Read Khoekhoegowab Joeli 1 Bible Online

Joeli 1 - Khoekhoegowab bible

Joeli 1

¹Mîs ǃKhūb dis Joeli Petueli ôaba ge ǃnaebas:

²ǁNâu go re nēsa, sago kairago, î du ǃgaoǃgâ sadu ǃhūb ǁansabedu hoado! Nēti ī-e ǃnae i ge xare sadu tsēdi ǃnâs kas, sadu îgu tsēdi ǃnâs kas hoasa?

³ǁÎ ǃkhai-i xa ǃhoaba sadu ôana, în sadu ôana ǁîn ôana ǃhoaba, tsî ǁîn ôanan ǃgoaxa ǃhaos dina ǃhoaba.

⁴ǃHontsiǃhoneb ǃgau hâ-es ge ǂhomsa ge hapu, tsî ǂhoms ǃgau hâ-es ge ǃnomsa ge hapu, tsî ǃnoms ǃgau hâ-eb ge ǁnānanaba ge hapu.

⁵ǃNoaǂkhai sadu āǀhoro hâdo, î du tsûsase ā, sadu ā-aodu hoado, ǂkham ǂauxûib ǂama, sadu di amsa xub ūbēhe hâ xuige.

⁶ǁAe-i go ti ǃhūba hāǂam xuige, ǀgaisa tsî ǀgauo ǁae-i, ǁgûgu â-i a xamǁgû, tsî i ge ǃnaniǁgûgu xams diga ūhâ.

⁷ǁÎ-i ge ti ǂauxûiǂûhaisa ge ǃū-aisa kai tsî ti ǀnomahaisa ge khôa kai; ǁî-i ge ǁîsa ǀkhaiǀkhāǃari kai tsî ge aoǁgui, ǂgonagu âs ge ǃuris kōse.

⁸ǃGae ǁnā ǂkhamkhoes, ǂkhamsis âs aob ǂama ǁhō-e anasen hâs ǁkhās xase.

⁹ǂÛǁguibas tsî ǂnâǁguibas tsîra ge ǃKhūb omma xu ūbēhe hâ; pristergu, ǃKhūb ǃgāgu ge ra ǃoa.

¹⁰ǃHanab ge hîǀhuruhe hâ; ǃhūb ra ǃoa, ǃhorob ge hîǀhuruhe hâ, ǂkhon ǂauxûib ge ǂnâ hâ, olib ge hîkākāhe hâ.

¹¹ǃHanasîsenaogu ge tao hâ, ǂauxûiǂûǃhanasîsenaogu ge tsûsase ra ā ǃhorob tsî gerstǃhorob ǃaroma; ǃgaos ǃhanab dis kā hâ xui-ao.

¹²ǂAuxûiǂûhais ge ǂnâ hâ, ǀnomahais ge hîkākāhe hâ; granathais tsî palmhais tsî apelhais tsîdi; ǃaub haidi hoadi ge ǂnâ hâ; ā dâb ge ǂnâ hâ khoen ôana xu.

¹³ǃGaesen î go ǃoaxase ā, sago pristergo, tsûsase ā, sago altars ǃoaba-aogo, ǂgâ î go ǁhōgu ǃnâ hâǂkhai, sago ti Elob di ǃoaba-aogo; ǂûǁguibas tsî ǂnâǁguibas tsîra ommi sadu Elob diba xu bē hâ xuige.

¹⁴ǂÛtamahâ-e khai, ǃnâu ǃoaba-e ǂgaiǂui, kaiga ǀhaoǀhao tsî ǃhūǁîn hoana ommi ǃKhūb sadu Elob dib ǃoa, î du ǃKhūb ǃoa ǂgai.

¹⁵Ae, tita-e, ǁnā tsēse! Tsēs ǃKhūb dis a ǀgū xui-ao, tsîb ge hîǀhuru rase hoan xa ǀGaisaba xu nîra hā.

¹⁶ǂÛna kha ǃgaoǁnâhe taman hâ sida di mûde xu? ǃGâiaǂgaob tsî dâb tsîkha sida Elob di omma xu?

¹⁷ǃHorodan ge ǃhūǃgaridi ân ǃnaga ǁgao hâ, ǁui-omgu ge hîǀhuruhe hâ, sâu-omgu ge khôaǁnâhe hâ, ǃhorob ǂnâ hâ xui-ao.

¹⁸Ae, matikōsen ra ǀgoana ǀhâimâinǀom? Goman di ǂguigu ge kā-ai hâ,

¹⁹Sats ǃKhūts ǃoa ta ge tita ra ǂgai: ǀAe-i ge ǃû-aidi ǃgaroǃhūb dide hapu hâ, tsî ǁhabu-i haidi ǃaub didi hoade ǂhubi hâ xui-ao.

²⁰Mâ ǀguru-i ǃaub di-i hoa-i on ra sa ǃoa ǂgai; ǁgamǃārogu ge ǂnâ hâ, tsî ǀae-i xa di ǃû-aidi ǃgaroǃhūb dide hapuhe hâ xui-ao.