Read Khoekhoegowab Hoseab 5 Bible Online

Hoseab 5 - Khoekhoegowab bible

Hoseab 5

¹ǁÎ ǃkhaisa ǁnâu re, sago pristergo, î du ǃgaoǃgâ, sadu Israeli ommi dido, î du ǁnâuǃā, sadu gao-aob ommi dido, sadu dis a nē ǀgoraǃgâsa xuige, Mispas tawa du ge ge ǂham kai tsî Tabori tawa ǃāǂuihe hâ ǂham kai amaga.

²Tsî ǁnāǁgôasan ra ǂāsa ǃgamǃgamba; xawe tita ge ǁîn hoana ǂgōǀau-aose nî ība.

³Tita ge Efraimma a ǂan tsî Israeli ge ti aiǃâ ǂganǃgâsa tama hâ, sats Efraimts ra nēsi ǀai tsî Israeli ǂnaoǂnaosen hâ ǃkhaisa.

⁴ǁÎn ge dīgu âna ǁnāti dī-unu tama hâ, ǁîn Elob ǃoan nî ǃhobasen ǃkhaisa, gagas ǀaigu dis ǁîn ǁaegu hâ, tsî ǃKhūban ǀū amaga.

⁵ǁNā-amagab ge ǃgurixasib Israeli diba ais âb ǃnâ nîra ǀhûǀguitimî tsî Israeli tsî Efraimmi tsîkha ge ǂhanuoǃnâsib âkha xu nîra ǁnā, tsî Judab on ge ǁîkha ǀkha nîra ǁnā.

⁶ǁÎn di gūn tsî ǁîn di goman tsîn ǀkhan ge ǁnātsē nîra ǃgû, ǃKhūban nî ôaga, xawen ge hō bi tide; ǁîb ge ǁîna xu ǂgaedawasen xui-ao.

⁷ǁÎn ge ǂgomǂgomsa tamase ǃKhūb ǃoagu ge sîsen, ǀhapiǀgôanan ge hō xui-ao; ob ge ǂkham ǁkhâba ǁîna nēsi nîra khauǃkhū ǁîn ǃhanagu ǀkha.

⁸Xâiǁnâba xâi re Gibeas tawa, ǀgapadasa Ramas tawa; ǃgarise ǂgai re Bet-Avens tawa sa khaoǃgâ, Benjamintse.

⁹Efraimmi ge nîra ǃgaroǃhū kai ǁkharab di tsēs ai; ǃhaodi Israeli didi ǃnâ ta ge tita ǂanǂansase nîra ī xūna ge ǂanǂan.

¹⁰Gaosagu Judab digu ge ǁnān, ǀkhariga ra ǂnûi-unun khami go ī; o ta ge tita ǁgôasib âta ǁgam-i axase ǁîgu ǂama nîra ǂnâǂui.

¹¹Efraimmi ge ǁgâiǀāhe hâ, ǁîb ge ǂhanub ǀkha ǂnauǂkhūhe hâ; ǁîb ge ǁnāti ge ǂâibasen, ǁîb ge ǁgôa-elogu di ǂhanub ǃoa gere tanisen.

¹²ǁNā-amaga ta ge tita Efraimma ǁgurise nîra ība, Judab ommi dina ǁgaoǀō hâ xūse.

¹³Efraimmi ge ǀaesenni âba mûo tsî Judaba xâib âba, ob ge Efraimma Asiriab ǃoa ge ǃgû, ob ge gao-aob Jareb ǃoa ge sî; xawe ǁîb ge sado ǂuruǂuru ǁoa tsî xâib âdo ǂgauǂgau ǁkhā tide.

¹⁴Tita ge Efraimma ǃgari xammi axase nîra ība, Judab ommi dina ǂkham xammi axase, tita, tita ge ǀkhauǃā tsî nîra ǃgû, tita ge nîra ǂgaeǂguibē, tsî ore-ao-i xare-i ge nî ǀkhai.

¹⁵Tita ge ǃgû tsî ti ǃkhais ǃoa ǁkhawa nîra oa, ǁî-aitsaman ǀhapixase ǂansen tsî ti aisa nî ôas kōse; ǁîn ga ǂōǂōhe ǃnubain ge tita nîra ôa.