Read Khoekhoegowab Amob 5 Bible Online

Amob 5 - Khoekhoegowab bible

Amob 5

¹ǁNâu re nē mîdi, sadu ǂama ta ǃgaetsanase ra tsoatsoade, Israeli ommi dido!

²ǂKhamkhoes Israeli dis ge go ǁnā, ǁîs ge ǁkhawa khâi tide; ǂnauǁguihe hâses ge ǃhūb ai ǁgoe, khoe-i xare-i ge ūkhâi si tama hâ.

³Nētib ra ǃKhūb ǃKhūba mî: ǃĀs, ǀoadisigu ǀkha ge ǂoas ge kaidisigu xa ge ǃgaubahe; tsî ǁnān, kaidisigu ǀkha ge ǂoan ge disise ǀgui Israeli gaosiba ge ǃgauba.

⁴Nētib ra ǃKhūba Israeli gaosiba mîǀî: Ôa tita, o du ge nîra ûi!

⁵Tā Bet-Elsa ôa, î tā Gilgals ǃoa ǃgû, î tā Bersebasa ǃgûǃnâǃganu. Gilgals ge ǂanǂansase ǃkhōsis ǃnâ nî ǂgâ, tsî Bet-Els ge nîra hîǀhuruhe.

⁶ǃKhūba dîǃgâ re, o du ge nîra ûi, tamas ka io, ob ge ǀaeǁhabub khami Joseb di omma nîra hāǂam tsî hîkākā, tsî Bet-Els ge khoe-i xare-i xa ǀarihe tide.

⁷Sadu ǂhanuba alsemmi ǃnâ ra ǀkharaǀkharado tsî ǂhanu-aisiba ǂaidi ǀkha ra dāǃgâdo.

⁸ǁÎb ǀKhûsedi tsî ǃGorede ge dība tsî ǃkhaenaba ǃnâb ǃnâ ge ǀkharaǀkharaba tsî tsēsa tsuxub ǃnâ ge ǃkhae kaiba, ǁîb hurib di ǁgamga ǂgai tsî ǃhūb ai ge ǂnâǂuiba, ǃKhūb tib ge ǀon hâ.

⁹ǁÎb hîǀhurusa ǀgaisab ǂama ra hā kaib, tsî ǁkhuiga ra hîǀhuruba!

¹⁰ǁÎn ge dao-amdi ǃnâ ǂhanuba ra dī khoeba ra ǁkhan, ǁîn ge ra uixa ǁnāb, amaba ra ǃhoaba.

¹¹ǁNā-amaga, ǀgâsa khoeba du ra dāǃgâ tsî ǁîba xu ǃhorob di ǃâ-e ū, tsî du ge omde ǁhāhe hâ ǀuidi ǀkha ge om, xawe du ge ǁîdi ǃnâ ǁan tide; sadu ge îsa ǃhanaga ge ǂgā, xawe du ge ǁîgu ǂauxûiba ā tide.

¹²ǂAn ta a, sadu di ǃûǂamdi a ǃhonarisa tsî sadu di ǁoren a ǂgui ǃkhaisa, sadu ge a ǂhanu-ain di khākhoe, sadu ǁamaǃkhunimari-e ūǃoa tsî ǂhâ hâna dao-amdi ǃnâ ra ǂhāǂuido.

¹³ǁNā-amagab ge ǁnâuǃāxaba ǁnāti ī ǁaegu ǃnâ ra ǃnō, ǁnā ǁaegu a tsūǃōb di ǁae amaga.

¹⁴Ôa re ǃgâina tsî ǂkhabana tama, î du ûi, îb ǃKhūb Elob ǂnubidi diba sadu ǀkha hâ, sadu ge mî hâ i khami.

¹⁵ǂKhababa ǁkhan î du ǃgâina ǀnam, î du ǂhanuba dao-amdi ǃnâ dī, ǀnîsib ge ǃKhūb Elob ǂnubidi diba Joseb din ǃgau hâna nî ǀkhom.

¹⁶ǁNā-amagab ra ǃKhūb Elob ǂnubidi diba nēti mî ǃKhūba: Mâ ǃkhaidi hoadi ai i ge ǃgae-e nî gao! Tsî hoa ǃgangu ge nî mî: Ae, ae! ǁÎn ge ǃhanasîsenaoga nî ǂgai, î gu ǃoa tsî ǃgae, tsî ǁnān, ǃgaetsanade ǁnâuǃā hânan ge nî ǁnae kai.

¹⁷Hoa ǃhanagu on ǃnâ i ge nî ǃgaehe, sadu ǃnâ ta ga tita doeǃganu ǃnubai, tib ra ǃKhūba mî.

¹⁸Tsūba ǁnān, ǃKhūb di tsēsa ra ǁkhorena! Tare kaiba dus kha nî ǃKhūb di tsēsa? ǁÎs ge nîra ǃkhaeba du tsî ǃnâba du tide.

¹⁹Khoe-i ra xamma ǃkhoeni khami, xawe bēri ge ǁî-e ra ǃkhō; oms ǃnâ i ra ǂgâ tsî ǃommi â-i ǀkha ǂnubiǂgoab ai ǃgîbasen, tsî ǀaob ge ǁî-e ra nâ!

²⁰ǃKhūb di tsēsa kha ǃkhae tama hâ tsî ǃnâ tama hâ, ā, ǃkhaenaba ǃnâro-i ǀkhaise?

²¹ǁKhan ta hâ, tita ge sadu di ǁâutsēde ra uixa, tsî ta ge ǃgâiǃgâibasensa sadu di ǁâu ǀhaodi ǃnâ ūhâ tama hâ.

²²Khauǁguibade du ga ǂûǁguibadi ǀkha hā-ūba te, ǁnās ǃnâ ta ge ǃgâiǃgâibasen-e ūhâ tama hâ, tsî sadu ganganǁguibadi, kaukauhe hâ tsâun ǀkha dīhe hâde ta ge tita kōǀî tama hâ.

²³Dībē re tita xu ǂkhupib sadu ǁnaes diba! ǀŌb sadu harpdi diba ta ge tita ǃgâ tide.

²⁴Ab ǂhanuba dâuhā re ǁgammi di ǃgabigu khami, tsî ǂhanu-aisibab hâhâ re ǃārob khami.

²⁵Tita du kha ǂāǁguibadi tsî ǂûǁguibadi tsîna hakadisi kuriga ǃgaroǃhūb ǃnâ ge hā-ūba, sadu Israeli ommi dido,

²⁶Sakuti, sadu gao-aoba du tani hâ hîa, tsî Kaiwanni di īb tsî ǀgamiros, sadu ǁgôa-elob, sadu ge dībasenni disa?

²⁷ǁNā-amaga ta ge tita sado ǃkhōsase nîra ūǃgûbē ǃnūse, Damaskus ǀgapise, tib ra ǃKhūba mî, ǂnubidi di Elob, ti ǀon hâba.