Read Khoekhoegowab Amob 7 Bible Online

Amob 7 - Khoekhoegowab bible

Amob 7

¹ǃKhūb ǃKhūb ge nēti ge mû kai te tsî kō, ǁîb ge ǂhomna ge kuru khaoǀgâb ra ǀkhī ǁaeb di tsoatsoas ǃnâ; tsî kō, khaoǀgâb ge ǁî ge i gao-aob di ǃgaoǁnâs khaoǃgâ.

²Tsî i ge ge ī, ǁhaob ǃhūb diban ge haputoa ǃnubai ta ge tita: ǃKhūtse ǀûba re; tari-e kha ǁnâi mâ ǁkhā nî ī Jakob din xa, ǁîn a ǂkhari xui-ao.

³ǃNubaib ge ǃKhūba ǁî ǃkhais xa ge ǃhausen, ob ge ǃKhūba: ǁÎ ǃkhais ge ī tide, ti ge mî.

⁴ǃAruǀîb ge ǃKhūb ǃKhūba nēti ge mû kai te; tsî kō, ǃKhūb ǃKhūb ra ǂgaiǂui ǁîb ǀaes ǀkha ǁkhara ǂgao hâ ǃkhaisa, os ge ǁîsa kai ǁgamma ge hapu, tsîs ge ǁkhāti ǃās ǃhūb disa ge hapu.

⁵ǃNubai ta ge tita: O ǃKhūtse, ǀûts nîgo, ti ge mî, tari-e kha ǁnâi Jakob din xa nî mâ ǁkhā, ǁîn a ǂkhari xui-ao?

⁶ǃNubaib ge ǃKhūba ǁî ǃkhais xa ge ǃhausen; ob ge ǃKhūb ǃKhūba: Nēs ge ǁnâi ī tide, ti ge mî.

⁷Ganupeb ge ǁîba nēti ge mû kai te; tsî kō, ǃKhūb ge ǂnubiǂgoab ǀguiro-ūtsurib ǀkha dīhe hâb ai ge mâ i, ǀguiro-ūtsuriba ǃomǁaeb âb ǃnâ ūhâse.

⁸Ob ge ǃKhūba tiǀî: Tare-ets ra mû, Amotse? ti ge mî. O ta ge tita: ǀGuiro-ūtsuri-e, ti ge mî. Ob ge ǃKhūba: Mû, tita ge ǀguiro-ūtsuri-e ti ǁaes Israels ǁaegu nî ǁgui; tita ge ǁîna ǃaruǀî ǃgû-īǀkhā tide, ti ge mî.

⁹Xawe Isaki di ǀgapigu ge nîra hîǀhuruhe tsî Israeli di ǃanusigu ge nîra hîǀhuruhe; tsî tita ge Jerobeammi ommi ǃoagu nîra khâi gôab ǀkha.

¹⁰ǃNubaib ge Amasiab, Bet-Els pristera, Jerobeammi, Israeli gao-aoba ǃoa sî tsî ge mî: Amob ge ǃgaeǀhaosen-e sa ǃoagu ge dī sadu, Israeli ommi didu ǁaegu; ǃhūb ge ǁîb di mîdi hoade tani ǁkhā tide.

¹¹Nētib ra Amoba mî xui-ao: Jerobeammi ge gôab xa nîra ǁō, tsî Israeli ge ǃhūb âba xu ǃkhōsabese nîra ūǃgûbēhe.

¹²ǁNās khaoǃgâb ge Amasiaba Amob ǃoa ge mî: Sats, mû-aotse, ǃgû îts ǃhū Judab di ǃhūb ǃoa, îts ǁnāpa pereǂû îts ǁnāpa kēbo.

¹³Xawe Bet-Els tawats ge satsa ǃaruǀî kēbo tide, gao-aob di ǃanusis a tsî gaosis di hâǃkhais a ǁî amaga.

¹⁴Ob ge Amoba ǃeream tsî Amasiab ǃoa ge mî: Tita ge kēbo-ao tama ta, tsî tita ge kēbo-aob ôa tama ta tsî ǀgoaǃûi-aota ge tita, ǀnomahais ǂûna ra ǃora ta.

¹⁵Xawe ǃKhūb ge tita gūn khaoǃgâba xu ge ūbē; tsî ǃKhūb ge tita ǁga ge mî: ǃGû îts ti ǁaes Israelsa kēboba.

¹⁶Îts ǁnâi nēsi ǁnâu ǃKhūb di mîsa: Sats ra mî: Tā Israelsa kēboba, îts tā Isaki omma ǂnâba.

¹⁷ǁNā-amagab ra ǃKhūba nēti mî: Sa taras ge ǃās ǃnâ nîra ǀai, tsî sa ôagu tsî sa ôadi tsîn ge gôagu xa nîra ǁnā, tsî sa ǃhūb ge tsurib ǀkha nîra ǀgoraǂuihe; tsî sats ge ǀurisa ǃhū-i ǃnâ nîra ǁō, tsî Israeli ge ǃhūb âba xu ǃkhōsase nîra ǂgaeǂguibēhe.