Read Khoekhoegowab Joeli 2 Bible Online

Joeli 2 - Khoekhoegowab bible

Joeli 2

¹ǀGapadasa xâi Sions tawa, î du ǃgarise ǂgai ǃhommi ti ǃanusib dib ai; an ǃhūb ǁansaben hoana ǀkhū, tsēs ǃKhūb dis ra hā, ǁîs a ǀgū xuige.

²Tsēs ǃkhaeb tsî ǃkhaenab tsîra dis, tsēs ǀnanudi tsî durutsuxub tsîn dis; ǁgoaǂnobos ra ǀhommi ai ǁhaiǂoaxa khamis ra kai tsî ǀgauxa ǁaesa hā, ǁîs ǁkhās khami īs ge hugasa xu ge ǀkhai i tsî ǁîs khaoǃgâ ǁkhāti hâ tide, kurigu ǀoasa ǃhaodi digu kōse.

³ǁÎs aiǃâ i ge ǀae-e ra hapu, tsî ǁîb khaoǃgâ i ge ǁhabu-e ra khâi; ǃhūb ge ǁîs aiǃâ Edenǃhanab khami ī, tsî ǁîs khaoǃgâ ǃgaroǃhūb khami, tsî ǁîsa xu nî ûi-i ge a ǀkhai.

⁴ǁÎs īsib ge hān dib khami ī, tsîn ge ǃgapihān ra ǃkhoe khami ra ǃkhoe.

⁵ǁÎn ra uri kunidi, ǃhomgu ai ra ǀōdi khami, ǁhabub ǀaes dib, ǃhorob ǃgaodana ra hapub di ǀōb khami, ǁaes ǀgaisa tsî torodī ǁkhāsa.

⁶ǁÎs di ais aiǃâ di ge ǁaede ra tsû; aidi hoadi ge sū-i axase ra ǂnū.

⁷ǁĒ-aogu khamin ra ǃkhoe, toro-aogu khamin ra ǂnubiǂgoagu ai ǃapa tsîn ra ǃgû, mâ-i hoa-e ǁî-i di ǃgangu ǃnâ, tsîn ge ǃgangu âna xu ǂgō tama hâ.

⁸Tsîn ge ǁkhāti nē-e nau-e ǁgâi tama hâ, ǁîn ra mâ-i hoa-e daob â-i ǃnâ ǃgû; tsî ǀāxū-i ain ra ǁnā xawen ge ǀhapiǂnûisen tama hâ.

⁹ǁÎn ra ǃās ǃnâ ǃkhoema, ǁîn ra ǂnubiǂgoagu ai ǃkhoe, ǁîn ra omgu ai ǃapa, ǁîn ra mûǂuidaode-ū sī ǂgâ ǃnari-aon khami.

¹⁰ǃHūbaib ra ǂgubi ǁîn aiǃâ, ǀhommi ra ǀkhū; sores tsî ǁkhâb tsîra ra ǂnū tsî ǀgamirodi ra ǂkhaiǀû.

¹¹ǃKhūb ra dommi âba ūkhâi ǂnubis âbǀî, ǂguib âb kaise a kai xui-ao, ǁîb a ǀgaisa xui-ao mîs âba ra dīse; tsēs ǃKhūb dis ge a kai tsî kaise ǃaoǃaosa, tsî tari-e ǁîsa nî tani ǁkhā?

¹²Tsî nēsis ka xawe ǁnâi, tib ra ǃKhūba mî, tiǀî ǃhobasen sadu ǂgaob hoab ǀkha, î du ǁîsa dī ǂûtamahâs ǀkha tsî ās ǀkha tsî ǃgaes ǀkha.

¹³Î du sadu ǂgaoba ǀkhau, î du tā sadu sarana ǀkhau, î du ǃhobasen ǃKhūb sadu Elob ǃoa; ǁîb a ǀkhomxaǂgao, ǃnūǃnâxa tsî ǃgâiǃnâxasib xa ǀoa hâ, ǂkhabab ǂama ra ǃhausenǃâ xui-ao.

¹⁴Tari-e a ǂan, ǁîb ge ǀnîsi oa tsî nî ǃhausen, tsî ǁîb ge ǀnîsi ǀkhae-e nî ǁnākhao, ǂûǁguibas tsî ǂnâǁguibas ǃKhūb sadu Elob dis ase.

¹⁵ǀGapadasa xâi Sionni tawa, ǂûtama hâ-e khai, ǃkhâitsē-e ǂgaiǂui.

¹⁶ǁAesa ǀhaoǀhao, ǀhaohâba khai, kaiga ǀhaoǀhao, ǀgôaron tsî dai ran tsîna ǀhaoǀhao; ab ǃkhoeǂgâsabeba ǃnā-oms âba xu doeǂoa tsî ǃkhoeǂgâsabesa ǁomoms âsa xu.

