Read Khoekhoegowab Hoseab 7 Bible Online

Hoseab 7 - Khoekhoegowab bible

Hoseab 7

¹Tita ga Israela ǂuruǂuruo, ob ra ǂhanu-aisib Efraimmi diba ǂhai ǂkhabasigu Samariab digu ǀkha; ǁîn ra ǂkhabase sîsen xui-ao; tsî ǃnari-aob ra ǂgâ, ǁkhâuǁnâ-aogu ge ǃauga ra ǀâ.

²Tsîn ge ǂgaob ân ǃnâ ǂâi tama hâ tita ǁîn ǂkhabasib hoab xa ra ǂâi ǃkhaisa, on ge nēsi dīgu ân xa ra ǃnamiǂgāhe, ǁîgu ge ti ais aiǃâ hâ.

³ǁÎn ge gao-aoba ǂkhabasib ân ǀkha ra ǃgâiaǂgao kai tsî gaosaga ǁîn di ǂhumigu ǀkha.

⁴ǁÎn hoan ra ǃgamekhôa, ǁîn ge ǁganoms ǁganaob xa ǀgamǀgamhe hâs ǁkhās xase ī, ǁnāb hîa ǂkhaikari hâs ǀkha ra ǀûb tsamperebab ge ǀhomams khaoǃgâ ǀkhuruǀkhuruǃganuheb ges kōse.

⁵Tsēs sida gao-aob dis ge a ǁî; gaosagab ge ǁîba ra ǀaesen kai, ǂauxûib ǀkha ǁîga ra ǀgamǀgamse, ǃhō-aonǀîb ra ǃommi âba ǀhōǂui.

⁶ǁÎn ra ǂgaob âna ǁganommi axase dīǀoaǀoa; ǁganaob ân ge tsuxub hoaba ra ǁom; ǃnauǁgoagab ra khau ǁhabu ra ǀaes khami.

⁷Hoatsaman ge ǁîna ǀgamǀgamhe hâ ǁganoms khami, tsîn ra ǂhanuǂhanu-aogu âna hapu; ǁîn gao-aogu hoagu ge ra ǁnā, khoe-i, tita ǃoa ra ǂgai-i xare-i ge ǁîn ǃnâ a ǀkhai.

⁸Efraimmi ge ǃhaokhoen ǀkha ra ǁaeǁaesen, Efraimmi ge ampere-i dawahe tama-i khami ī.

⁹ǃHaokhoen ra ǀgaib âba hapu, tsî ǁîb ge ǁîsa hōǃâ tama hâ; ǁkhātib ge ǀhaiadanasiba ǁîb ai khorahe hâ, tsî ǁîb ge ǁî ǃkhaisa hōǃâ tama hâ.

¹⁰ǁNāxab ra ǃgurixasib Israeli diba ais âb ǃnâ ǃkhō-am, xawe ǁîn ge ǃKhūb, ǁîn Elob ǃoa ǃhobasen tama hâ tsî nēn hoan tawa ǁîba ôa tama hâ.

¹¹Efraimmi gâre ǂnabu-i khami ī xui-ao; ǁîn ra Egipteba ǂgaiǀî, ǁîn ra Asiriab ǃoa ǃgû.

¹²ǁÎn ga ǃgûo, o ta ge tita ti ǂhamsa ǁîna nîra ǃāǂuiba, o ta ge tita ǁîna anin ǀhommi din axase nîra ǁgôa kai; o ta ge tita nîra ǁkhara, ǁîn di ǀhûhâs ǃnâ i ge ǁnâuhe khami.

¹³Tsūba ǁîna, tita xun ge ǁnāǁgôa amaga; an hîǀhurusib xa hāǂamhe, tita ǃoagun ge ǃûǂam amaga. Tita ge ǁîna ge ore xawen ra ǂhumiga ti ǃoagu ǃhoa.

¹⁴Tsîn ge ǁkhāti ǂgaob ân ǀkha tita ǂgaiǀî tama hâ, ǁgoeǃkhaidi ân ain ra ā xawe; ǁîn ra ǃhorob tsî ǂauxûib tsîkha ǂama ǀhû, tsîn ra tita xu ǁnāǁgôa.

¹⁵Tita ge ǁîna ge ǀham tsî ǁôagu âna ge ǀgaiǀgai, xawe ǁîn ra ti ǃoagu ǂkhababa ǂâi.

¹⁶ǁÎn ra ǃhoba, xawe Hoan xa ǀGapib ǃoa tama, ǁîn ge tsū khā-i axase ī; ǁîn gaosagu ge gôab xa ra ǁnā, ǁgôasib ǁîn nams dib ǃaroma; nēs ge ǁîn ǃhōsa Egipteǃhūb ǃnâ.