Read Khoekhoegowab Hoseab 4 Bible Online

Hoseab 4 - Khoekhoegowab bible

Hoseab 4

¹ǁNâu du re ǃKhūb di mîsa, sadu Israeli ôado, ǃKhūb ǂnoagu-e ūhâ xuige ǃhūb ǁansaben ǀkha; ǂgomǂgomsasi-i xare-i tsî ǀnam-i xare-i tsî Eloǂan-i xare-i ǃhūb ǃnâ a ǀkhai amaga.

²Nūs ǀguis tsî ǂhumib ǀguib tsî ǃgams ǀguis tsî ǃnaris ǀguis tsî ǃgamekhôas ǀguis; ǁîn ra khôaǂgâ tsî ǀaoǂnâxūs ra ǀaoǂnâxūsa sao.

³ǁNā-amagab ge ǃhūba nîra ǃoa, tsî mâ-i ǁîb ǃnâ ǁan hâ-i hoa-i ge nîra tsanaǁkhui ǀgurun ǃaub din ǀkha tsî anin ǀhommi din ǀkha; ǁkhātin ge ǁaun hurib dina nîra ǀkhai.

⁴Xawe khoe-e a-i tā khoe-e ǀgoraǃgâ tsî ǁkhara; sa ǁaes ǁnān pristeri ǀkha ra ǂnoagun khami ī xuige.

⁵ǁNā-amagats ge satsa tsēa nîra ǃnôa, tsî kēbo-aob on ge tsuxuba nîra ǃnôa; tsî tita ge sa îsa nîra hîkākā.

⁶Ti ǁaes ra hîkākāhe, ǂans ǁîn tawa ǀkhai amaga; ǂansats satsa aoxū hâ amaga ta ge tita sats ona ge aoxū, ti pristersets ǃoaba te tidega; ǂhanub sa Elob dibats ge satsa ǀuru amaga ta ge tita ona sa ôana ge ǀuru.

⁷ǁÎn ge ǂguiǂguisens kōsen ge ti ǃoagu ge ǁore, o ta ge tita ǁîn di ǃgôasiba taob ǃnâ nîra ǀkharaǀkhara.

⁸ǁÎn ra ǁoreb ti ǁaes diba hapu, tsîn ra mâ-i hoa-i âna ǀoms â-i di turab ǀkha ǂhanuoǃnâsib âna ǂgaoǀkhā.

⁹ǁNā-amaga ǁaes ī khamib ge pristeri ona nîra ī; tsî tita ge ǁîb di daoga ǁîb tawa nîra ôaǃnâ tsî dīgu âba ǁîba nîra dīdawa-am.

¹⁰On ge nîra ǂû, xawe ǁâ tide, on ge nîra ǀai, xawe ǂgui tide, ǃKhūba ǃaoǃgâs ǀkhan ge ǀû amaga.

¹¹ǀAib tsî ǂauxûib tsî ǂkhon ǂauxûib tsîgu xab ra ǂgaoba ūbēhe.

¹²Ti ǁaes ra ǁîn di haisa dî tsî ǁgâibasenhais âs ge ǁî ǃkhaisa ǁîna nî ǂanǂan; ǀaigu di gagas ra ǁîna ǂgaeǂhapu xui-aon ra ǁîn di Eloba xu ǀaibē.

¹³ǀGapigu ǁîn ǃhomgu digu ain ra ǁguiba, ǁîn ǃnomdi ain ra ǀanǀan, aik-hai-i ǃgaos kas, populirhai-i ǃgaos kas, terpentinhai-i ǃgaos kas hoasa, ǁî-i sommi a ǃgâi amaga; ǁnā-amaga di ge sadu ôade ra ǀai, tsî sadu ǃgame-aodi ge ra ǃgamekhôa.

¹⁴Tita ge sadu ôade ôaǃnâ tide, ǁîdi ra ǀai amaga, tsî sadu ǃgame-aode, ǃgamekhôa di ra amaga; ǁîdi aogu ge ǀai-aodi ǀkha ra ūǂuisen tsî hoadi xa tsū ǀai-aodi ǀkha ra ǁguiba amaga; tsî ǁnā ǁaes ǁnâuǃā-i xare-e ūhâ tama hâs ge nîra hîhākāhe.

¹⁵Sadu Israeli didu ga ǀai xawe an Judab dina tā ǀhapixa; î du tā Gilgals tawa sī, î du tā Bet-Avens ǃoa ǃapa, î du tā: ǃKhūb a ûitsama ǃkhais ao ti nū.

¹⁶Israeli din ge a ǃkhausa, ǃkhausa gomas khami; ob ge ǃKhūba nēsi ǁîna nîra ǃûsi, ǁkhao-i khami, hara ǃû-ai-i ai.

¹⁷Efraimmi ge ǁgôa-elogu ǀkha ǃgaeǁaesen hâ, ǁnāxū bi re.

¹⁸ǁÎn di ās ge a ǁnāǁgôaxa; ǁîn ra ǀais ǀguisa hî; ǁîn gaosagu ge taotaosa ǃkhaisa a ǀnam.

¹⁹ǂOab ge ǁîna ǁgabogu âb ǃnâ ge ǃgae, on ge ǁîna nîra tao ǁîn ǁguibadi xa.