

¹¹Efraimmi ge a dāǃnâ ǁkhā tare tsâu, amaga ta ge tita îsasib ǁîs ǃaob diba ge ǃgû-īǂam. Tita ge Efraimma nîra ǂgae kai, Judab ge nîra ǃhūǃgao, Jakob ge nîra ǃhūǂhauǂhaubasen.

¹²Tsorobasen du re ǂhanu-aisib ǃoa, ǃgaobasen du re ǃgâidīb ǃoa; ǀasa ǃhana-e ǃhūǃgaobasen du re, ǃKhūba du nî ôa ǁaeb go hā xuige; ǁîb ge nîra hā ǂhanu-aisibab nîra ǀapiǂam kai dus kōse.

¹³Sadu ge eloxoresasiba gere ǃhūǃgao, ǂkhabasiba gere ǃgaobasen tsî ǂhumigu di ǂûba gere ǂû; sadu daob ai du ge ǂgomaiǂnûi xui-ao, sadu ǁē-aogu di ǂguisib ai.

¹⁴ǁNā-amagab ge kai toroǂkhupiba nîra ī sa ǁaedi ǃnâ, tsî sadu di ǁaposa ǃkhaidi hoadi ge nîra hîkākāhe, Salmanni ge Bet-Arbelsa torob ǁaeb ai hîkākās xase; ǁgûs ge ǀgôagu ǀkha ge ǂkhūǂkhūhe.

¹⁵ǁNās ǁkhās xases ge Bet-Elsa sado ge dī-ū, sadu ǂkhabasib di ǂkhabasib ǂama; Israeli gao-aob ge ǁgoaǂnobos ǃnâ ǃhomǂuiǃarihe hâ.