Read Khoekhoegowab Hoseab 12 Bible Online

Hoseab 12 - Khoekhoegowab bible

Hoseab 12

¹ǁNān Efraimmi din ge tita ǂhumib ǀkha ge xāǂgā tsî Israeli ommi dina gāxaǃnâsib ǀkha; xawe Judab din ge ganupe Elob tawa ge ǃkhōǀgaipebasen tsî îǂhôa ge i ǃanun ǀkha.

²Efraimmi ge ǂoaba ǂû tsî aiǂoas di ǂoaba ra sauruǃgon; tsēs hoasab ra ǂhumib tsî hîǀhurudi tsîna ǂguiǂgui; tsîn ra ǃgaeǀhaosa dī Asiriab ǀkha, tsî olib ge Egipteb ǃoa ra ūsīhe.

³ǁKhātib ge ǃKhūba ǂnoagu-ai-e ūhâ Judab ǀkha, tsî ǁîb ge Jakoba nîra ôaǃnâ daogu âb ī xase, dīgu âb ī khamib ge ǁîba nîra mādawa-am bi.

⁴ǁGûs di ǃnāb ǃnâb ge ǃgâsab âba ǃnôara tawa ge ǃkhō, tsî ǀgaib âb ǃnâb ge gaosase Eloba ge tanisenba.

⁵Ā, ǁîb ge gaosase ǀHomǃgāba tanisenǀî tsî ge dan bi; ǁîb ge ā tsî ge ǀkhoma bi. Bet-Els tawab ge ǁîba ge hō tsî ǁnāpab ge ǁîba ge ǃhoa-ū da.

⁶Tsî ǃKhūb, ǂnubidi di Elob, ǃKhūb tib ge ǁîba ǀon hâ.

⁷Satsa ǁnâi ǃhobasen sa Elob ǃoa, îts ǃgâidīb tsî ǂhanub tsîkha sâu, îts sa Eloba ǃâuhâhâ.

⁸ǁAma-aob di ǃommi ǃnâs ge gāxaǃnâ ǀguiro-ūxūsa hâ, ǁîb ge ǁgâiǀāsa a ǀnam.

⁹Xaweb ra Efraimma mî: Ti i ī xawe ta ge ge ǃkhū, xawe ta ge ge xūxa; ti xūreb hoab ǃnân ge ǂhanuoǃnâsi-i xare-e hō tide, ǁorese ī-e.

¹⁰Xawe tita ge ǃKhūta sa Elota Egipteba xu; tita ge gorose tentomdi ǃnâ nîra ǁan kai tsi, ǀhûs di tsēdi khami.

¹¹Tsî tita ge kēbo-aogu ǃoa nîra ǃhoa; tsî tita ge aide nîra ǂguiǂgui; tsî kēbo-aogu di ǃoabasa xu ta ge tita ǂkhōde nîra mâi-aiǃâ.

¹²Amases ge Gileadsa a ǂhanuoǃnâsi; ǁausin ǀguin ge a ǁî. Gilgals tawan ra gomaga ǁguiba; altardi ân ge ǀuiǁkhopogu khami ī ǃhanagu di ǃhūǃgaogu ai.

¹³Jakob ge ǃaub Siriab dib ǃoa ge ǃhū, tsî Israeli ge tara-i ǃaroma gere ǃoaba tsî tara-i ǃaroma gere gūre.

¹⁴Tsî kēbo-aoba xub ge ǃKhūba Israela Egipteba xu ge ǂgaeǂguiǃapa, tsî kēbo-aoba xub ge ǁîba ge ǃû.

¹⁵Xawe Efraimmi ge ǁîba ama ause ge ǁaiǁai; ǁnā-amagab ge ǀaob âba ǁîb ai nîra hā kai, tsî ǃKhūb âb ge ǁîba ǁîb di ǃharaxūba nîra mādawa-am.