Read Khoekhoegowab Amob 9 Bible Online

Amob 9 - Khoekhoegowab bible

Amob 9

¹Tita ge ǃKhūb altars ai mâ ǃkhaisa ge mû, tsî ǁîb ge ge mî: ǂNau ǁnā ǃkhō-aidasa, ǂkhâǃnâhaigu nî ǀkhūs kōse, îts ǁîgu hoagu di danade ǁhāǃā; o ta ge tita ǁîn khaoǃgâ hâna gôab ǀkha nîra ǃgam, ǁhâ ka-i hoa-i ge ǁîna ǁhâǂoaxū tide, tsî ûi ka-i hoa-i ge ǁîn ǃnâ sâuhe tide.

²ǀAmo ǀaeb kōsen ga khau xaweb ge ti ǃomma ǁîna ǁnāpa xu ǁkhawa nîra ūhā, tsî ǀhommi kōsen ga ǃapa xawe ta ge ǁîna ǁnāpa xu nîra ūǁgôaxa.

³Tsî ǂaob Karmeli dib ain ga gaugausen xawe ta ge tita ǁîna nîra hō tsî ǁnāpa xu nîra ūhā; tsî ti mûra aiǃâba xun ga ǃhūb hurib dib ǃnâ gaugausen xawe ta ge tita ǁnāpa ǀaoba nîra mîmā, ob ge ǁîna nîra nâ.

⁴Tsî khākhoen ân di ais aiǃâba xun ga ǃkhōsis ǃnâ ǂgâ xawe ta ge tita ǁnāpa gôaba nîra mîmā, îb ǁîna ǃgam; tsî tita ge ti mûsa ǁîn ǃoagu nîra ǂnûi ǂkhababǀî, tsî ǃgâibǀî tama.

⁵ǃKhūb ǂnubidi di ǃKhūb ge ǁnāb, ǃhūba ra tsâǀkhāba, ǁîb ra tsuni tsî ǁîb ǃnâ ǁan hân hoan ra ǃoas kōse xui-ao; ǁîb ra Nylǃāb axase hoaragase khâi tsî ra ǁgôas kōse, Egipteb di ǃāb axase.

⁶ǁNāb, ǀgapise hâǃkhaidi âba ǀhommi ǃnâ ra ǂnubib tsî ǁaposa ǃkhaidi âba ǃhūbaib ai ge ǃgaoǃgaob, ǁgamgu hurib diga ǂgai tsî ǃhūbaib ai ra ǁhōǂuiba, ǃKhūb tib ge ǁîba ǀon hâ.

⁷Tita du kha Etiopiaǁîn khami ība tama hâ, sadu Israeli ôado? tib ra ǃKhūba mî. Tita kha ǁî tama ta Israelsa Egipteba xu ge ǂgaeǂguiǂui ta tsî Filisteǁîna Kaftora xu tsî Siriaǁîna Kira xu?

⁸Kō, mûra, ǃKhūb ǃKhūb dira ge nē ǁorexa gaosis ǃoagu hâ, o ta ge tita ǁîsa ǃhūbaiba xu nîra hîkākā, xawe Jakob omma ta ge tita hîkākāǃari tide, tib ra ǃKhūba mî.

⁹Îts kō, tita, ge nîra mîmā tsî tita ge Israeli ommi dina ǁaedi ǀūben hoan ǃnâ nîra ǁgara, ǃhorob ra ǁgaraǃoreb ǃnâ ǁgarahes ǁkhās xase, ǃhoroda-i xare-i ǃhūb ai ǁnā tamase.

¹⁰ǁOre-aon ti ǁaes din hoan ge gôab xa nîra ǁō ǁnān: ǂKhaba-i xare-i xa da ge sida saoǁaehe tsî hāǂamhe tide, ti ra mîna.

¹¹ǁNā tsēs ǁkhās ai ta ge tita ǁnā hâ oms Davib disa ǁkhawa nîra mâikhâi, tsî tita ge ǂapagu âsa nîra ǂkhauǂgan tsî ǁîs xa ǁnā hâ-i hoa-e ǁkhawa nîra ūkhâi tsî ǁîsa nîra ǂnubi hugakam tsēdi khami.

¹²ǁÎn nî ǀumise ūhâga Edommi di ǃgau gen tsî nau ǁaedi di ǀons ǀkha ǂgaihe hân hoana, tib ra ǃKhūba mî, nēna ra dība.

¹³Kō, tsēdi ge ra hā, tib ra ǃKhūba mî, ob ge ǃhūǃgao-aoba ǃhoroǃgao-aoba nîra ǀgū, tsî ǂauxûidāǃnâ-aoba tsoro-aoba nîra ǀgū; tsî ǃhomgu ge ǂkhon ǂauxûib xa nîra ǂnâ, tsî ǃnomdi hoadi ge nîra tsuni.

¹⁴Tsî tita ge ǃkhōsis ti ǁaes Israels disa nîra unu, on ge hîǀhuruhe hâ ǃāde ǁkhawa nîra ǂnubi tsî ǁanǃnâ tsî ǂauxûiǂûǃhanaga nîra ǂgā tsî ǂauxûib âga nîra ā; tsîn ge ǃhanaga nîra dī tsî ǂûn âga nîra ǂû.

¹⁵Tsî tita ge ǁîna ǃhūb ân ǃnâ nîra ǂgā, tsîn ge ǃhūb âna xu ǁkhawa ǃhomǂuihe tide, tita ge ǁîna māba, tib ra ǃKhūb, sadu Eloba mî.