Read Khoekhoegowab Hoseab 2 Bible Online

Hoseab 2 - Khoekhoegowab bible

Hoseab 2

¹ǂNoagu-ū sadu îsa, ǂnoagu, ǁîs ti tara tama, tsî ta tita ǁîs ao tama xuige; îs ǁîsa ǀaigu âsa ǁîs di aisa xu tsî ǃgamekhôadi âsa ǁîs di samra ǁaeguba xu dībē.

²Î ta tita ǁîsa tā ǀōǀkhāse ǁhûǀkhā, î ta ǁîsa tā ǃnaes ge tsēs ais ge īs xase ǂnûi, î ta ǁîsa tā ǃgaroǃhūse dī, î ta ǁîsa tā ǂnâsa ǃhūse ǂnûi, î ta ǁîsa tā ǁgâs xa ǁō kai.

³Î ta tā ǁîs di ôana ǀkhom, ǁîn a ǀaiǀgôa amaga.

⁴ǁÎn di îs ra ǀai xui-ao, tsî ǁîna ge ǀgamǀkhās ra taotaosase dī, nētis ra mî xui-ao: Ti ǁâsaga ta ge tita nî ǃgûǃgon, ti pereb tsî ti ǁgam-i tsî ti ǀûb tsî ti vlas tsî ti olib tsî ti axūn tsîna ra mā te ga.

⁵ǁNā-amaga mû, tita ge sa daoba ǁkhūgu ǀkha nî ǁgâuǂnamipe, tsî tita ge ǂgoaǃhara-e nî dī, ǁîs di ǃgangas hōǂui tidese.

⁶Os ge ǁîs ǁâsaga nîra ǃkhoeǃgon, xawes ge ǁîga saoǁae tide; os ge ǁîga nî ôa, xawe hō tide; os ge ǁîsa nî mî: Tita ge ǃgû tsî ti aibekam aob ǃoa nî oa, ǁnāǃnubai ta ge nēs ǃgâ-ai ǃgâibahe i xui-ao.

⁷ǁÎs ge ǂanǃā tama ge i, tita ge ǁîsa ǃhorob tsî ǂkhon ǂauxûib tsî olib tsîna mā tsî ǁîs di ǀhaiǀurib tsî ǃhuniǀurib tsîkha, Baalgu ge sîsenūkha ǂguiǂguiba si ǃkhaisa.

⁸ǁNā-amaga ta ge tita ǁkhawa hā tsî nî ti ǃhoroba ǁaeb ai ūbē tsî ti ǂkhon ǂauxûiba ǂnûihesa ǁaeb âb ai; tsî tita ge ti ǀûb tsî ti vlas tsîra nîra tsububē, ǀōǀkhāsib âsa nîra ǃgū-aira.

⁹O ta ge tita nēsi gâresib âsa nî ǂhai kai ǁâsagu âs di mûdi aiǃâ, tsî khoe-i xare-i ge ǁîsa ti ǃomǁaeba xu ore tide.

¹⁰Tsî tita ge ǁîs di dâb hoaba nîra ǀû kai, ǁîs di kaitsēdi tsî ǁîs di ǂkham ǁkhâgu tsî ǁîs di sâtsēdi, ā, ǁîs di ǂnûihesa ǀgapi ǁaegu hoaga.

¹¹Tsî ta ge ǁîs di ǂauxûiǂûhais tsî ǁîs di ǀnomahais tsîra nî hîǀhuru, ǁîra xas ra mîra: Nēra ge a ti ǀai-amǃnâ, ti ǁâsagu xa ta ge māhera; xawe tita ge ǁîra ǁoese nîra dī, o ra ge ǀgurun ǃaub din xa nîra ōhe.

¹²Tita ge ǁîs ǂama tsēdi Baali dide nîra ôaǃnâ, ǁîdi ais ge ǁnāpa gere ǀanǀande tsî ǃūs di î-îxūs ǀkha gere anide tsî ǃaob di î-îxūs ǀkha, tsîs ge ǁâsagu âsa gere saoma, tsîs ge tita ge ǀuru, tib ra ǃKhūba mî.

¹³ǁNā-amaga mû, tita ge ǁîsa nana tsî ǃgaroǃhūb ǃnâ nîra ǂgaeǂguiǂgâ, tsî tita ge ǁîsa ǂgaob âs ī khami nî ǃhoa-ū.

¹⁴Tsî ta ge ǁîsa ǁîs di ǂauxûiǂûǃhanaga nî māǁnâ, tsî Axori di ǃgoaǃnāba ǁāb ǃâubasens dib ase, os ge ǁnāpa nîra ǃeream ǂkhamsis âs di tsēdi ǃnâs gere ǃeream khami, Egipteǃhūba xus ge doeǃapa tsēs khami.

¹⁵Tsî i ge ǁnātsē nîra ī, tib ra ǃKhūba mî, titas nî: Ti ao! ti ǂgai, tsî ǃaruǀî: Ti Baal, ti ǂgai tide ǃkhaisa.

¹⁶Tsî tita ge ǀondi Baalgu dide ǁîs di amsa xu nîra dībē, tsî gu ge ǃaruǀî ǀondi âgu ǀkha ǂgaihe tide.

¹⁷Tita ge ǁnātsē ǁîna ǃgaeǀhao-e nîra dība ǀgurun ǃaub din ǀkha tsî anin ǀhommi din ǀkha tsî ǂhanaben ǃhūbaib din tsîn ǀkha; tsî tita ge khās tsî gôab tsî torob tsîna ǃhūbaiba xu nîra khôaǂkhū tsî ǁîna sâusase nîra ǁgoe kai.

¹⁸Tita ge sas ǀkha nî ǃgamegu ǀamosib kōse; ā, tita ge sas ǀkha nî ǃgamegu ǂhanu-aisib ǃnâ tsî ǂhanub ǃnâ tsî ǃgâixasib ǃnâ tsî ǀkhomxaǂgaosigu ǃnâ.

¹⁹Tita ge sas ǀkha nî ǃgamegu ǂgoms ǃnâ, tsî sas ge ǃKhūba nîra ǂan.

²⁰Tsî i ge ǁnā tsēdi ǃnâ nîra ī, tita nîra ǁnâu-am ǃkhaisa, tib ra ǃKhūba mî; tita ge ǀhomma nîra ǁnâu-am, tsî ǁnāb ge ǃhūbaiba nîra ǁnâu-am.

²¹Tsî ǃhūbaib ge ǃhoroba nîra ǁnâu-am ǂauxûib tsî olib tsîkha ǀkha; tsî ǁîn ge Jesreela nîra ǁnâu-am.

²²Tsî tita ge ǁîna ǃhūb ǃnâ nîra tsorobasen, tsî ta ge tita Lo-Ruxamas ǂama nîra ǀkhomxa; tsî tita ge Lo-Ammib ǃoa: Sas ge a ti ǁae tsî ǁîs ge: Ti Elo! ti nîra mî.