Read Khoekhoegowab Amob 6 Bible Online

Amob 6 - Khoekhoegowab bible

Amob 6

¹Tsūba ǁnān, Sions tawa ǂkhîse hâna, tsî ǁnān, ǂhansenoǃnâse Samarias di ǃhommi ai ǂnôana, ǁnān hîa ǂgurosan ǁaedi din, tsî ǁîn tawan ra Israeli-ommi dina hâna.

²Kalnes ǃoa ǃgâu î du kō, î du ǁnāpa xu ǃgû Hamats, ǁnā kai ǃās ǁga, î du ǁgôa Gats, Filisteǁîn ǃās ǃoa, ise di nē gaosidi xa a ǃgâi ǃkhaisa, ise gu ǁîdi ǀkhariga sadu ǀkharigu xa a kai ǃkhaisa.

³Sadu tsū tsēsa ǃnūse ra mâiǂuido, tsî ǂnû-aiǃnaos ǀgaidīs disa ra ǀgūǀgūdo.

⁴ǁNān, ǂkhoaǁgûkharogu ai ǁgoen tsî ǁgoeǃkhaidi ân ai ra garosenna tsî gūdi ân di ǁkhaona ra ǂûn tsî tsâuna kaukauǃharas ǁaeguba xu ra hapuna.

⁵ǁNān, luits di ǀōb ai ra ǁnaen tsî ǁî-aitsama musik-i di ǀkhōxūna ra hōǂuibasena Davib khami.

⁶ǂAuxûiba ǃoredi ǃnâ ra ān tsî hoan xa ǃgâi olib ǀkha ra ǂkhauǀkhāsenn tsî Joseb di ǂkhôas xa ǂhansen tamana.

⁷ǁNā-amagan ge nēsi ǃkhōsan ase nîra ǃgû, gaosan, ǃkhōsis ǃnâ ra ǂgân ǁaegu; ǃnubaib ge ǂûǁaeb dâ ran diba nîra bē.

⁸ǃKhūb ǃKhūb ge ǁîb tawa aitsama ge nū, tib ra ǃKhūb ǂnubidi di Eloba mî: Tita ge ǃgurixasib Jakob diba ra uixa tsî tita ge ǁîb di î-omga ǁkhan hâ; ǁnā-amaga ta ge tita ǃās tsî ǁîs di ǀoasiba nîra māǁnâ.

⁹Tsî i ge nîra ī, disi aogu ga ǀgui oms ǀguis ǃnâ ǃgauo, o gu ge nîra ǁō.

¹⁰Tsî hoan xa ǀgū ǀhōsab kas ǁkhō-aob kas hoas ge mâb hoab âga nî ūkhâi, ǂkhōgab nî omsa xu ūǂuise tsî ǁnāb, oms ǃnâ ǂgana hâb ǃoa: ǀNî-e noxopa hâ-e sats ǀkha? ti nî mî. Ob ge ǁîba: Khoe-i ǀkhai, ti nî mî. Ob ge nauba: ǃNō! ǃKhūb di ǀonsa ge a ǂhôa ǁoa xuige, ti nî mî.

¹¹Îts kō, ǃKhūb ra mîmā tsî ǁîb ge ǁnā kai omsa nîra ǂnauǂkhūǂkhū tsî ǂkhari omsa nîra ǂariǃā kai.

¹²Hāna ǃkhoen ra ǃhaob ai? ǁÎb ai gomagu ǀkha ǃhūǃgaohe i ra, o du ǂhanuba tsabab ǃnâ ǀkharaǀkhara hâ tsî ǂûn ǂhanu-aisib dina alsemmi ǃnâ.

¹³Sadu ǁau xū-i ǂama ra ǃgâiaǂgaodo, sida ǀgaiba xu tamasa, ǁnâga da ge hōsa? ti ra mîdo.

¹⁴Î du kō, tita ge sadu Israeli ommi didu ǂama ǁae-e nîra ǂkhaiǂkhaikhâi, tib ra ǃKhūb ǂnubidi di Eloba mî, ǁîn ge sado nîra ǁgâiǀā, Hamats tawats ra sīsa xu ǃgaroǃhūb di ǃārob kōse.