Read Khoekhoegowab Hoseab 11 Bible Online

Hoseab 11 - Khoekhoegowab bible

Hoseab 11

¹Israeli a ǂkham hîa ta ge tita ǁîba ge ǁâ, tsî tita ge ti ôaba Egipteba xu ge ǂgai.

²ǁÎgu ge ǁîna ge ǂgai, xawen ge ais âga xu ge bē; ǁîn ge Baalga ǁguiba tsî ǃgaohesa īga ge ǀanǀanba.

³Tita ge Efraimma ge ǃgû ǁkhā kai xawe; tsî tita ge ǁîna ti ǁôakha ai ge ū, xawen ge tita ǁîna ra ǂgauǂgau ǃkhaisa mûǂan tama ge i.

⁴Tita ge ǁîna khoesi tsurigu ǀkha ge ǂgae, ǀnammi di tsurigu ǀkha, tsî ta ge ǁîna ǃnaoba ǃnanigu âna xu ra ūkhâi-i axase ge ība tsî tita ge ǁîba ge ǂûmā.

⁵ǁÎb ge Egipteǃhūb ǃoa ǁkhawa oa tide, xawe Asiriab ge nî ǁîb di gao-ao; ǁîn ra ǃhobasensa ǂkhā amaga.

⁶Ob ge gôaba ǃādi âb ǃnâ nîra hâ tsî daoǁkhaedi âba nîra ǂû tsî hapu, ǁîn di ǀape-aidi ǃaroma.

⁷Ti ǁaes ge tita xu ǁnāǁgôas ai ǂgāsen hâ xui-ao; ǁîn ra Hoan xa ǀGapib ǃoa ǂgai, xawen ge ǁîba kaikai tama hâ.

⁸Mati ta kha tita satsa nî māǁnâ, Efraimtse, mati ta nî xū tsi, Israeltse? Mati ta kha Admas khami nî dī tsi tsî Seboims khami nî ǂnûi tsi? Ti ǂgaob ge ti ǃnâ dawaǃkhupusen hâ, ti ǃhausens hoas ge ǀgui ǂhubi hâ.

⁹Xawe ta ge tita ǀgamsib ti ǁaib diba sîsenǂui tide; tita ge Efraimma ta nî hîǀhuruga ǁkhawa hā tide; tita a Elo tsî khoe tama amaga, ǃAnub ge sa ǁaegub ǃnâ hâ, o ta ge tita ǁîb ǀkha ǃās ǃnâ sī tide.

¹⁰ǁÎn ge ǃKhūba nîra saoǃgon; ǁîb ge xammi axase nîra ǃoro; ǁîb ga ǃoro-o, on ge ǀgôana ǀkhū rase huriba xu nîra hā.

¹¹ǀKhū raǃân ge ǁîna aniro-i axase Egipteba xu nîra hā, ǂnabu-i axase Asiriab ǃhūba xu; tsî tita ge ǁîna omdi ân ǃnâ nîra ǁan kai, tib ra ǃKhūba mî.