Read Khoekhoegowab Hoseab 13 Bible Online

Hoseab 13 - Khoekhoegowab bible

Hoseab 13

¹Efraimmi ge ǃhoao, on ge khoena ge ǀkhū, ǁîb ge ge ǀgapiǀgapisen Israeli ǃnâ, xaweb ge Baali tawa ǀhapixa tsî ge ǁō.

²On ge nēsi ǃaruǀîǀgui gere ǁore, tsîn ge ǀhaiǀurib ân xa ǂnâhesa ī-e ge dībasen, ǁgôa-eloga ǁîn ǁnâuǃāb ǃoa, ǀuriǂnau-aob sîsenni ǀguiba, ǁîgu xan ra mî: ǁNā khoen, ǁguiba ran, ge tsâuga ra ǁoa.

³ǁNā-amagan ge ǁîna ǁgoaǀnanu-i khami nîra ī, ǃnauǁgoaga ra ǀkhī ǀau-i hîa ra kā-i khami, ǀapob ra dāǃnâǃkhaisa xu tsî ǀanni ra ǀanǂoa daoba-ū ǃgombēhe khami.

⁴Xawe tita ge ǃKhūta, sa Elota, Egipteǃhūba xu; ǁnāxats ge tita ǀgui ta ose ǀnî Elo-i xare-e ǂan tide, ǀnî hui-ao-i xare-i a ǀkhai, tita ǀguita.

⁵Tita ge satsa ge ǂan ǃgaroǃhūb ǃnâ, îbe a ǀgamsa ǃhūb ǃnâ.

⁶ǁNās khaoǃgân ge ǁîna ǃû-ais ân ī xase ge ǁâ; tsî ǁân geo, ob ge ǂgaob âna ge ǀgapiǀgapisen; ǁnā-amagan ge tita ge ǀuru.

⁷O ta ge tita ǁîna ge ǃgari xam kaiba, ǀgarub khami ta ge tita daob amǃgâ ge ǃapi.

⁸Tita ge ǁîna bērs ǂkhamna ūǀhanahe hâs axase ge ǃoa, tsî ǂganamxūs ǁîn di ǂgaob disa ge ǀkhau; tsî tita ge ǁîna ǁnāpa kaira xammi axase ge hapu; ǀgurun ǃaub din ge ǁîna ge ǀkhauǃā.

⁹ǁÎ ǃkhais ge sats, Israeltsa ge ǁgaoǁgao, sa huib ti ǃnâ hâ xui-ao.

¹⁰Mapab kha nēsi hâ sa gao-aoba? Ab ǁîba hui tsi sa ǃādi hoadi ǃnâ. Tsî sa ǂhanuǂhanu-aoga, ǁîgu xats ge: Gao-ao-i tsî gaosa-e mā te re! ti mîga?

¹¹O ta ge tita satsa gaosa-e ge mā ti ǁaib ǃnâ tsî ǁî-e ge ūbē ti ǁgôasib ǃnâ.

¹²Efraimmi di ǂhanuoǃnâsib ge ǃgaeǁaehe hâ, ǁîb di ǁoreb ge sâuǁguihe hâ.

¹³Tsûgu ǁora ra tara-i digu xab ge ǁîba nîra hāǂamhe; ǁîb ge gā-ai tama ǀgôa; ǁnā tamas ka io, ob ga ǀgôaǁoras di ǁaeb ǃnâ ga mâ hâ tide xui-ao.

¹⁴Tita ge ǁîna ǀgaib ǀamoǀaeb diba xu nîra ore; tita ge ǁîna nîra ǃnoraǃnora ǁōba xu; o ǁōtse, mapa gu kha hâ sa ǂhīǁōga, o ǀamo ǀaetse, mapab hâ sa ǁgaoǁgaosiba? ǃHausens ge ti mûra aiǃâ ǂganǃgâsase nîra hâ.

¹⁵ǁÎb ge ǃgâsagu âb ǃnâ nîra ǂûtanixa; xawe aiǂoas di ǂoab ge nîra hā, ǃKhūb di ǂoab ge ǃgaroǃhūba xu nîra ǀkhī, tsaus âb ge nîra ǂnâ tsî ǀaus âb ge nîra ǃkhoro xui-ao, ǁîb ge ǁuib ǃgomǀgausa ommi xūn dib hoaba nîra ǃnari.