Read Khoekhoegowab Numeri 10 Bible Online

Numeri 10 - Khoekhoegowab bible

Numeri 10

¹ǃAruǀîb ge ǃKhūba Moseb ǃoa ge mî:

²ǀGam ǀhaiǀuriǀgapadara dībasen; ǂnauǃgâiǃgâihe hâ xū-i xats ge ǁîra nî dī, tsîts ge ǁîra nî sîsenū, ǀhaohâbats nî ǂgaiǀhû tsî ǁgoe hâna doe kaise.

³Tsîn ga ǁîǀgamra xâio, ob ge ǀhaohâb hoaba sa tawa nî ǀhû, tentoms ǀhûs dis di dao-ams tawa.

⁴Tsî ǀguisan ga ǀguri xâio, o gu ge ǂamsagu, Israeli ǀoadisin di danakhoega sa tawa nî ǀhû.

⁵ǂKhupixa ǀōb ǀkhats ga xâio, on ge ǁgoe hân hîa aiǂoasǀî ǁgoena nî doe.

⁶Tsî ǀgamǁî ǃnās aits ga ǂkhupixa ǀōb ǀkha xâio, on ge ǁgoe hân, hîa ǃkhawagasǀî ǁgoena nî doe; ǂkhupixa ǀōb ǀkhan ge nî xâi, doedi ân ǃoa.

⁷Tsî ǀhaohâbats ga ǀhûǀhû ots ge xâis ǀguisa nî hî, xawets ge ǂkhupixase xâi tide.

⁸Tsî pristergu, Aronni ôagu ge ǁnā ǀgapadara nî xâi; tsî ra ge sado ǀamo ǂnûiǂgāse nî ība sadu di ǃhaodi tawa.

⁹Tsî sadu di ǃhūb ǃnâ du ga torodīǃgûo khākhoeb, sado ra ǂōǂōb ǃoagu, o du ge ǁnā ǀgapadara ǀkha ǁkhāti ǂkhupixa ǀō-e nî dī; o du ge nî ǂâibahe ǃKhūb sadu Elob di ais aiǃâ, tsî du ge sadu di khākhoena xu nî orehe.

¹⁰ǁNās ǁkhās khami du ge ǁkhāti sadu dâb di tsēs ai tsî sadu kai ǁaegu ǃnâ tsî sadu ǁkhâgu di tsoatsoadi ǃnâ ǁnā ǀgapadara nî xâi, sadu di khauǁguibadi ǂama tsî sadu di ganganǁguibadi ǂama; o di ge ǂâiǂâixūse nî ība du sadu Elob di ais aiǃâ: Tita ge ǃKhūta, sadu di Elota.

¹¹Tsî i ge ǀgamǁî kurib di ǀgamǁî ǁkhâb ǃnâ, ǀgamdisiǁî tsēs ǁkhâb dis ai ge ī, ǀnanus ge tabernakeli ǀhûǀguitimîs diba xu khâi ǃkhaisa.

¹²On ge Israeli ôana doedi ân ǃnâ ǃgaroǃhūb Sinaiba xu ge doe; tsî ǀnanus ge ǃgaroǃhūb Paranni ǃnâ ge hâ.

¹³Nētin ge ge aidoe ǃKhūb di mîmās ǃoa Moseb ǃomma xu.

¹⁴ǂGurob ge ǃkhaub Judab ôan di ǁgoeǃkhais diba ge doe, ǁîn di ǂnubidi ǃoa; tsî ǁîs di ǂnubis ǂamab ge Nasonni, Aminadab ôaba ge hâ i.

¹⁵Tsî ǂnubis Isaskari ôan di ǃhaos dis ǂamab ge Nataneli, Suari ôaba ge hâ i.

¹⁶Tsî ǂnubis Sebulonni ôan di ǃhaos dis ǂamab ge Eliab, Helonni ôaba ge hâ i.

¹⁷ǃNubaib ge tabernakela ge ūǁnâhe, tsî Gersonni ôagu tsî Merarib ôagu ge ge doe, tabernakela ra taniǃâ.