¹⁷Pristergu, ǃKhūb di ǃgāga, a gu ā ai-ommi tsî altars tsîn ǁaegu, î gu mî: Sa ǁaesa sâu re, o ǃKhūtse, îts ǀumis âtsa tā ǃharaxūba māǁnâ, î di ǁaede ǁaesa tā ǃhōxūdī; tare xū-i ǃaroma di kha ǁnâi ǁaede: Mapab ǁîn Eloba hâ? ti nî mî?

¹⁸Nētib ge ǃKhūba nîra tau ǁaes âb ǂama, tsî ǁîb ge ǁaes âba nîra sâu.

¹⁹Tsîb ge ǃKhūba ǃeream tsî ǁaes âb ǃoa ge mî: Mû, tita ge sado ǂkhon ǂauxûib tsî ǃhorob tsî olib tsîna ra sîba, ǁîn xa du nî ǁâse; tsî tita ge sado ǃaruǀî ǁkhawa ǁaedi di ǃharaxūxūse māǁnâ tide.

²⁰Tita ge ǁnāb ǀapas diba ǃnūse sado xu nîra bē kai, tsî ǂnâsa tsî ǃū-aisa ǃhūb ǃoa nîra ǃhaebē bi; ais âb ge aiǂoas huribǀî tsî ǀams âb ge khaoǃgâ hâ huribǀî nîra hâ; ob ge ǀōb âba nîra khâi, ob ge ǀurisasib âba nîra ǃapa, kai xūnab ge dī xui-ao.

²¹Tā ǃao, sats ǃhūtse, dâ îts ǃgâiaǂgao, ǃKhūb ge kai xūna dī xui-ao.

²²Tā ǃao, sadu ǀgurudu ǃaub dido, ǃû-aidi ǃgaroǃhūb didi ge ǀgâna ǁkhawa nîra ūǀkhī xuige; hais ge ǂûn âsa nîra tani, ǂauxûiǂûhais tsî ǀnomahais tsîra, ǁkhāsib âra nî mā xuige.

²³Tsî sadu, Sionni ôado, dâ, î du ǃgâiaǂgao ǃKhūb sadu Elob ǃnâ, ǁîb sado ǁnā ǁkhāǁkhā-aob ǂhanu-aisib diba nîra mā xuige, tsî ǁîb ge sado ǀapiba nîra ǁgôaxa kaiba haiǃkharub tsî ǃnaresib tsîkha ǂguro ǁkhâb ǃnâ.

²⁴O di ge dāǃnâǃkhaide ǃhorob xa nîra ǀoa, tsî ǀāǃnâǃoregu ge ǂkhon ǂauxûib tsi olib xa nîra ǁhōxūsen.

²⁵Nēti ta ge tita sado ǁnā kuriga nîra mādawa-am, ǂhoms tsî ǃnoms tsî ǁnāǁnanab tsî ǃhontsiǃhoneb xa ge hapuhega; ti kai ǂnubis tita ge sadu ǃnâ sîsa.

²⁶O du ge sado ǃnāǂamsase tsî ǁâs kōse nîra ǂû, tsî ǀons ǃKhūb, sadu Elob, buruxase ge sîsenū dub disa nîra kare; tsî ti ǁaes ge ǀamosib kōse taotaohe tide.

²⁷Tsî du ge nîra ǂan, tita Israeli ǁaegu hâ ǃkhaisa, tsî tita ǃKhūta a sadu Elo ǃkhaisa tsî ǀkhara tamab; tsî ti ǁaes ge ǀamosib kōse taotaohe tide.

²⁸Tsî ǁnās khaoǃgâ i ge nîra ī, tita ti Gagab xa ǁgans hoas ai nîra ǁhōǂui ǃkhaisa, on ge sadu ôagu tsî sadu ôadi tsîna nîra kēbo; o gu ge sadu kaiga ǁhapode nîra ǁhapo, o gu ge sadu ǂkhamkhoega aide nîra mû.

²⁹Ā, ǃgāgu on ǂama tsî ǃgādi on ǂama ta ge tita ǁnā tsēdi ǃnâ ti Gagaba nîra ǁhōǂui.

³⁰Tsî tita ge buruxa saode nîra mā ǀhommi ǃnâ tsî ǃhūbaib ai; ǀaob tsî ǀaes tsî ǀanǂkhâǃnâgu tsîna.

³¹Sores ge ǃkhaenab ǃnâ nîra ǀkharaǀkharahe tsî ǁkhâba ǀaob ǃnâ, ǁnā kai tsî ǃaoǃaosa tsēs ǃKhūb dis nîra hās aiǃâ.

³²Tsî i ge nîra ī, mâ-i ǃKhūb di ǀonsa ga ǂgaiǀî-i hoa-i nîra sâuhe ǃkhaisa; ǃhommi Sionni ai tsî Jerusalems tawa i ge ûiǂoa-e nîra hâ, ǃKhūb ge mî xase; tsî ǁnān ǃgau gen, ǃKhūba ra ǂgaiǀîn tawa.