Read Khoekhoegowab Joeli 3 Bible Online

Joeli 3 - Khoekhoegowab bible

Joeli 3

¹Tsî kō, ǁnā tsēdi ǃnâ tsî ǁnā ǁaeb ai, tita ga ǃkhōsis Judab tsî Jerusalems tsîra disa unu ǃnubai,

²ǁnāǃnubai ta ge tita ǁaedi hoade nîra ǀhaoǀhao tsî ǁîde Josafati ǃgoaǃnāb ǃnâ nîra ūǁgôa; tsî tita ge ǁnāpa ǁîde nîra ǀgoraǃgâ ti ǁaes ǂama, tsî ti ǀumis Israeli dis ǃaroma, ǁînan ǁaedi ǃnâ ǀgaruǀgaru hâ, tsî ti ǃhūban ǀgora hâ amaga.

³Tsîn ge ti ǁaes ǂama ǀkhūsa ge ao, tsî aore ǀgôaro-e ge mā ǀai-aos ama, tsî tarare ǀgôaro-e ge ǁamaxū ǂauxûi-i ama, ān nîga.

⁴Tsî tare dīxū-e du kha ti ǀkha ūhâ, sadu Tires tsî Sidons tsîra tsî Filisteǁîn di ǀkharib hoab dido, xare du kha ǁnâi tita xū-e nî mādawa-am? Tita du ga mādawa-am ǂgao-o, o ta ge tita supuse ǃhaese sadu di danas ai mādawa-amsa nîra ūhā.

⁵Ti ǀhaiǀurib tsî ti ǃhuniǀurib tsîkha du ge ūbē, tsî ti hoan xa ǃgâi ǃgomǀgausana sadu tempelgu ǃnâ ūǂgâ amaga.

⁶Tsî du ge ǀgôan Judab din tsî ǀgôan Jerusalems dina Grikeǁîn ai ge ǁamaxū, ǁîna du nî ǃnūse ǁîn di ǃhūb ǀkhariba xu ūbēga.

⁷Mû, tita ge ǁîna ǁnā ǃkhais, ǁîs tawa du ge ǁîna ǁamaxūsa xu nîra khâi kai; tsî ta ge sadu dība sadu danas ai nîra mādawa-am.

⁸Tsî tita ge sadu ôagu tsî sadu ôadi tsîna Judab ôan ǃomǁae nîra ǁamaxū, ǁnān, ǁîna Sabeǁîn ǃnūse ǁgoe ǁaes ai nîra ǁamaxūna; ǃKhūb ge ǁî ǃkhaisa ǃhoa xui-ao.

⁹ǁÎ ǃkhaisa ǂgaiǂui ǁaedi ǃnâ, toroba khai, ǁē-aoga ǃnoaǂkhai kai, an ǀgū, a gu ǃgûǃapa toro-aogu hoaga.

¹⁰ǃHūǃkhā-ūxūn âdo gôadī, î du ǃgao-ūgôadi âdo ǁhâigôadī, îb ǂkhabusaba: ǁĒ-aota, ti mî.

¹¹ǃHae, î du hā, mâ ǃnammi hoab ai hâ ǁaedi hoadi dido, î du ǀhû. O, ǃKhūtse, a gu sa ǁē-aoga ǁnāǀî sī ǁgôa!

¹²ǁAedi ge khâi tsî nîra ǃgû ǃgoaǃnāb Josafati ǃoa, ǁnāpa ta ge tita ǂnû tsî nîra ǀgoraǃgâ, mâ ǃnammi hoab ai hâ ǁaedi hoade.

¹³ǃGao-ūgôasa sîsenūtsâ, ǃgaos ǁan hâ xuige; hā, î du ǁgôa, ǀāǃnâǃoreb ge ǀoa hâ, tsî ǀāǃnâǃoregu ra ǀoaǃnā xuige; ǁîn ǂkhabasib a kai xui-ao.

¹⁴ǂNubidi, ǂnubidi ge dāǃnâkunidi di ǃgoaǃnāb ǃnâ hâ, ǃKhūb di tsēs a ǀgū xui-ao dāǃnâkunidi di ǃgoaǃnāb ǃnâ.

¹⁵Sores tsî ǁkhâb tsîra ge go ǂnū, tsî ǀgamirodi ge go ǂkhaiǀû.

¹⁶ǃKhūb ge Sions, tsî Jerusalemsa xu nîra ǃguru, ǀhommi tsî ǃhūbaib tsîkha nîra ǀkhūs kōse; xawe ǃKhūb ge ǁaes âba ǁhaiǁhâse nîra ība tsî Israeli ôana ǀgaise.

¹⁷Tsî du ge nîra ǂan, tita a ǃKhū, sadu di Elo ǃkhaisa, Sionni ti ǃanu ǃhommi ai ǁan hâ ta; tsî Jerusalems ge nîra ǃanu, tsî ǃhaokhoen ge ǃaruǀî ǁîsa ǃgûǃnâǃganu tide.

¹⁸Tsî i ge ǁnātsē nîra ī, ǃhomgu ǂkhon ǂauxûib xa nîra ǂnâ ǃkhaisa, tsî ǃnomdi daib xa nîra ǂnâ ǃkhaisa, tsî ǃāgu Judab digu hoagu ǁgamxase nîra dâu ǃkhaisa, tsî i ge ǀau-e ǃKhūb omma xu ǂoa tsî ǃgoaǃnāb Sitims diba nîra dâuǀoa.

¹⁹Egipteb ge nîra ǃū-aisa ǃhū kai, tsî Edommi ge hoaragase nîra ǃgaroǃhū kai, ǁnā ǀgaidīs, Judab ôan ǃhūb ân ǃnân ge ǀhapio ǀaoba ǂnâxūs ǀkhan ge dīs ǃaroma.

²⁰Xawe Judab ge nîra hâhâ ǀamosib kōse tsî Jerusalemsa ǃhaosa xu ǃhaos ǃoa.

²¹Tsî tita ge ǁîn di ǀaob, tita ǃanuǃanu tamaba nîra ǃanuǃanu, tsî ǃKhūb ge Sionni ai nîra ǁan.