¹⁸ǁNās khaoǃgâb ge ǃkhaub Rubenni ǁgoeǃkhais diba ge doe, ǁîn di ǂnubidi ǃoa; tsî ǁîs di ǂnubis ǂamab ge Elisuri, Sedeuri ôaba ge hâ i.

¹⁹Tsî ǂnubis Simeonni di ǃhaos dis ǂamab ge Selumieli, Surisadaib ôaba ge hâ i.

²⁰Tsî ǂnubis Gadi ôan dis ǂamab ge Eljasab, Dehueli ôaba hâ ge i.

²¹ǃNubai gu ge Kehatǁîgu ge doe, ǃanusiba ra taniǃâ; tsî naugu ge tabernakela ge ǂnubikhâi, ǁîgu ge hās kōse.

²²ǁNās khaoǃgâb ge ǃkhaub Efraimmi ôan di ǁgoeǃkhais diba ge doe ǁîn di ǂnubidi ǃoa; tsî ǁîs di ǂnubis ǂamab ge Elisamab, Amihudi ôaba ge hâ i.

²³Tsî ǂnubis Manaseb ôan di ǃhaos dis ǂamab ge Gamalieli, Pedasuri ôaba ge hâ i.

²⁴Tsî ǂnubis Benjaminni ǃhaos dis ǂamab ge Abidanni, Gideonni ôaba ge hâ i.

²⁵ǃNubaib ge ǃkhaub Danni ôan di ǁgoeǃkhais diba ge doe, ǁgoeǃkhaidi din hoana ra ǃkhōǀhaose, ǁîn di ǂnubidi ǃoa; tsî ǁîs di ǂnubis ǂamab ge Ahieseri, Amisadaib ôaba ge hâ i.

²⁶Tsî ǂnubis Aseri ôan di ǃhaos dis ǂamab ge Pagieli, Okranni ôaba ge hâ i.

²⁷Tsî ǂnubis Naftalib ôan di ǃhaos dis ǂamab ge Ahirab, Enanni ôaba ge hâ i.

²⁸Nēdi ge doedi Israeli ôan dide ge i, ǁîn di ǂnubidi ǃoa, doen ra hîa.

²⁹Tsî Moseb ge Hobab, Dehueli ôab Midiaǁîb, Moseb di ǀuiǁgûb ǃoa ge mî: Sida ge ǁnā ǃās ǃoa ra doe, ǃKhūb ge ǁîs xa: Tita ge ǁîsa sado nî mā, ti mîs ǃoa; ǃgû sida ǀkha, o da ge nî ǃgâidī tsi, ǃKhūb ge Israeli ǂama ǃgâise ǃhoa xuige.

³⁰Xaweb ge: ǃGû ta tide, ti ge mî, tsî, tita ge ti ǃhūb tsî ti ǀaokhoen ǃoa nî ǃgû.

³¹Ob ge ǁîba: Tā ǁnāxū da re, ti ge mî, sats a ǂan xuige, ǃgaroǃhūb ǃnâ da nî ǁgoe ǃkhaisa, ots ge satsa mûse nî ība da.

³²Tsî i ge nî ī, sida ǀkhats ga ǃgû tsî ǃgâib ga īo, ǃKhūb nî sida tawa ǃgâidība, o da ge satsa ǁkhāti nî ǃgâidī.

³³Nētin ge ǃnona tsēdi di daob kōse ǃKhūb di ǃhomma xu ge doe; tsî ǂgaes ǃKhūb di ǃgaeǀhaos dis ge ǁîn di ais aiǃâ ge ǃgû, ǃnona tsēdi di daob kōse, ǁînas nî sâǃkhai-e ôaǂuibase.

³⁴Tsî ǀnanus ǃKhūb dis ge tsēa ǁîn ai ge hâ i, ǁgoeǃkhaisa xun ge dāǁnâo.

³⁵Tsî i ge ǂgaes ra khâi hîa ge ī, Moseb ge mîsa: Khâi re ǃKhūtse, în sa khākhoena ǀgaruǀgaruhe, în sa ǁkhansabena ais âtsa xu ǁhâ!

³⁶Tsî sâs geo, ob ge ge mî: ǃHoba re, ǃKhūtse, disiǀoadisin Israeli din di ǀoadisin ǃoa.