Read Khoekhoegowab Amob 4 Bible Online

Amob 4 - Khoekhoegowab bible

Amob 4

¹ǁNâu nē mîsa, Basanni gomaso, Samarias ǃhomgu ai! ǀGâsana ra ǁgâiǀādo, ǂhâ hâna ra karosase sîsenūdo; sadu ǀhonkhoegu ǃoa: Mā da, î da ā ti ra mîdo.

²ǃKhūb ǃKhūb ge ǁîb di ǃanusib tawa ge nū: Mû, tsēdi ge sadu ǂama nîra hā, ǁîn ge sado ǂgaeǃapa-ūdadi ǀkha nîra ǂgaeǃapa, tsî sado xu ga ǃgauna ǁaun ǃkhō-ūxūdi ǀkha.

³Tsî sadu ge ǀaragu ǂnubiǂgoagu digu ǃnâ nîra doeǂoa, mâ-i hoa-e ǂnanbē tamase, tsî du ge sadu ǁgôa-eloga nîra aoxū, tib ra ǃKhūb ǃKhūba mî.

⁴Hā Bet-Els ǃoa, î du ǁore! Gilgals ǃoa, î du ǃnāsase ǁore! Hā-ū ǁguibadi âdo ǁgoaga tsî disiǁî ǃâsa mâ ǃnonaǁî tsēs hoas ai.

⁵ǀKhuruǀkhuruperegu ǀkha ganganǁguibasa khau, î du ǃgari dommi ǀkha māsenxase mādi âdo ǂgaiǂui! ǁNās a sadu di ǂâi xuige, Israeli ôado, tib ra ǃKhūb ǃKhūba mî.

⁶Tita ge sado ǃanusib ǁgûdi diba ge mā, sadu ǃādi ǃnâ, tsî ta ge pereba sadu ǁanǃkhaidi ǃnâ tôasi kai, xawes tsîna du ge tita ǃoa ǃhobasen tama hâ, tib ra ǃKhūba mî.

⁷ǀNanuba ta ge sado xu ǁkhaedawa, ǃnona ǁkhâgu ǃgaos xa ǃgau hâ hîa, ǀgui ǃās ǂama ta ge ǀapiba mā, xawe nau ǃhana-aib, ǀapiba hō tamab ge ge ǂnâ.

⁸Tsî ǀgam, ǃnona ǃādi ge naus ǃoa ge ǁnāǂhapusen, ǁgam-e nî āse, xawe di ge ǁgâs âde khanu kai tama ge i, xawes tsîna du ge tita ǃoa ǃhobasen tama hâ, tib ra ǃKhūba mî.

⁹Tita ge sado ǂhubib ǃhorob dib tsî danib ǁnā tama is ǀkha ǃgomse ge ǁkhara, ǂgui ǃhanagu tsî ǃhana-aigu tsî ǀnomahaidi tsî ǀkherahaidi tsîn ge ǂhomn xa ge hîkākāhe, xawes tsîna du ge tita ǃoa ǃhobasen tama hâ, tib ra ǃKhūba mî.

¹⁰Tita ge ǂhīǁōba sadu ǃnâ ge sî, Egipteb di ǀgaus ai; tita ge sadu ǂkham khoega gôab ǀkha ge ǃgam, hāna du ra doeǁgabē hîa; tsî tita ge hammi sadu ǁgoeǃkhais diba ge khâi kai, ā, sadu di ǂguis kōse, xawes tsîna du ge tita ǃoa ǃhopasen tama hâ, tib a ǃKhūba mî.

¹¹Tita ge sado ge dawaǃkhapu, Elob ge Sodoms tsî Gomoras tsîra dawaǃkhapu khami, tsî du ge ǀae-ammi ǀaesa xu ra ǂgaedawahe-i khami ge ī, xawes tsîna du ge tita ǃoa ǃhobasen tama hâ, tib ra ǃKhūba mî.

¹²ǁNā-amaga ta ge tita sa ǀkha ǁnāti nî sîsen, o Israeltse; ǁnāti ta nî sa ǀkha sîsen amaga ǂhomisen, î sa Eloba ǃgûǃoa, o Israeltse!

¹³Mû, ǁnāb ǃhomga ge ǃgaoǃgaob tsî ǂoaba ge kurub tsî khoeba ǁîb ǂâisa ge ǂanǂanni, ǁnāb ge ǁgoaǂnobosa ǃkhaenab ǃnâ a ǀkharaǀkhara ǁkhāb, ǃhūbaib di ǀgapiǃkhaidi ai ra ǃgûb, ǃKhūb Elob ǂnubidi dib, tib ge ǀon hâ!