Read Khoekhoegowab Jonab 1 Bible Online

Jonab 1 - Khoekhoegowab bible

Jonab 1

¹Tsî mîs ǃKhūb dis ge Jonab, Amitaib ôaba ge hāba, mî rase:

²Khâi îts ǃgû Nineves kai ǃās ǃoa, îts ǁîs ǃoagu aoǁnâ, ǁîn di ǂkhabasib go ti ais aiǃâ ǂoaxa xuige.

³Xawe Jonab ge ge khâi, Tarsis ǃoab nî ǃKhūb di aisa xu ǃhūse, tsîb ge Jopas ǃoa ǁgôa tsî doe-oms, Tarsis ǃoa nî ǃgûsa ǁnāpa ge hō, tsîb ge ǃgûs di marisa matare tsî ǁîs ai ge ǂoa, ǁîn ǀkhab nî Tarsis ǃoa ǃgûse ǃKhūb di aisa xu.

⁴Xawe ǃKhūb ge kai ǂoa-e hurib ai ge ǀkhī kai, ob ge ǁgaoǂoaba hurib ai ge hā, doe-oms ge khôa ǁgas kōse.

⁵O gu ge doe-oms khoega ge ǃao, tsî gu ge mâb hoab âga ǁîgu eloga ge ǂgaiǀî tsî gu ge xūn doe-oms ǃnâ hâna hurib ǃnâ ge aoǂgā, ǁîsa gu nî supusupuga, xawe Jonab ge doe-oms di ǃnāb ǃnâ ǁgôa tsî ǁgoe tsî ǃgamse ge ǁom hâ i.

⁶Ob ge doe-oms di danaba ǁîb tawa sī tsî ǁîb ǃoa ge mî: Tarexats, satsa ǃgamse ǁomǁgoe? Khâi îts sa Eloba ǂgaiǀî, ǀnîsib ge ǁnā Eloba sage nî ǂâi, ǁō ge tidese.

⁷ǃAruǀî gu ge mâb hoab âga horesab ǁga ge mî: Hā î ge ǀkhūsa ao, î ge ǂan tarib ǃaromab nē ǂkhababa ra hāǂam gesa. Nēti gu ge ǀkhūsa ge ao, tsî ǀkhūs ge Jonab ai ge ǁnā.

⁸ǃNubai gu ge ǁîb ǃoa ge mî: Mîǃāba ge, tarib ǃaromasa nē ǂkhabab ra hāǂam gesa? Tarebe sîsenai-ets ra dī? Tsî mapa xuts ra satsa hā? Mâba sa ǃhūba? Tsî mâ ǁaes ditsa?

⁹Ob ge ǁîba ǁîgu ǃoa ge mî: Hebreǁîta ge, tsî tita ge ǃKhūb ǀhommi di Eloba ra ǃao, hurib tsî ǂnâsa ǃhūb tsîkha ge dība.

¹⁰O gu ge ǁnā aoga kaise ǃao tsî ǁîb ǃoa ge mî: Tarexats kha ǁnâi ǁnāti go dī? Aogu ge ǃKhūb di aisa xub go ǁhâ ǃkhaisa a ǂan xui-ao, ǁîb ge ǁî ǃkhaisa ǂanǂan gu amaga.

¹¹O gu ge ǃaruǀî ǁîb ǃoa ge mî: Tare-e ge sige ǁnâi nî dī-ū tsi, hurib nî sige ǂnamipe ǃnōga? Hurib ge ǃaruǀîǀgui ǁgao xui-ao.

¹²Ob ge ǁîgu ǃoa ge mî: Ū te î go hurib ǃnâ aoǂgā te, ob ge huriba sago ǂnamipe nîra ǃnō, tita a ǂan amaga, nē ǁgaoǂoas xa go tita ǃaroma ra hāǂamhe ǃkhaisa.

¹³Tsî aogu ge ge dītsâ, ise gu doe-omsa ǃhūb tawa nî sī-ū ǁkhā ǃkhaisa, xawe gu ge ge dī ǁoa i, hurib ǃaruǀîǀgui ǁîgu ǃoagu ra ǁgao xui-ao.

¹⁴ǃNubai gu ge ǃKhūb ǃoa ǂgai tsî ge mî: Okha ǃKhūtse, tā sige ǁō kai re nē aob di ǀoms ǃaroma, îts sige ǀhapio ǀaoba tā ǁgui-ai re, sats ǃKhūts go ǃgâibahets a khami dī xuige.

¹⁵O gu ge Jonaba ū tsî ǁîba hurib ǃnâ ge aoǂgā. Ob ge huriba ge ǁgaoǀû.

¹⁶ǁÎ ǃkhais xa gu ge ǁnā aoga ǃKhūba kaise ge ǃao, tsî gu ge ǃKhūba ǂāǁguibade ge ǂāba tsî mîmâide ge mîmâiba.

¹⁷Tsî ǃKhūb ge kai ǁauba ge hā kai, Jonabab nî harase, tsî Jonab ge ǃnāb ǁaub dib ǃnâ ǃnona tsēdi tsî ǃnona tsuxugu kōse ge hâ.