Read Khoekhoegowab Obadjab 1 Bible Online

Obadjab 1 - Khoekhoegowab bible

Obadjab 1

¹Ais Obadjab dis. Nētib ra ǃKhūb ǃKhūba Edommi xa mî: Sida ge gomma ge ǁnâu ǃKhūb xa, tsî sîsabeb ge ǃhaodi ǃnâ ge sîhe: Khâi, î da ǁîn ǃoagu sī ǃkham, ti.

²Mû, tita ge satsa ge ǂkhariǂkhari ǃhaodi ǃnâ, sats ge kaise a ǃharaxūsa.

³ǃGurib sa ǂgaob dib ge satsa ge gā, sats ǁhāgu ǃhaogu digu ǃnâ ǁan hâts, ǀgapi hâǃkhais âts ǃnâ, sats ǂgaob âts ǃnâ, tari-e kha tita ǃhūb ai nî ǂhāǁgui? ti ra mîtsa.

⁴ǃAriǃkhās xasets ga ǀgapiǀgapisen tsî oms âtsats ga ǀgamirodi ai om, xawe ta ge tita satsa ǁnāpa xu nîra ǂhāǁnâ, tib ra ǃKhūba mî.

⁵ǃNari-aon kas tsuxuǀâ-aon kas hoas ga sa tawa sīo (matits kha satsa hîkākāhe hâ!), ǁîna kha ǃnarin tide ǂhâban hâs kōse? ǂAuxûiǂûn di ǃora-aon ga sats tawa sīo, ǁîna kha ǁhora-e ǃgaun ga tide?

⁶Matin Esaub xūna ôaǃnâǃganuhe hâ tsî ǂganǃgâsa ǁuigu âba ôaǂuihe hâ!

⁷Sa ǃgaeǁaesensan hoan ge satsa ǀkharib kōse ge ǁgari, sa ǂkhî horesan ge satsa ge gāxaǃnâ, ǁîn ge satsa ge dā; ǁnān sa pereba ra ǂûn ge ǁnoa-e nîra ǁguiba tsi, ǁnâuǃā-i xare-ets ūhâ tamas axase.

⁸Xare ī i tide ǁnātsē, tib ra ǃKhūba mî, tita gā-ain Edommi din tsî ǁnâuǃāb Esaub ǃhommi diba nîra kā kai ǃkhaisa?

⁹Sa ǁē-aogu on ge nîra ǂkhabuǂâi, sats, Temantse, mâ-i hoa-i Esaub ǃhommi di-i nî ǃgams ǀkha hîkākāhese.

¹⁰ǁNā ǀgaidīb, sa ǃgâsab Jakob ge dī-ūheb, ǂamats ge satsa taob ǀkha nîra ǃgū-aihe, tsîts ge nîra ǃhomǂuihe ǀamosib kōse.

¹¹ǁÎbats ge mâǃoa tsēs ai, ǃhaokhoen ge ǁuigu âba ūǃgûbē tsēs ai tsî ǃhao ǃhūb khoen ge ǁāgu âb ǃnâ ǃgûǂgâ tsî Jerusalems ǂama ǀkhūsa ǂnau tsēs aits ge sats ona ǁîn di ǀguib khami ge ī.

¹²Xawets ge satsa tsēs sa ǃgâsab dis ai ga kō tama hâ, tsēs ǁîb tsūǃōb dis ai, tsîs ge ga ǃgâiaǂgao tama hâ Judab ôan ǂama tsēs ǁîn kāǁōb dis ai; tsîts ge kaise ga koasen tama hâ, ǂōǂōsib tsēs ai.

¹³Tsîts ge ga ǁāb ti ǁaes dib ǃnâ ǂgâ tama hâ tsēs ǁîn tsūǀkhāb dis ai; tsîts ge ga sats ona ǂkhabab ân ai kō tama hâ, tsēs ǂōǂōsib âb dis ai; tsîts ge ga ǃomkha âtsa ǀhōǂui tama hâ, xūn âbǀî, ǂōǂōsib âb tsēs ai.

¹⁴Tsîts ge ga daob ǀgoras ai mâ tama hâ, ûi gen âbats nî hîkākāse; tsîts ge ga ǁîb di ǃgau gena māǁnâ tama hâ ǂōǂōsib tsēs ai.

¹⁵Tsēs ǃKhūb dis a ǀgū xui-ao ǁaedi hoadi ǂama; sats ge dīs xasets ge satsa nîra dī-ūhe; sa mādawa-ams ge danas âts ai nîra oahā.

¹⁶Sadu ge ǃhommi ti ǃanusib dib ai a ā khami di ge ǁaedi hoade hugaǀgui nîra ā; ā, ǁîn ge nîra ā tsî nîra hara, tsîn ge hâ taman ge hâ i khami nîra ī.

¹⁷Xawe ǃhommi Sionni ai i ge ûiǂoa-e nîra hâ, tsî ǁîb ge ǃanuse nîra ī, tsî ǁnān Jakob ommi din ge ǀumixūn âna ǀumise nîra ūhâ.

¹⁸Tsî Jakob ommi ge nîra ǀae kai, tsî Joseb ommi ge nîra ǁhabu kai, tsî Esaub ommi ge nîra ǃhoroǃgaodase ī; tsîn ge ǁîna nîra ǂhubi tsî ǁîna nîra hîkākā, Esaub di ommi ǃgau hâ-e ūhâ tides kōse, ǃKhūb ge ǁî ǃkhaisa ǃhoa xui-ao.

¹⁹Tsî ǁnān ǃkhawagas din ge Esaub di ǃhomma, tsî ǁnān ǃgoaǃnāb din ge Filisteǁîna ǀumise nîra ūhâ; ā, ǁîn ge ǃaub Efraimmi dib tsî ǃaub Samarias diba ǀumise nîra ūhâ; tsî Benjaminna Gileadǃhūba.

²⁰Tsî ǃkhōsabese ge ūǃgûbēhen nē ǂnubis, Israeli ôan dis din, ǁîn ge Kanaanǁîna nîra ū Sarefats kōse, tsî Jerusalemsa xu ǃkhōsabese ge ūǃgûbēhen, Safarab ǃnâ hân, ǁîn ge ǃādi ǃKhawagasǃhūb dide ǀumise nîra ūhâ.

²¹Tsî hui-aogu ge ǃhommi Sionni ai nîra ǂoaxa, Esaub di ǃhomma gu nî ǀgoraǃgâse, tsî gaosib ge nîra ǃKhūb di.