Read Khoekhoegowab Hoseab 9 Bible Online

Hoseab 9 - Khoekhoegowab bible

Hoseab 9

¹Tā ǃgâiaǂgao, sadu Israeli dido, dâb kōse, ǁaedi ra hî xase, sadu ge sadu di Eloba xu ra ǀaiǁgôa xui-ao, sadu ge ǀai-aon amǃnâsa ǀnam hâ ǃhorob di dāǃnâǃkhaidi hoadi ai.

²Dāǃnâǃkhais tsî ǂauxûiǃoreb tsîra ge ǁîna ǂûmā tide; tsî ǂkhon ǂauxûib ge ǁîna nîra ǂhumiba.

³ǁÎn ge ǃhūb ǃKhūb dib ǃnâ hâhâ tide, tsî Efraimmi ge ǁkhawa Egipteb ǃoa nîra oa, tsîn ge Asiriab ǃnâ ǀurisana nîra ǂû.

⁴ǁÎn ge ǃKhūba ǂnâǁguibadi ǂauxûib dide ǁguiba tide, tsî di ge ǁîba ǁkhāti ǂkhonba tide. ǁGuibadi ân ge ǁîna ǃoab di perese nî ība; ǁîde ga ǂûn hoan ge nîra ǀurisa; ǁîn pereb ge ǁîn ǀoms dise nîra ī, ǁîb ge ǃKhūb ommi ǃnâ sī tide xui-ao.

⁵Tare-e du kha nî dī ǂnûihe hâ ǀgapi ǁaeb di tsēs ai tsî kaitsēs ǃKhūb dis ai?

⁶Tsî mû ǁîn ge ra kā hîǀhurus xa; Egipteb ge ǁîna nîra ǀhaoǀhao, Memfis ge ǁîna nîra ǁkhō; ǀhaiǀurib ân ge nîra ǂgaohe, ǀgaminan ge ǁîna ǀumise nî ūhâ, ǁkhūn ge tentomdi ân ǃnâ nîra hâ.

⁷Tsēdi ôaǃnâs didi ge go hā, tsēdi mādawa-ams didi ge go hā; ǁnān Israeli din ge ǁî ǃkhaisa nîra hōǃâ; kēbo-aob ge gâre, tsî gagas â-i aob ge a ǃkhausa; kaisib sadu ǂhanuoǃnâsib dib ǃaromab ge ǁkhanna ǁkhāti a kai.

⁸ǃÛi-aob Efraimmi dib ge ti Elob ǀkha hâ, xawe kēbo-aob ge a aniǃkhō-aob di tsuri ǁîb daogu hoagu ai, ǁkhanni ge ommi ǁîb Elob dib ǃnâ hâ.

⁹ǁÎn ge ǃgamse ge ǁgaoǁgaosen, Gibeas di tsēdi khami; ǁîb ge ǂhanuoǃnâsib ân xa nîra ǂâi, ǁîb ge ǁoren ana nîra ôaǃnâ.

¹⁰Tita ge Israeli dina ǂauxûiǂûn axase ge hō ǃgaroǃhūb ǃnâ, tita ge sadu îna ǂguro ǂûn, ǀnomahais ai hân, ǀkhī ran axase ge mû; xawen ge Baal-Peori ǃoa ǃgû tsî ǁnā taotaosasiba ge khaisenba tsîn ge hoaragase ge ǁgaiǁgaixū kai ǁîn di ǁâsabeb ǂûb khami.

¹¹Efraimmi din xasa: ǁÎn ǂkhaisib ge ani-i xase nîra ǁkhanabē; ǁorasa xu ǁgûs ǃnāba xu tsî ǀgamǀkhāsa xu.

¹²Tsî ǁîn ôanan ga kaikai xawe ta ge tita ǁîna nîra ǀgôao kai, khoen ǁaegun nîra ǀkhais kōse; tsî tsūba ǁîn ona, tita ga ǁîna xu ǂgō ǃnubai.

¹³Efraimmi ge Tires, tita xa ǀnamǀnamsa ǁanǃkhais ǃnâ ge ǂgāhes, tita ra kōǀîs khami ī, xawe Efraimmi din ge ǁîn ôana ǃgam-aob ǃoa nî ūǂui.

¹⁴ǁÎna mā re, ǃKhūtse; tare-ets kha ǁîna nî mā? ǀGôao ǃnāba ǁîna mā tsî ǀōsa samde.

¹⁵ǁÎn di ǂkhabab hoab ge Gilgals tawa hâ, ǁnāpa ta ge tita ǁîna ǁkhan xui-ao, ǂkhabasib ǁîn dīgu dib ǃaroma; tita ge ǁîna ti omma xu nî doeǁgaǂui, tita ge ǁîna ǃaruǀî ǀnam tide, ǁîn gaosagu hoagu ge a ǁnāǁgôasa.

¹⁶Efraimmi ge ǂnauhe hâ, ǁîn ǃnomab ge a ǂnâsa, ǁîn ge ǂû-i xare-e ūǀkhī tide; tsî ǁîn ga ǁora xawe ta ge tita ǀnamǀnamsa ūǀkhīn ǁîn ǃnāb dina nîra ǃgam.

¹⁷Ti Elob ge ǁîna nîra aoxū, ǁîban ǁnâu tama amaga, on ge ǀnarema rase nîra ī ǀǁaedi ǁaegu.