Read Khoekhoegowab Amob 2 Bible Online

Amob 2 - Khoekhoegowab bible

Amob 2

¹Nētib ra ǃKhūba mî: ǃNona ǃûǂamdi Moab didi ǃaroma tsî hakadi ǃaroma ta ge tita ǁî ǃkhaisa ǁkhaedawa tide, ǂkhōgu Edommi gao-aob digab ge ǃkhorob ǃnâ khauǃkhū amaga.

²ǁNā-amaga ta ge tita ǀae-e Moab ǃnâ nîra sî, ǁî-i ge î-omgu Keriots diga nîra hapu, ob ge Moaba kai ǂkhupib ǀkha tsî dâb ǀkha tsî xâiǁnâb di ǀōb ǀkha nîra ǁō.

³Tsî tita ge ǂhanuǂhanu-aoba ǁîs ǁaeguba xu nîra ǃhomǂui, tsî ǁîs gaosagu hoaga ta ge tita ǁîb ǀkha nîra ǃgam, tib ra ǃKhūba mî.

⁴Nētib ra ǃKhūba mî: ǃNona ǃûǂamdi Judab didi ǃaroma tsî hakadi ǃaroma ta ge tita ǁî ǃkhaisa ǁkhaedawa tide; ǂhanub ǃKhūb diban ge aoxū tsî ǂnûiǂgādi âban sâu tama amaga, tsî ǂhumigu ân xan ǂgaeǂhapuhe hâ amaga, ǁîn îgu gere ǃgôaǃgonga.

⁵ǁNā-amaga ta ge tita ǀae-e Judab ǃnâ nîra sî, ǁî-i ge î-omgu Jerusalems diga nîra hapu.

⁶Nētib ra ǃKhūba mî: ǃNona ǃûǂamdi Israeli didi tsî hakadi ǃaroma ta ge tita ǁî ǃkhaisa ǁkhaedawa tide, ǂhanu-aiban ra marib ama ǁamaxū ǃkhais xa tsî ǂhâ hâba ǁharora ama.

⁷ǁNān, tsarab ǃhūb dib nî ǀgâsan di danas ai hā ǃkhaisa ǂgao hân tsî tsamtsiǃnân di daoba ra dawaǃkhunina; tsî ǀgôab tsî ǁgûb tsîkha ge ǀgui ǀgôas ǀguis ǃoa ra ǃgû, ti ǃanu ǀonsa kha nî ǀuriǀurise.

⁸Tsîn ge mâ altars hoas ai ǁauǁauhe hâ saran ai ǁgoe tsî ǂauxûib ǁkharahe hân diba ra ā ǁîn elogu di ommi ǃnâ.

⁹Xawe tita ge Amorǁîba ais ân aiǃâ ge hîkākā, ǁnāb, sederhaib khami ǀgapi tsî aik-haidi khami ǀgaisa ge iba tsî ta ge tita ǂûn âba ǀgapiseba xu tsî ǃnomgu âba ǃnagaba xu ge hîkākā.

¹⁰ǁKhāti ta ge tita sado Egipteǃhūba xu ge ǂgaeǂguiǃapa; tsî tita ge sado hakadisi kurigu kōse ǃgaroǃhūb ǃnâ gere ǂgaeǂgui, Amorǁîn di ǃhūba du nî ǀumise ūhâga.

¹¹Tsî tita ge ǀnîgu sadu ôagu diga kēbo-aose ge ǂkhaiǂkhaikhâi tsî sadu di ǂkhamkhoega Nasireǁîse; nēsa ǁnātis ī tama hâ, sadu Israeli ôado? tib ra ǃKhūba mî.

¹²Xawe sadu ge Nasireǁîga ǂauxûiba ge āsi, tsî du ge kēbo-aoga mîmā tsî: Sago ge kēbo tide, ti ge mî.

¹³Mû, tita ge sadu ǃāde nîra ǁgâi kunis ǃgaeǀkhādadi xa ǀoa hâs ra ǁgâi xase.

¹⁴ǃHae khoeb ǁhâǂoa tide tsî ǀgaisab ǀgaib âba amǁnā tide tsî ǁē-aob ǀoms âba ǃnoraǃnora tides kōse.

¹⁵Tsî khāsa ga sîsenūb ge mâhō tide, tsî supu ǂai-aib ge ǃnoraǃnorasen tide; ǁkhātib ge hāb ai ra ǃgapiba ǀoms âba ǃnoraǃnora tide.

¹⁶Tsî ǁkhoaǂgaob ǁē-aogu dib ge ǁnātsē ǀōǀkhāse nîra ǁhâ, tib ǃKhūba ra mî.