Read Khoekhoegowab Hoseab 14 Bible Online

Hoseab 14 - Khoekhoegowab bible

Hoseab 14

¹Samarias ge nîra ǃū-aisa, ǁîn ge Elob âna mâǃoaxa i xui-ao; ǁîn ge gôaba xu nîra ǁnā; ǀgôaron ân ge nîra ǂkhūǂkhūhe tsî ǀgamǀkhā hâdi ân ge nîra ǁnoehe.

²ǃHobasen re, Israeli dido, ǃKhūb sadu Eloba ǃoa: Sadu ǂhanuoǃnâsib ǃaroma du ge ǁnā xuige.

³Nē mîde ūǀhao î du ǃKhūb ǃoa ǃhobasen, î du ǁîb ǃoa mî: Ūbē ǂhanuoǃnâsib hoaba, îts ǃgâiba ǁkhā kai da, o da ge ǁgōgu sida amǁgaugu diga nîra matare tsi.

⁴Asiriab ge sida sâu tide, sida ge hāgu ai ǃgapi tide, tsî sîsenni sida ǃomgu dib ǃoa ǃaruǀî: Sats ge a sida Elo, ti mî tide. ǃOaǀgôa-i kom sa xa ra ǀkhomheo.

⁵Tita ge ǁîn ǁnāǁgôaside nîra ǂuruǂuru, tita ge māsenxase ǁîna nîra ǀnam, ti ǁaib ge ǁîna xu oa xui-ao.

⁶Tita ge Israeli dina ǀause nîra ība, ǁîn ge nîra ǃkhā leliǃkhās axase, tsîn ge ǁîn ǃnomaga nîra ǃnomaǃkhō kai Libanonni axase.

⁷ǂGonagu ân ge nîra ǀkhī, tsî ǂkhaisib ân ge ǀkherahais dib axase nîra ī, tsîn ge Libanonni axase nîra ham.

⁸ǁÎn ge, sommi âb ǃnâ nîra ǂnû; ǁîn ge ûiba ǃhoroba nîra ūǀkhība tsî ǂauxûiǂûhais khami nîra ǃkhā, ǂâiǂâisens âb ge ǂauxûib Libanonni dib khami nîra ī.

⁹Efraimtse, tarebe dīxū-e ta kha tita ǃaruǀî ǁgôa-elogu ǀkha ūhâ? Tita ge ǁîba ge ǁnâu-am tsî ǁîba nîra kōǀî; tsî tita ge ǁîba ǃam denehaise nîra ība, sa ǂûn ge ti tawa ra hōhe.

¹⁰Tari-e a gā-ai, a-i nēna ǁnâuǃā? Tari-e a ǁnâuǃāxa, a-i nēna ǂanǃā? ǃKhūb daogu a ǂhanu xui-ao, tsî ǂhanu-ain ge ǁîgu ai nîra ǃgû, xawe ǃûǂamaon ge ǁîgu ai nîra ǁnā.