Read Khoekhoegowab Jonab 4 Bible Online

Jonab 4 - Khoekhoegowab bible

Jonab 4

¹ǁÎ ǃkhais xab ge Jonaba kaise ge tsû, tsîb ge ge ǁaixa.

²Ob ge ǃKhūb ǃoa ǀgore tsî ge mî: Okha ǃKhūtse, ti mî tamasa ge i nēsa, ti ǃhūb ǃnâ ta ganupe hâ hîa? ǁNā-amaga ta ge aiǃhae tsî Tarsis ǃoa ge ǃgû, tita a ǂan xui-ao, ǀkhomxa tsî ǀkhomxaǂgao Elots a ǃkhaisa, ǃnūǃnâxa tsî kai ǃgâiǃnâxasib dits a ǃkhaisa, ǂkhabab xa ra ǃhausense.

³Tsî nēsi ǃKhūtse, ti ǀomsa ūxu te, ǁōs ûis xa a ǃgâiba te xuige.

⁴Ob ge ǃKhūba: ǂHanu i a, ǁaixats ra ǃkhaisa? ti ge mî.

⁵Ob ge Jonaba ǃās ǃaugabǀî ǂoa tsî ǃās aiǂoasǀî sī ge ǂnû, tsîb ge ǁnāpa ǁhao-e ge dībasen tsî ǁî-i ǃnaga sommi ǃnâ ge ǂnû, matis nî ǃāsa hābahe ǃkhaisab nî mûga.

⁶Ob ge ǃKhūb Eloba buruxa hai-e ge kuru tsî ǁî-e Jonaba ge ǁhaoǂam kai, sommi nî danas âb ai hāse, tsūb âba xub nî ore biga. Ob ge Jonaba buruxa hais ǂama kaise ge ǃgâiaǂgao kai ǃgâiaǂgaob ǀkha.

⁷Xawe Elob ge sao ra ǁgoaga ǂuni-e ge hā kai, ǁgoas ra ǁgoa hîa; ǁî-i ge buruxa haisa ge ǃkhā, ǁîs ge ǂnâs kōse.

⁸Tsî i ge ge ī, sores ra ǁhai hîab ge Eloba ǀgamsa ǂoab aiǂoas diba hā kai ǃkhaisa, os ge soresa Jonaba danas ai ge ǃkhā, tsanaǁkhuib ges kōse, ob ge ǁîba ǀoms âba, ǁōs ka ǃkhaisa ge ǂgaoba, tsîb ge: ǁŌs ge ûis xa a ǃgâiba te, ti ge mî.

⁹ǃNubaib ge Eloba Jonab ǃoa ge mî: ǂHanu i a buruxa hais ǂamats ǁaixa hâ ǃkhaisa? Ob ge ǁîba: ǂHanu a ǁaixa ta hâsa ǁōb kōse, ti ge mî.

¹⁰Ob ge ǃKhūba ge mî: Sats ra ǀkhom ǁnā buruxa hais ǁîsats sîsen tamas tsî ǁîsats kaikai tamasa, ǀgui tsuxub ǃnâ ǀkhī tsî ǀgui tsuxub ǃnâ go kāsa.

¹¹Tsî mati ta kha ǁnâi tita ǁnā kai ǃās Ninevesa ǀkhom tide, ǁîs ǃnân ǀguikaidisi tsî ǀgamdisiǀoadisisa ǃnā hâ khoena hâsa, mâb a amǀkhā tsî mâb a ǁareǀkhā ǃkhaisa a ǀūna, tsî ǂgui ǀgoan ona?