Read Khoekhoegowab Hoseab 8 Bible Online

Hoseab 8 - Khoekhoegowab bible

Hoseab 8

¹Xâiǁnâba mâi sa ams tawa; ǃariǃkhās axaseb ra ǃKhūb ommi ǃoagu hā xuige; ti ǃgaeǀhaosan ge ǃûǂam, tsî ti ǂhanuba xun ǁnāǁgôa hâ amaga.

²On ge tita nîra ǂgaiǀî: Ti Elotse, sida Israelǁîda ge satsa a ǂan.

³Israeli ge ǃgâiba ge ǂhāxu; ab khākhoeba ǁîba ǃgôaǃgon.

⁴ǁÎn ge gao-aoga ge ǂnûiǂgā, xawe tita xu tama; ǁîn ge gaosaga ge mâibasen, xawe tita ge ǁîga ge ǀū i; ǀhaiǀurib ân tsî ǃhuniǀurib ân xan ge eloga ge dībasen, ǁîn nî ǃhomǂuihese.

⁵ǁÎb ge sas, Samarias, di tsâuba ge ǂhāxū; ti ǁaib ge ǁînǀî ǂhubi hâ; matikōsen kha ǃanusiba nî tani ǁoa?

⁶ǁNāb on ge a Israeli di, kuru-aob ge ǁîba dī xui-ao, xaweb ge Elo tama hâ, tsîb ge ǃâdi ǃnâ nîra ǂkhū tsâub Samarias diba.

⁷ǁÎn ge ǂoaba ge tsoro, on ge ǃgom sareba nîra ǃgaobasen, mâ hâ ǃhoroǁôagu ge nîra ǀkhai, ǀkhī nî xūn ge tsampereba mā tide; tsî ūǀkhīn ka xawen ge ǃhaokhoena ǁîna nîra hapu.

⁸Israeli din ge hapuhe hâ; ǀnain ge ǁîna ǁaedi ǃnâ soa-i, sats khoets ǁî-i ǃnâ tura-e ūhâ tama-i khami ī kaihe hâ.

⁹ǁÎn ge Asiriab ǃoa ge doeǃapa, ǁnā ǃgoreb, ǀguri hâb ǃoa; ǁnān Efraimmi din ge ǁâsabena ǀai-aon amǃnâs ama ge ǃgae.

¹⁰Tsî ǁaedi ǃnân ge ǁâsabena ǀai-aon amǃnâs ama ge ǃgae amaga ta ge tita ǁnān ona nîra ǀhaoǀhao; ā, ǁîn ge ǁkhāti ǀnai ge ǀorotsoatsoa gao-aob gaosagu dib di ǃgommi xa.

¹¹Efraimmi ge altarde, ǁoreb nîga, ǂguiǂgui amaga di ge altarde ǁîba ge ǁorexū kaiba.

¹²Tita ge ǁîba ǂguisigu ti ǂhanub diga ra aixoaba, xawe gu ge ǃhao xūse ra ūhe.

¹³Ti hōdi di ǁguibadi xasa: ǁÎn ra ǁgansa ǁguiba tsî ǁîsa ǂû, xawe ǃKhūb ge ǁîn ǃnâ ǃgâibahe tama hâ. Ob ge ǁîba nēsi ǂhanuoǃnâsigu ân xa ǂâi tsî ǁoren âna nîra ôaǃnâ; on ge Egipteb ǃoa ǁkhawa nîra oa.

¹⁴Israeli din ge Kuru-aob âna ge ǀuru tsî tempelga gere ǂnubibasen tsî Judab ge ǁaposa ǃāde ge ǂguiǂguibasen; xawe tita ge ǀae-e nîra sî ǁîb ǃādi ǃnâ, ǁî-i ge î-omgu âba nîra hapu.